“Jesu janemokasi tijajirovija jẽ ee”, e'i mã'ẽ
5
Janejare'e Remimuurerà tè Jesu Janerõvijã ywete rõmõ. Aja pè, “Õ'õ aje”, ja'e remẽ, Janejare'e ãkarã e'e rõmõ jaiko jane. Aje Janejare'e jaauvay remẽ, ijãkarã kõ ve jaauvay ipi. 2 Janejare'e jaauvay remẽ, ijayvu rupi jaiko teãmã. Ãmẽ jakuwa ijãkarãgwerà kõ ve jaauvay. 3 Janejare'e wauvay mã'ẽ ijayvu rupi ekoi ipi, “Pejiauvay ikõ ojee peiko nẽ”, e'i maekwerà rupi. Niwaypei ijayvu rupi tekoua janeupe, [ijãkarãgwerà kõ rõmõ jajiauvay jaiko remẽ]. 4 Ijãkarãgwerà kõ rõmõ janekasi noerovija tari mãe kõ rè ipi, oityoka ipe Janejare'e rè jajirovija mã'ẽ janeupe kupa remẽ. Jesu rè jajirovija rewarà mõ tè nikasi'ãi ãwĩ rapijarà kõ janeupe ipi. 5 Janevote rõwã janekasi noerovijai Janejare'e mãe kõ rè ipi. “Aje, Janejare'e Ra'yry tè Jesu”, ja'e remẽ tè janekasi. Ajawyi Janejare'e noerovijai mãe kõ noityokai sire'e Jesu rè jajirovija mã'ẽ janeupe.Temikuwa Jesu Kiristu
6 Jesu Kiristu uu ojimojane ojikuwa remẽ. Yy pè rã'ĩ ojimojãmorĩoka Janejare'e remimota rupi, oposiko ypy remẽ. A'evo ekoi remẽ ojikuwa Janejare'e Ra'yry rõmõ. Ajaire omãnõ remẽ, ipirà pe wyi oẽ wyykwerà. Janejare'e Ra'yry rõmõ teve a'evo ekoi. Ãwitõ ojimojãmorĩa rupi ojikuwa Janejare'e Ra'yry rõmõ, ãwĩvo ve omãnõa rupi ojimojikuwa teve. Janejare'e 'Ãg tè omojikuwaoka Wa'yry rõmõ. A'e aje ywete mã'ẽ kõrijõ tè omojikuwaoka ipi. 7 Kee Jesu ojikuwa Janejare'e Ra'yry rõmõ. 8 I'Ãg omojikuwaoka tojikuwa.a Ãmõ, ojimojãmorĩokaa rupi teve ojikuwa.b Ãmõ, omãnõa rupi ojikuwa.c Ãwĩ ãwĩ kõ rupi Jesu ojikuwaoka Janejare'e Ra'yry rõmõ mã'ẽ. Moapy rõmõ tesõ omojikuwaoka.d 9 Janejare'e tè omojikuwaoka Wa'yry. Ajawyi “aje ywete” taoty ijupe ipi. “Iwarite” nija'ei jane kõ remimojenuwerà pè ipi. “Aje ywete Janejare'e remimojenuwerà tè” ja'e kõrijõtà tè. Kee e'i itõkõ Janejare'e remimojenuwerà: “Era'yre'e tè ãwĩ”, e'i. Ajawyi tijarovija ikõ ãmẽ ipi nẽ. 10 Jajirovija Janejare'e Ra'yry rè remẽ, jakuwa aje ywete a'evoa ipi. Janepy'a pupe jakuwa, Janejare'e 'Ãg tè omojikuwaoka janeupe rewarà mõ. Ajamã'ẽ Janejare'e noerovijai mãe kõ, “Ãnĩ. Janejare'e Ra'yry rõwã Jesu”, e'i kõrijõ tè kupa ipi. “Iwarite Janejare'e e'i”, jaa tè aepo e'i mã'ẽ, a'e yveve “Era'yry tè Jesu”, e'ipa rewarà mõ. 11 Kee jaa Janejare'e omojikuwaoka janeupe. Ta'yry rè jajirovija remẽ tè kuwa tekoua pyau ome'ẽ janeupe mãerã upi tijaiko.
