“Jesu Kiristu janeporijauesaoka Uu pè ipi”, e'i mã'ẽ
2
Eãkarãgwerà kõ, eayvu akusiwa pejẽ ajupa, napotai Janejare'e rekoa pejavy ipi rewarà mõ. Jane nisipotai jajavy. Japota ipe Jesu Kiristu vo jaiko, a'e ivo ekoi mã'ẽ tè. Ajamã'ẽ jajavy sõ remẽ, tijaityoka janeaiwererà Jesu Kiristu pè. A'e janeporijauesaoka Uu pè ipi. 2 Jesu omãnõ janeupewarà mõ, janeaiwererà repykarà mõ. Janeupewarà mõ kõrijõ tè rõwã omãnõ. Pirujẽ yvy pewarà kõ pewarà mõ teve. [Ajawyi janeporijauesaoka Uu pè remẽ, “hoõ” e'i Wa'yry pè. “Awyjepa” e'ità teve janeaiwererà pè ãmẽ.]3 Janejare'e ayvu rupi katu jaiko remẽ, “Aje ywete, akuwa Janejare'e”, ja'età janepy'a pupe. 4 Uve mirà kõ mõ, “Janejare'e akuwa”, e'i teywete mã'ẽ. Ajamã'ẽ ijayvu rupi noikoi. Ajawyi iwarite aepo e'i remẽ. Naikoi Janejare'e ayvu aje mã'ẽ ipy'a pupe. 5 Ava mõ Janejare'e ayvu rupi katu ekoi remẽ, aje ywete wauvay Janejare'e mã'ẽ tè a'e.
Kee jakuwa Janejare'e revejẽ jaiko remẽ: 6 Ava mõ, “Janejare'e revejẽ aiko”, e'i remẽ, Jesu rekoa rupi toiko katu iko ãmẽ. [A'evo jaiko remẽ, jakuwapa Janejare'e revejẽ jaiko mã'ẽ.]
“Jesu ayvu rupi katu tijaiko ipi”, e'i mã'ẽ
7 Eremiau kõ, Janejare'e ayvu rupi manyvo tijaiko e'i maekwerà amome'u pejẽ ekareta rupi ajupa. “[Pe'ĩypyte rõmõ tapeiko.] Tapejiauvay ojeeve peiko”, e'i maekwerà. Age'ewarà rõwã aepo jaa. [Karamoe remeve Jesu aepo e'ipa janeupe.] Aekwerà rupi katu tè ojenu pejẽ, Jesu rè pejirovija ypy remẽ. 8 Ajamã'ẽ [ãwitõ Jesu ayvu age'ewarà e'i aepo pè, a'evo ve] age'ewarà teve eremikusiwarerà rupi jajiauvay ky'y. Nojikuwai janerauvay e'eay mijã. Janeaiwererà rupi tè jaiko ipi mijã. Jesu janerauvay rewarà mõ tè ojikuwa jane ky'y. Pejẽ ve poroauvay Jesu kasia rupi remẽ, ojikuwa tary ve pejẽ ãmẽ ipi. Nojikuwai mijã. Janejare'e rekoa nojikuwa ywe'ei ve mijã. Janejare'e reko e'ãma kõrijõ tè ojikuwa mijã. Age'e Janejare'e rekoa ojikuwapa ypy iko janeupe ky'y. Ajawyi age'ewarà eu tè aepo jaa pè ky'y. Ãwitõ arakatu ojisa katu, ãwĩvo ve Janejare'e rekoa ojikuwa katu jane ky'y.
9 Ava mõ, “Janejare'e rekoa rupi aiko ipi”, e'i epe remẽ. Ajamã'ẽ Jesu koty rewarà kõ mõ rè ojikõ'õ jẽ tesõ iko remẽ, ovote ojimoripe. Janejare'e rekoa rupi rõwã ekoi apijarà. 10 Jajiauvay remẽ tè Janejare'e rekoa rupi katu jaiko ipi. Nijajavyi Janejare'e rupi tekoua a'evo jaiko remẽ. 11 Na'evoi ojikõ'õ jẽ opyriwarà kõ rè mã'ẽ. A'evo remẽ, Janejare'e reko e'ãma rupi tè ekoi. Ãwitõ pãtõnusu rupi wata iko mã'ẽ nokuwai maty ootà mã'ẽ, ãwĩvo 'ejẽ Janejare'e reko e'ãma rupi ekoi mã'ẽ.
