Janejare'e ayvu rè poromo'e rã'ãga mãe kõ rewarà
2
Oiko ajamã'ẽ kee e'i mãe kõ: “Janejare'e ayvu oromojenutà pejẽ pemotekokuwa rõmõ”, e'i rã'ãga mãe kõ. Ãwitõ ãwĩ rapijarerà oiko karamoe remẽ, apijarerà kõ oikotà age'e remẽ janepytery pè. A'e kõ, “Kee e'i Janejare'e”, e'i kupa remẽ, wayvu pè tè aepo e'ità kupa. Janejare'e rekoa pè rõwã aepo e'ità kupa. Poromoripetà tè aepo e'i kupa. Ajawyi Janejare'e omomorijautà apijarerà. Ãwisõ Janerõvijã Jesu omãnõma ipe janeaiwererà repykarà rõmõ janepijarĩ remẽ, nopotai kupa ajamã'ẽ. Noerovijai kupa. Ajawyi sitõ ojimomorijau 'atà tè iko kupa. 2 Pepytery pewarà kõ mõ mõa'ãrõwã “aje ipõ” e'i ywe'e titetà ijayvu kõ pè ajamã'ẽ. Poromoripe mãe kõ ayvu ai rupi oiko ywe'e titetà. Iwaria kõ rupi teve ekoità kupa. A'e kõ rè Jesu noerovijai mãe kõ omã'ẽ remẽ, oporegeta ai ywe'e titetà Jesu rè kupa, eewarà kõ rewarà mõ. “Nikatui Jesu rekoa”, e'i ywe'e titetà ãmẽ kupa. 3 Kee e'i Janejare'e ayvu rè poromo'e rã'ãga mãe kõ ipi. Pepytery pè uu kupa remẽ, pekarakuri rekyia rè kõrijõ oja'atà kupa. A'evoa rõmõ opotatà pemoripe kupa. Iwari warità kupa. Janejare'e okuwapa ekoa kõ ajamã'ẽ. Imomorijaua rã omo'ypa amãtejẽ karamoe remeve. Nokeri omãjã janere ipi mã'ẽ tè Janejare'e. Ijaiwererà kõ rè omã'ẽ jẽ teve iko ipi. Nomoane'e'ãi ijaiwererà kõ ãmẽ. [Ãwitõ karamoe remẽwarà kõ omomorijaupa ijaiwererà kõ rewarà mõ, ãwĩvo ve wereko kõtà ãmẽ.]4 Karamoe remẽ itõkõ Janejare'e remĩgwai yvapewarà kõ mõ ojimoãpã ywe'e tite Janejare'e rè. Ãmẽ kee ne'i Janejare'e ee kõ omãjã: “Nimanyvoi a'evo ekoi kupa remẽ”, ne'i. Omoisyry kõ wena pe wyi ky'y. Ijãpatõnusu e'e tè tena vaiwerà pè omopã'ãoka kõ. A'e pè oiko puku jẽ iko kupa, ajaate poromoe'yia 'arà okwatà. Omomorijau kõtà ãmẽ ky'y. [A'evoa rè tapeja'a jẽ pejimotekokuwa rõmõ, a'e pejẽ.]a
5 A'evo ve itõkõ nivoi mãe kõ karamoe remẽ, Janejare'e rekoa rupi noiko tari mãe kõ. Ãmẽ kee ne'i Janejare'e ee kõ omãjã: “Nimanyvoi a'evo ekoi kupa remẽ”, ne'i. Nomoane'ei ijaiwererà kõ. Yy poru kõ oinõoka ijapisia kõ rõmõ. Tãmõ Noe kõ rõmõ'ĩte wereko katu yy poru wyi ãmẽ ereko. Kee e'i ipi Noe rewarà mõ a'evo wereko: “Janejare'e ikõ sirovija ipi nẽ”, e'i imojenu ipi. Ajawyi Janejare'e wau jẽ ereko katu, ipyriwarà kõ revejẽ, 7 rõmõ revejẽ.b
6 A'evo ve itõkõ Sotoma taa wãnà kõ nivoi ekoi karamoe remẽ. Komora taa wãnà kõ teve nivoi ekoi. Ãmẽ kee ne'i Janejare'e ee kõ omãjã: “Nimanyvoi a'evo ekoi kupa remẽ”, ne'i. Nomoane'ei ijaiwererà kõ. Tata wasu kõ oinõoka, ena kõ revejẽ tokaipa jimo'yjẽ kupa, nivoi ekoi kupa rewarà mõ. Ajawyi aekwerà rè tijaja'a jẽ jajimotekokuwa rõmõ jaiko ipi, tijaiko e'ã eko aiwerà kõ rupi jaiko.c 7 Tãmõ Ero ãmẽ itõkõ wekyioka amãtejẽ tata wasu renone. Ivo ekoi mã'ẽ tè Ero. Ajawyi ojimopirai tesõ nivoi mãe kõ rekoa ai rè omãjã ipi.d 8 Nivoi mãe kõ pytery pè ekoi ipi mijã, Sotoma taa pè. Kõ'ẽ jawe jawe omã'ẽ a'e wãnà kõ reko aiwerà kõ rè ipi. Ijayvu ai kõ wenu teve ipi. Ajawyi ojimopirai tesõ ijaiwererà kõ rewarà mõ.
