“Janejare'e ãkarãgwerà kõ tè jane”, e'i mã'ẽ
3
Janejare'e janerauvay wete ipi. Janerauvay teãmã janerereko. Ajawyi “eãkarãgwerà” e'i janeupe ipi. Aje ywete Janejare'e ãkarã tè jane. Janereinõ wãkarãgwerà rõmõ. Ajamã'ẽ nojirovijai Janejare'e rè mãe kõ nijanekuwai Janejare'e ãkarãgwerà tè jane jaiko mã'ẽ. Nokuwai Janejare'e kupa, ajawyi. 2 Eremiau kõ, age'eve tesõ ijãkarã kõ rõmõ jaikopa jaiko. Nijakuwaive manyvotà janerekoa rã. Ajamã'ẽ kee sikuwapa. Jesu uu mijẽ ojisaoka remẽ tè katu jamã'ẽ gatutà ee ky'y. Ivo jẽ jaikotà ãmẽ. A'evoa sikuwapa. 3 Jesu vãea 'arà jaãrõ remẽ, jajireko katutà ivo e'ãa wyi ãmẽ. “Ãwitõ nuvei Jesu rè ivo e'ãa, tãwĩvo jaiko”, ja'età.4 Nivoi sõ jaiko ipi remẽ, jajavytà Janejare'e rekoa ipi. Ijayvukasia sijavytà teve. A'evoa pè nivoi mã'ẽ eu.
5 Pekuwa Jesu uu janeaiwererà reityoka janewyi. Pekuwa teve nuvei 'eteay ijaiwererà ee. Nojavyi 'eteay teve Janejare'e rekoa. 6 Eevejẽ jaiko remẽ, nijamoane'e'ãi janeaiwererà ereko ipi. Ojimoane'e jẽ ee mã'ẽ, nokuwai Jesu mã'ẽ tè a'e. Nomã'ẽi ee mã'ẽ tè.
7 Ajawyi kee a'e pejẽ, eãkarãgwerà kõ. Tapejimoripeoka e'ã ikõ nẽ. Ivoa rupi ekoi mã'ẽ ivo katu ekoi ipi. Ãwitõ Jesu Kiristu ivo katu ekoi, ãwĩvo. 8 Ojimoane'e jẽ ivo e'ãa rupi ekoi mã'ẽ ãjãgai rõvijã rekoa rupi tè ekoi ipi. Yvy jinõ ypy remeve ãjãgai rõvijã nivoi ekoi mã'ẽ teãmã. Aekwerà ve ekoi age'e remẽ. Ajawyi Janejare'e Ra'yry uu ike yvy pè remẽ, ãjãgai rõvijã manyvo poroereko mã'ẽ omomatà jane wyi ky'y.
9 Janejare'e ãkarã kõ ekoa rupi katu tè ekoi ipi. Nojimoane'e'ãi nivoi tekoua rè kupa ipi, Janejare'e 'Ãg ipy'a kõ pupe ekoi rewarà mõ. Ivo e'ãa rupi noikoi kupa, Janejare'e ãkarã kõ tè rewarà mõ. 10 A'evo Janejare'e ãkarã kõ ojikuwa ipi. Ãjãgai rõvijã remĩgwai kõ teve ojikuwa. Ivo e'ãa rupi kõrijõ tè ekoi kupa ipi. Jesu koty rewarà kõ noaui kupa ipi. Janejare'e ãkarã rõwã a'evo ekoi mãe kõ ãmẽ. Ãjãgai rõvijã remĩgwai kõ tè a'evo ekoi mãe kõ.