12 Ja'yrerà kõ pè kee a'e.
Janejare'e “awyjepa” e'ipa peaiwererà pè ky'y,
Kiristu omãnõ peupewarà mõ rewarà mõ.
Ajawyi aã kareta akusiwa pejẽ ajupa.
13 Miratuwerà kõ pè kee a'e teve.
Yvy jinõ e'ãve ekoi teãmã mã'ẽ pekuwa.
Ajawyi aã kareta akusiwa pejẽ ajupa.
Kõnomĩokyry kõ pè kee a'e, kõjãmukukyrerà pè teve.
Nivoi mãe kõ rõvijã 'arà kyty tè peiko Jesu mãnõa rupi.
Ajawyi aã kareta akusiwa peupe ajupa.
14 Ja'yrerà kõ pè teve kee a'e.
Janejare'e pekuwapa, Jesu ruu.
Ajawyi aã kareta akusiwa pejẽ ajupa.
Miratuwerà kõ pè kee a'e teve.
Yvy jinõ e'ãve ekoi teãmã mã'ẽ pekuwa.
Ajawyi aã kareta akusiwa pejẽ ajupa.
Kõnomĩokyry kõ pè, kee a'e teve. Kõjãmukukyrerà kõ pè teve.
Pekasiay ipi.
Janejare'e ayvu rè pejipy'amogeta ipi.
A'e ayvu rupi peiko ipi.
Nivoi mãe kõ rõvijã 'arà kyty peiko ky'y.
Ajawyi aã kareta akusiwa pejẽ ajupa.
“Nivoi tekoua rè ikõ tapejitupi e'ã nẽ”, e'i mã'ẽ
15 [Age'e pirujẽ a'età pejẽ ky'y. Uve mõrijõ tekoua. Kejõ. Janejare'e rupi tekoua. Ãmõ, nivoi mã'ẽ rupi tekoua. Mokopejõ.] Ajawyi, “Janejare'e rè noja'ai mãe kõ rekoa rupi kuwasi aiko!” tapejẽ e'ã ikenẽ. Tapejitupi e'ã ikõ ãwĩ rapijarà rekoa rè nẽ. Ojitupi ekoa kõ rè mã'ẽ noaui Papa yvapewarà ipi. 16 Nivoi mãe kõ rekoa rupi jipy'amogetaa remẽ, kee mã'ẽ. “Emy'arà rõmõ kuwasi!” eu remẽ. “Emoma'e rõmõ kuwasi!” eu remẽ teve. “Emoe'e kuwasi kupa!” eu teve remẽ. Aepo eu remẽ, Janeruwasu rekoa rupi katu rõwã jaiko ipi. Nivoi mãe kõ rekoa rupi tè jaiko ãmẽ. 17 Opatà mãe rã pè tè aepo eu ipi. Temimotarà kõ opatà mãe kõ tè. Janejare'e remimota rupi ekoi mã'ẽ ãmẽ nopa'ãi. Oiko karuarutà ipyri.
“Jesu Kiristu ãpã uutà”, e'i mã'ẽ
18 Eãkarãgwerà kõ, ke'ĩ yvy opatà. Kiristu ãpã kõ uutà. Poromoripearà rõmõ uutà kupa. Aepo jaa ojenupa pejẽ. Ovãema iteetejẽ Kiristu ãpã kõ ajamã'ẽ. Ajawyi jakuwa ke'ĩ yvy opatà mã'ẽ. 19 Ãwĩ kõ ojipe'a janepytery pe wyi. Jesu koty rewarà kõ pytery pe wyi ojipe'a kupa. Janevo rõwã ajamã'ẽ kupa. Jesu koty reware'e kõ rõwã kupa. A'e kõ aje ywete sõ Jesu koty rewarà kõ rõmõ ekoi kupa remẽ, opyta kuwa janereve Jesu moe'e kupa mijã. Na'evoi kupa ajamã'ẽ. A'evo ojikuwa ojirovija rã'ãga ee mãe kõ rõmõ kupa.