9 Ajawyi jakuwa Janejare'e wereko katu ivo mãe kõ ipi. Waypea wyi wereko katu kõ jẽ ereko kõ ipi. Jakuwa nivoi mãe kõ noporijauesai ereko ipi. Imomorijaua rã omo'ypa amãtejẽ ee kõ. Kãramõ poromoe'yi remẽ, omono kõtà jimomorijau wasua rena kyty. 10 Jitupi aia rupi ekoi mãe kõ ywesõ omomorijautà. A'e kõ werõarõ ywe'e tite Janejare'e iko kupa. Ajawyi ywesõ omomorijau kõtà.
Agyvo Janejare'e ayvu rè poromo'e rã'ãga mãe kõ ekoi ipi.e Ojimoe'e ywe'e tite kupa ipi. Ojimokasiay ywe'e tite teve iko wee kupa ipi. Yvapewarà kõ werõarõ ywe'e tite kupa ipi, 11 ãwisõ yvapewarà kõ ywesõ ikasiay werõarõarà kõ wyi remẽ. “Janejare'e tapenemavo peneity”, ne'i ajamã'ẽ yvapewarà kõ Janerõvijã ywete rovake. [Na'evoi Janejare'e ayvu rè poromo'e rã'ãga mãe kõ ajamã'ẽ. A'e kõ ojimokasi ywe'e tite ovake.] 12 Ãwĩ rapijarerà wemimota aiwerà rupi kõrijõ tè ekoi kupa ipi. Ãwitõ mijarà ka'aporà wemimotarà rupi tepe'yte oo oo ipi, a'evo ve notekokuwai tesõ kupa, jawarà vo 'ejẽ. Porojai ywe'e tite kupa ipi, notekokuwai kupa rewarà mõ. Wemikuwa rõwã oojai kupa ipi. Mijarà ojãrõ mã'ẽ ojimovija jajuka mãe rã teãmã mã'ẽ vo 'ejẽ ojimoma 'atà tè iko kupa. 13 A'e kõ poromomorijauvay iko ipi. A'evoa repykarà rõmõ Janejare'e omomorijau kõtà ãmẽ. Oiko ai tesõ teve kupa ipi. Nojimosĩokai 'ete wekoa ai rè kupa ipi. Tyvija rupi tè rõwã nivoi ekoi kupa ipi. Jane kõ rovake tẽ tesõ a'evo ekoi kupa ipi. Pya rupi tesõ a'evo ekoi kupa ipi. 'Arà rupi tesõ teve a'evo kupa ipi. Aja paire katu ojimoaty peneve iko kupa. Kee e'i rã'ãga peupe ãmẽ kupa: “Jesu koty rewarà teve ije”, e'i rã'ãga pemoripe kupa ipi. Ojimi'u peneve kupa remẽ, ojimoane'e jẽ tesõ waiwererà rè iko kupa ipi. Noity'ãi waiwererà kõ iko kupa. Ory kõrijõ tesõ ee iko kupa ipi. 14 Noerekoiva'ãi tesõ wãivĩ rè jitupia kõ kupa. Omã'ẽ tesõ jẽ wãivĩ kõ rè kupa. “Emy'a kuwasi ee mijã!” e'i tè katu ee omãjã kupa ipi. Ãwisõ imy'apa ipe kupa remẽ, omy'aa rã rè ojipy'amogeta jẽ tesõ kupa ipi. A'evoa rè kõrijõ ojipy'amogeta ai iko kupa ipi. Ãmõ, agyvo ekoi kupa. Jane mõ Janejare'e rè nojirovija ywe'ei mã'ẽ mõ wesa kupa remẽ, “Ejo erupi!” e'i kupa ipi. Ovoarà rõmõ weraa toiko ai kupa. A'evo poromoripearà rõmõ ekoi kupa ipi. Ãmõ, moma'e moatya rè kõrijõ ojitupi ai iko kupa ipi. Ãwisõ imoma'epa ipe kupa remẽ, “Emoma'e rãgwe!” e'i jẽ tesõ iko kupa ipi. A'evo 'evo ekoi kupa ipi. Ajawyi Janejare'e remimoaiwea rã rõmõ ekoi kupa. 15 Nivoi ekoi kupa rewarà mõ, oity ivo tekoua kupa ky'y. Janejare'e rekoa oitypypyipa kupa.