“Tijajiauvay ojeeve jaiko”, e'i mã'ẽ
11 Pejirovija ypy Jesu rè remẽ, peenupa manyvo tijaiko. “Pejiauvay ikõ peiko ipi nẽ”, e'i mã'ẽ.a 12 Tãmõ Atão ra'yry Kãi reruparà mõ tijaiko e'ã ky'y. Nivoi mã'ẽ rõvijã rekoa rupi ekoi mã'ẽ tè itõkõ Kãi. Noaui omõmirĩ mã'ẽ tè a'e. Ojikõ'õ ee wyi ojuka omõmirĩ. Ivo katu imõmirĩ ekoi wyi ojuka.b
13 Ajawyi kee a'e pejẽ, eretãrãgwerà kõ. Noerovijai Janejare'e mãe kõ ojikõ'õ pene remẽ, “Manyvo rewarà mõ põkõ ojikõ'õtà ere?” tapejẽ e'ã. Ekoa teãmã kupa.c
14 Na'evoi jane ãmẽ. Jesu koty rewarà kõ siauvay ipi. Jypy remẽ janereko ai rupi kõrijõ tè jaiko remẽ, jane'ãg omãnõ mã'ẽ vo 'ejẽ Janejare'e kyty jaiko mijã. Ajaire Jesu rupi jane'ãg uve mijẽ. Ajawyi janereko pyau nopa'ãi mã'ẽ rõmõ tè jaiko ky'y. A'evo sikuwa jajiauvay remẽ. Nijajiaui sõ remẽ omãnõ mã'ẽ vo 'ejẽtà jaiko.d 15 Ava mõ sõ Jesu koty rewarà mõ rè ojikõ'õ remẽ, “Mirà jukaarerà tè ãwĩ”, e'i Janejare'e ijupewarà mõ. “Ojipy'amogeta ai rupi mirà ojuka”, e'i. Pekuwa apijarà noiko karuaru'ãi ipyri.e 16 Jesu Kiristu janerauvay wyi janeupewarà mõ tè ekoi jẽ iko. Ajaate omãnõ janeupewarà mõ. Ãwĩvo kuwa ve janevoarà kõ sireko. Jaauvay kõ. Ijupewarà kõ mõ tè jaiko. Jaauvay karuaru kõ ajaate jamãnõ pe'ĩ. 17 Ma'e. Ãmõ, imoma'e ywete ipe mã'ẽ sõ omã'ẽ iporijau mã'ẽ rè remẽ, toporijauesa. Noporijauesai sõ remẽ, manyvo noiko'ãi Janejare'e ayvu rupi oiko rõmõ! A'evo mã'ẽ wau rã'ãga tè Janejare'e. Oporegeta rupi tè wau rã'ãga ipi. 18 Ãwĩvo rõwã jaiko, eãkarã kõ. Janeporegetaa rupi kõrijõ tè rõwã jaau ipi. Aje ywete Janejare'e tijaau ipi. Ãmõ, jane kõ ve aje ywete tijaau iporijauesa kõ ipi.
“Nijajinõsĩ'ãi Janejare'e rovake”, e'i mã'ẽ
19 A'evo poroporijauesa mã'ẽ rupi jaiko remẽ, jakuwa aje ywete mã'ẽ rupiwarà tè jane. Nijajinõsĩ'ãi Janejare'e rovake ãmẽ. Janemopiryvypy katutà japoregeta ijupe remẽ. 20 Nivoi jaiko remẽ, janepy'a pewarà nivoi mã'ẽ omo'y maevo sõ tite janere ipi. “Nivoi neiko!” e'i janeupe, janepy'a pupe. Kee ja'e ãmẽ: “Janejare'e okuwa teãmã epy'a pewarà. A'e rovake ajimome'utà, teporijauesa. A'e ywesõ ikasi epy'a mopiryvypy katua rè”, tija'e ijupe. 21 Ajawyi kee a'e pejẽ, eremiau kõ. Nijajipy'amogetai janeaiwererà mõ rè jajimopirai remẽ, nijajinõsĩ'ãi Janejare'e rovake. Janepy'akasità japoregeta ijupe ãmẽ. 22 Pirujẽ japoranu ijupe mã'ẽ ome'ẽ jane ipi, ijayvu rupi jaiko remẽ, emimota rupi jaiko rewarà mõ.
23 Kee e'i janeupe Janejare'e manyvo tijaiko: “Era'yry Jesu Kiristu rè ikõ tapejirovija ipi nẽ”, e'i. Kee e'i teve: “Pejiauvaya ikõ ojee peiko nẽ”, e'i teve. Ãwitõ Jesu aepo e'i ike yvy pè ekoi remẽ, ãwĩvo ve Tuu e'i jane. 24 Janejare'e rekoa rupi jaiko remẽ, eevejẽ jaiko ipi. A'evo ve Janejare'e janerevejẽ ekoi ipi. O'Ãg omurokapa inõ janepy'a pupe. Ajawyi jakuwa janerevejẽ ekoi mã'ẽ, i'Ãg tè aepo omojikuwaoka janeupe rewarà mõ.