20 Ajamã'ẽ Janejare'e 'Ãg uupa oike pepy'a pupe, Kiristu omuupa okoty rewarà kõ pè mã'ẽ. A'e pemotekokuwaarà rõmõ uu, aje ywete mã'ẽ tapekuwa. 21 Ajawyi kee na'ei peupewarà mõ ipi: “Nokuwai aje mã'ẽ kupa rewarà mõ takusiwa ijupe kõ imotekokuwaa kõ rõmõ”, na'ei. Kee a'e kõrijõ tè: “Okuwapa iko aje ywete mã'ẽ kupa”, a'e kõrijõ tè ipi. “Okuwa teve aje ywete mã'ẽ rupiwarà naiko'ãi waria ipi. Ajawyi takusiwa ijupe kõ imokasi kõ”, a'e kõrijõ tè.
22 Iwari mãe kõ kee e'i tite: “Janejare'e Remimuurerà rõwã Jesu. Ãmõ, Janerõvijã ywete rõmõ rõwã”, e'i tite. Kiristu ãpã kõ tè aepo e'i mãe kõ. Ava mõ Janejare'e Ra'yry noerovijai remẽ, Tuu noerovijai teve jaa tè aepo'i. 23 Ava mõ, “Janejare'e Ra'yry rõwã Jesu”, e'i sõ remẽ, eevejẽ rõwã Tuu ekoi ipi. “Janejare'e ra'yre'e tè Jesu”, e'i mã'ẽ reve tè Tuu ekoi ipi.
24 Ajawyi kee a'e pejẽ. Tapeja'a jẽ ikõ Jesu rekoa rè peiko ipi nẽ. Jesu rè pejirovija ypy remẽ, peenu maekwerà rè. Peja'a jẽ ee peiko remẽ, Janejare'e Ra'yry revejẽ peikotà ãmẽ. Tuu revejẽ teve peikotà ãmẽ ipi. 25 “A'evo peiko remẽ, Janejare'e pyri peiko karuarutà ky'y”, e'ipa Jesu jane. “Poromoigooka karuarutà Papa pyri”, e'ipa. Aepo e'i maekwerà rupi katu a'evotà ãmẽ.
26 Poromotekokuwa aã kareta rupi ajupa, pemoripe tarepe mãe kõ rè. A'e kõ opota ipe pemomoi Janejare'e wyi. Ajawyi tapeenu ywe'e tite e'ã ikõ a'e kõ ayvu nẽ. 27 [“Temotekokuwa Janejare'e ayvu rè kupa”, tapejẽ ywe'e tite e'ã.] Jesu Kiristu omuupa o'Ãg toike pepy'a pupe, pemotekokuwa mã'ẽ rõmõ. Pirujẽ Janejare'e ayvu rè pemotekokuwa ipi. Aje ywete mã'ẽ kõrijõ tè omome'u ipi. Iwari mã'ẽ rõwã. Ajawyi kee a'e pejẽ. Pemotekokuwa mã'ẽ tè i'Ãg. Ajawyi pemotekokuwa ee mã'ẽ rupi ikõ tapeiko nẽ, a'e. Jesu Kiristu revejẽ tapeiko ipi, a'e teve pejẽ.
28 Kãramõ Jesu Kiristu ojisaoka tarà mijẽ ike uu yvy pè remẽ. Jesu revejẽ jaiko remẽ, ekoa rupi tijaiko ipi. Ãmẽ tè Kiristu ovãe remẽ, nijakyje'ãi iwyi. Nijajimosĩoka'ãi teve ovake. Janeroryvay kõrijõtà tè ovake, nijaity'ãi ekoa ipi rewarà mõ. A'evo tapeiko awi, eãkarãgwerà kõ. 29 Ivo katuay mã'ẽ tè Kiristu. Ajawyi ivo katua rupi ekoi mãe kõ upi ve opoera mã'ẽ rõmõ tè ekoi ky'y. Pekuwapa a'evoa.