Paraã amyry reruparà mõ ekoi kupa, Peu ra'yry reruparà mõ. [A'e itõkõ Janejare'e ayvu omojenu karamoe remẽ iko mijã.] Ajaire karakuri pyya rè ywesõ oja'a ky'y. Ajawyi nivoi 'ete ekoi ipyyarà rõmõ ky'y. Nivoi ekoia repy rã rè ywesõ oja'a iko rewarà mõ a'evo ekoi ywe'e tite. 16 Ajawyi itõkõ eima tẽ tesõ omomyta ojarà ky'y, totekokuwa. Jumẽtu tẽ tesõ omomyta. Ãwisõ oje'ẽ mã'ẽ teãmã ipe jumẽtu. Ajamã'ẽ oporegeta janevo ojarà pè imosĩoka. Noeraa'ãi ojarà toiko ai otekokuwa e'ãa rupi. A'evo Paraã ekoi karamoe remẽ.f [Eruparà rõmõ Janejare'e ayvu mojenuarà rã'ãga kõ ekoi age'e remẽ.]
17 Manyvoa rã rõmõ rõwã ãwĩ rapijarerà kõ ekoi. Kee pejẽ ipe ijupewarà kõ rõmõ: “Janemotekokuwavaytà”, pejẽ ipe ijupewarà kõ rõmõ. Ajamã'ẽ agyvo 'ejẽ kupa. Ãwitõ yvy kwarà yy rena typy mã'ẽ pè, kee ja'e ipe remẽ: “Yy taekyi ipupe wyi”, ja'e ipe remẽ, soõ, naikoi yy! Janeporijau ee. A'evo ekoi kupa.
Ãmõ agyvo 'ejẽ kupa. Ãwitõ yva rãtasĩ okwa remẽ, kee ja'e tite remẽ: “Ãmãnà okytà eremitã kõ mory”, ja'e tite remẽ. Ajaire, soõ, nokyi ãmãnà. Okwa 'a tè yva rãtasĩ. Ãwĩvo poromo'e rã'ãga mãe kõ. Nijanemotekokuwa'ãi kupa. Manyvoa rã rõmõ rõwã ekoità kupa.
Ajawyi kee e'ipa Janejare'e a'e kõ pewarà mõ: “Pãtõmimi e'ete vo mã'ẽ kyty amono kõtà imokuipe'e kãramõ”, e'ipa. 18 Eko aiwererà kõ rewarà mõ aepo e'ipa. Ãmõ, jitupi aia kõ rewarà mõ teve aepo e'ipa. Ojimojõvijã rã'ãga ywe'e tite ojimoe'e kupa ipi. “Atekokuwavay”, e'i tite oupe kupa ipi. Notekokuwai kupa ajamã'ẽ. Poromoripe tè iko kupa ipi. Ava mõ opota waiwererà reity Janejare'e rekoa rupi toiko remẽ, a'e kõ kee e'ità: “Ãnĩ! Orevo jẽsi peiko!” e'ità kupa. A'evo opijarĩ kõtà ivo tekoua wyi kupa ipi. Ajawyi opota waiwererà reity mãe kõ werovija ywe'e tite kupa ipi. Ojimoane'e jẽ ãmẽ iko kupa. Nojimoripei sõ kupa remẽ, oitypypyipatà waiwererà kupa mijã. 19 Kee e'i teve poromo'e rã'ãga mãe kõ: “Nimanyvoi ãwĩvo jaiko remẽ. Oropota katu ãwĩvo orerekoa”, e'i ywe'e tite kupa ipi. Ajamã'ẽ nikasi sikaepo waiwererà reitya rè kupa ipi. Eko aiwererà nojityokai ijupe kõ. A'evo teãmã waiwererà rè ojimoane'e jẽ mãe kõ. 20 Uve jane kõ mõ, agyvo ekoi mãe kõ. Janerõvijã Jesu Kiristu rè ojirovijaa rupi oity waiwererà mijã. Aja paire ojivy weko aiwererà kyty kupa. Apijarà kõ pewarà mõ kee a'e. Ojirojivyrĩ waiwererà kyty mã'ẽ ywesõ nikatu'ãi. 21 Ivo katua rupi ekoi apijarerà mijã. Ajaire, soõ, ivo katuay ekoi mã'ẽ oity ywe'e tite kupa. Waiwererà kyty ojirojivy mijẽ ywe'e tite kupa ky'y. Ajawyi ikatu sa'u kuwa, Jesu rupi ivo tekoua nokuwaive remẽ mijã. 22 Agyvo apijarerà kõ. Ãwitõ jawa teima owe'ẽ maire, oo mijẽ owe'ẽgwerà wa, a'evo ve waiwererà rè ojirojivy mijẽ mãe kõ. Ãmõ, agyvo ekoi kupa. Ãwitõ tajausĩ jakusu paire ojivy mijẽ tujugà rè ojimosĩ. A'evo ivoa rupi oiko paire ojirojivy mijẽ mãe kõ ekoi. Aje ywete a'evo ekoi kupa ipi.