1 Juwão
Juwão okusiwa ypy maekwerà
“Jesu Kiristu Janejare'e ayvu rõmõ ekoi”, e'i mã'ẽ
1
[Ije Juwão. Aã kareta akusiwa, Jesu rè ojirovija mãe kõ pè, tomã'ẽ ee. Jesu rekoa rè poromotekokuwa mã'ẽ tè akusiwa ajupa.] Janejare'e Ayvu poromoigo karuaru mã'ẽ eu Jesu pè. Karamoe remeve oikopa amãtejẽ iko. Yvy jinõ e'ãve ekoipa teãmã. Ajaire ojimojane ojikuwa jane kõ pytery pè uu. Oroenu poromotekokuwa iko remẽ ipi. Oromã'ẽ teve ee ipi. Orerea e'e pè tè oromã'ẽ ee. Orojipy teve ee. Orepo pè ywete orojipy ee. A'e a'e rewarà tè akusiwa ajupa tapekuwa.a 2 Ajaire ojikuwa jane kõ pè, ãwisõ tijakuwa ky'y. Yvy jinõ e'ãve Janejare'e pyri ekoi. Oiko karuaru iko. Age'e remẽ uve tè iko. A'e tè ojisa ore. Janerereko katuarà rõmõ uu. A'evoa teve oromome'u pejẽ orokupa. Janemoigoa rewarà oromome'u oroiko.b 3 Oromã'ẽ ee mã'ẽ tè oromome'u orokupa. Ãmõ, orereminuwerà teve oromome'u orokupa, tapekuwa. Orojimory katu Janejare'e rè ipi. Janejare'e Ra'yry rè tẽ tesõ orojimory ipi, Jesu Kiristu rè. Ãwitõ orojimory katu ee kõ ipi, tãwĩvo ve pejẽ tapejimory katu ve orere. 4 Ajawyi kareta rè aepo orokusiwa peupe orokupa, pirujẽ tijanerory katu jẽsi jaiko.Jesu rekoa rupi jaikoa rewarà
5 Oroenu ijayvukwerà oremotekokuwa remẽ. Ajawyi orereminuwerà tè oromome'utà pejẽ. Kee e'i mã'ẽ: “Ikatuay wete Janejare'e. Nuvei 'ete ijaiwererà ee”, e'i mã'ẽ. 6 Nivoi jaiko remẽ, “Ajimory katu Janejare'e rè ipi”, ja'e tite remẽ, janewarite janevote [jane kõ pè]. Aje ywete mã'ẽ rupi rõwã jaiko. Ãwitõ ava mõ pãtõnusu rupi ekoi remẽ, “Arakatu rupi aiko”, e'i tite oupe remẽ, ãwĩvo. 7 Ivo katu jaiko remẽ, Janejare'e rekoa rupi katu jaiko ipi. Jajimory katu jane kõ rè ãmẽ. Janejare'e janeaiwererà rè janepy'aky'a'opa Wa'yry Jesu mãnõa rupi, [ãwisõ ekoa rupi katu tijaiko.]
8 Ajamã'ẽ kee ja'e sõ remẽ, janevote jajimoripetà tè: “Ereko tè. Nuvei 'ete eaiwererà mõ ere”, ja'e sõ remẽ. Aje ywete mã'ẽ rupi rõwã sikaepo jaiko aepo ja'e remẽ. 9 Ajamã'ẽ janeaiwererà jamome'u Janejare'e pè tijaneporijauesa ãwisõ oity janewyi remẽ. Ivo poroereko mã'ẽ tè a'e. Wayvu rupi katu ekoi mã'ẽ tè. Aje ywete janepy'aky'a'otà pirujẽ janeaiwererà moisyrya rè. 10 Ajamã'ẽ kee ja'e sõ remẽ, “Nuvei 'ete eaiwererà ere. Najavyi 'ete Janejare'e ayvu mã'ẽ tè ije ipi”, ja'e sõ remẽ, “Iwari tè Janejare'e eupewarà mõ”, jaa tè aepo. [Kee e'i Janejare'e rewarà mõ: “Nuvei 'ete ivo teãmã mã'ẽ mõ”, e'ipa rewarà mõ.] Noikoi Janejare'e ayvu janepy'a pupe aepo ja'e tite remẽ.