Janerõvijã ywete vãea rã 'arà rewarà
3
Eremiau kõ, mõrijõ tesõ akusiwa kareta pejẽ ky'y. Jypy remẽwarà. Ãmõ, age'ewarà teve. Akusiwa pejẽ remẽ, poromoja'aoka aje ywete mã'ẽ rè pemokasia rõmõ, [ãwisõ tapejimoripeoka e'ã Janejare'e ayvu rè poromo'e rã'ãga mãe kõ pè,] a'epa pejẽ. 2 Apota peja'a jẽ aje Janejare'e ayvu mojenuarà kõ ayvukwerà rè, karamoe remẽwarà kõ ayvukwerà rè. [A'e kõ omojenu amãtejẽ manyvotà kãramõ ke'ĩ Jesu ovãe mijẽ remẽ.] A'evoa rã rè tapetekokuwa jẽ. Apota petekokuwa jẽ teve Janerõvijã ywete ayvukwerà rè, Janerereko katuarà ayvukwerà rè. Emimonokwerà kõ remimojenuwerà rè teve tapetekokuwa peiko. [A'evoa rè petekokuwa jẽ remẽ napejimoripeoka ywe'e tite'ãi poromoripearà kõ pè.]3 Kee jaa ywesõ tapekuwa. Ke'ĩtà Jesu ovãe mijẽ remẽ, mirà kõ wemimota aiwerà rupi ekoi mãe kõ uutà pepytery pè. A'e kõ pejaità. Jesu koty rewarà kõ rõmõ peiko rewarà mõ pejaità kupa. 4 Kee e'i ywe'e titetà kupa: “Mape põ Penõvijã tui? ‘Ajo tarà mijẽ’, e'i rõwã itõkõ! Emã'ẽ! Nonurive! Emã'ẽ! Niteei janereko. Janerãmõi kõ opa tesõ ky'y! Ajamã'ẽ nitee ekojẽi tesõ! Yvy jinõ ypy remẽwarerà vo jẽ age'e remẽ jaiko”, e'i ywe'e titetà kupa. [Noerovijai Janejare'e ayvu rewarà mõ aepo e'i titetà kupa.] 5 Janejare'e tè itõkõ wayvu rupi yva oinõ karamoe remẽ. Yvy ve oinõ wayvu rupi. Yy pupe wyi itõkõ Janejare'e yvy omojisaoka imovija.a A'evoa rè “aje” ne'i kupa ajamã'ẽ, noja'ai a'evoa rè kupa wyi. 6 Ajaire yy pè tè itõkõ Janejare'e omomaoka yvy ypykwerà. A'e yy poru pè ena kõ weroyvypyoka imoma kõ.b 7 Ãwitõ wayvu rupi tè yvy age'ewarà oinõ, yva age'ewarà revejẽ ereko. A'evo vetà wayvu rupi teve omoma kõtà kãramõ. Yvy age'ewarà omomatà. Yva teve omomatà. Tata wasu pè tẽ tesõ omomaoka kõtà. Uu poromosã'ãga poromoe'yi remẽ tè a'evotà ekoi. Janejare'e noerovija tari mãe kõ omoma remẽ tè a'evo werekotà.
8 Kee jaa rè tapeja'a jẽ peiko, eremiau kõ. Janeupe 'arà nipukui ipi. Kuise'ẽ okwapa ipi. Kwaray ipuku sa'u. 1.000 kwaray tesõ ipuku ywete janeupe. Na'evoi Janejare'e pè. Nipukui ojevo jẽ ijupe. 9 Ajawyi pejai mãe kõ kee e'i titetà pejẽ: “Manyvore põ Penõvijã nonurive, ‘Nipukui jẽ ajotà’, e'i rire?” e'i titetà kupa. Aepo jaa pè kee a'e. Nojikõtevẽi Janerõvijã ywete ovãea rã rè ajamã'ẽ. Wãrõ jẽ jane kõ tojimosĩoka waiwererà kõ reitypypyipaoka ijupe kupa. Opota pirujẽ jane kõ a'evo toiko. Opota jane kõ pirujẽ opyri toiko karuaru iko. Nopotai jane kõ omonooka owyi. Ajawyi tè nonurive.
10 Nijakuwa amãtejẽ'ãi Janerõvijã ywete vãea 'arà. Ãwitõ nijakuwa amãtejẽi imona mã'ẽ mõ sikaepo uutà vija janema'e kõ rè omona rõmõ remẽ, ãwĩvotà Janerõvijã ywete vãea 'arà. Uu remẽ tè katu jakuwatà. Ãmẽ tè yva ryapu poromonyi mã'ẽ ojenutà jane. Ãmẽ si yva opatà ky'y. Jaytata kõ okaipatà opa teve, pirujẽ. Kwaray ivo teve, opa tary ve. Jay ivo teve. Yvy ve opatà. Ipupewarà kõ revejẽ okãjãtà. Naiko'ãi kupa ky'y. A'evotà Janerõvijã ywete uu mijẽ remẽ.c
11-12 A'evoa rã jakuwapa. Manyvotà põkõ jaikotà ky'y, ajawyi? Ãnĩ! Aje ywete Jesu vãea rã 'arà siãrõtà jakupa! “Kuise'ẽ jẽ tovãe!” eu. Ivo ikõ tijaiko enone nẽ, a'e pejẽ. Janejare'e morya rupi tijaiko ãmẽ. A'e 'arà remẽ sõsi yva okaità opa ky'y. Yvy ivo ve. Yva pupewarà kõ ivo ve. 13 Ta'evo ikõ ãmẽ kupa nẽ. Ekovijarerà ipyau mãe rã kõ kõrijõ tè siãrõ jaiko. A'evoa pè Janejare'e kee e'ipa:
– Ekovijarerà kõ ainõtà ipyau mãe kõ tè ky'y. Yva pyau. Yvy pyau teve. Ikatuaytà kupa ãmẽ. Ivo mãe kõ rena rã tè a'e, e'ipa.d
14 A'evoa siãrõ jẽ jakupa ãmẽ, eremiau kõ. Ajawyi kee a'e pejẽ. Tapejimokasi ikõ Janejare'e py'a rupi katu tapeiko ipi nẽ. Ãwitõ nimãrãi mã'ẽ ekoi mã'ẽ vo 'ejẽ tapeiko. A'evo peiko remẽ, napejimosĩoka'ãi iwyi. Pepy'a katu kõrijõtà tè ee pemãjã penory rõmõ.
15 Kee jaa rè tapeja'a jẽ. Janerõvijã ywete opota janeatyry kõ opyri janerereko katu rõmõ. Ajawyi nojikõtevẽi ovãea rã rè. Wãrõ jẽ janemoatya rã upa. A'evoa rè janeretãrã Pauru okusiwapa teve pejẽ. Aje ywete Janejare'e tè omotekokuwa wayvu rè tokusiwa. 16 Kareta kõ okusiwa remẽ, janemotekokuwaoka ipi, manyvo tijaiko Janerõvijã ywete vãea rã 'arà siãrõ jẽ jakupa remẽ. Pe'ĩpe'ĩ emikusiwarerà kõ mõ waypete sienu. Jamogeta remẽ: “Manyvo jaa põ aepo jaa?” ja'e. A'e ikusiwarerà Janejare'e ayvu rè notekokuwai mãe kõ omogeta remẽ, kee e'i tite kupa: “Eupe niwaypei 'ete aenu!” e'i tite kupa. “Aenu katu emikusiwarerà!” e'i tite kupa. Nokuwai ajamã'ẽ kupa. Wemikuwa kõrijõ tè omojenu kupa. Omotee emikusiwarerà kupa, nokuwai kupa rewarà mõ. A'evo wereko ywe'e tite pirujẽ Janejare'e ayvu jikusiwarerà kupa ipi. A'evo teãmã Janejare'e ayvu rè poromo'e rã'ãga mãe kõ ipi. [Ajawyi kãramõ Janejare'e poromosã'ãga remẽ, wemavo kõtà imomorijaupa kõ.]
17 Akuwa pejẽ na'evoi peiko, eremiau kõ. Pekuwapa amãtejẽ a'evoa. Ajawyi tapejireko katu jẽ ikõ nivoi mãe kõ wyi peiko nẽ, a'e pejẽ. Tapeneraa tite e'ã ikõ ivo e'ãa rupi kupa nẽ. Tapejavy ywe'e tite e'ã Janejare'e rekoa, noerovijai mãe kõ vo. Ivo kõ jẽ peiko remẽ, Janejare'e rekoa rupi rõwã peikotà ãmẽ ky'y. 18 Tapejimokasiay ikõ Janerõvijã Jesu Kiristu revejẽ tapeiko nẽ, Janerereko katuarà revejẽ. Tapejimotekokuwavay ikõ ee peiko nẽ. A'e ywesõ ikatuay wete. A'e ywesõ ikasiay janere iko mã'ẽ. A'e kuwasi jamoe'e karuaru kuwa mijã. Õ'õ, awyje katu ãwĩvo jamoe'e karuaru jaiko ipi.
[Awyjepa eremikusiwarerà ky'y.]