12 Janejare'e Ra'yry rè jajirovija remẽ tè mãerã tè eeve jaikotà jaiko. Nojirovijai ee mãe kõ ãmẽ noiko'ãi ipyri.
Kareta moawyjepaa
13 A'evoa akusiwa pejẽ, Janejare'e Ra'yry rè pejirovija mãe kõ rõmõ. Akusiwa pemokasia pè ajupa, tapekuwa Janejare'e pyryvo peiko karuarutà. 14 Nijajinõsĩ'ãi Janejare'e rovake ipi. Moma'e mõ jaokwai ijupe remẽ, wenu jẽ ipi. Emimota rupi jaokwai remẽ, ome'ẽtà janeupe ipi. Janejare'e wenutà janeayvu. 15 Sikuwapa teve Janejare'e wenu janeayvukwerà moma'e siokwai ijupe remẽ upi upi. Ajawyi sikuwa ve ome'ẽtà janeremikwaiwerà janeupe ipi.
16 Ajawyi kee tapeiko. Pemã'ẽ sõ Jesu koty rewarà mõ rè nivoi ekoi remẽ, tapeporegeta Janejare'e pè ijupewarà mõ ipi. “Eityoka ijaiwererà ijupe tojimokãjã e'ã newyi”, tapejẽ ijupe. Janejare'e wenutà aepo pejẽ remẽ. Ajamã'ẽ ava mõ sõ awyje ojimoãpã ywe'e tite Janejare'e rè remẽ, Janejare'e noenu'ãi japoranu ipe ijupewarà mõ remẽ. Omoisyry amãtejẽtà owyi ãmẽ. Ovote ojimoai ãwĩvo remẽ. Nojivy'ãi Janejare'e kyty ãmẽ ky'y. A'evo mã'ẽ pewarà mõ rõwã tapeporegeta ajamã'ẽ Janejare'e pè. 17 Janejare'e rekoa jajavy remẽ, janeaiwererà jareko jẽ ãmẽ janereve ipi. Ajamã'ẽ nijajimoãpãi Janejare'e rè remẽ, Janejare'e oityoka jẽtà janeaiwererà janewyi janemoigo karuaru opyryvo janerereko ipi. Ãmõ, janeãgyo kõrijõ janeaiwererà rè remẽ. [Ajawyi Janejare'e pè nojimoãpãi mãe kõ pewarà mõ tapeporegeta jẽ ijupe ijaiwererà toitypypyipaoka iwyi kõ ipi, a'e pejẽ.]
18 Sikuwa Janejare'e ãkarãgwerà kõ nojimoane'e'ãi ojimojaiwe iko ipi. Janejare'e Ra'yry wereko katu kõ a'evo toiko e'ã kupa ipi. Ajawyi nivoi mã'ẽ rõvijã nikasi'ãi ãmẽ ee kõ ky'y. Nomoane'e kõ okai sire'e.
19 Sikuwa Janejare'e ãkarãgwerà kõ tè jane, Jesu rè jajirovija mãe kõ rõmõ. Na'evoi Jesu rè nojirovijai mãe kõ. A'e kõ nivoi mã'ẽ rõvijã po pè ekoi.
20 Kee aje ywete ipi. Janejare'e Ra'yry uu ike yvy pè janemotekokuwaarà rõmõ. A'e Janejare'e omojikuwaoka janeupe. Ajawyi Janejare'e revejẽ jaiko ky'y. Ta'yry Jesu Kiristu revejẽ teve jaiko. Janejare'e ywete Jesu omuroka yvy pè tojimojane. Janemoigo karuarutà Janejare'e pyryvo mã'ẽ tè. A'evoa sikuwapa.
21 [Janejare'e rõmõ'ĩte jamoe'e ipi, eãkarã kõ.] Ajawyi tapejireko katu ikõ ijarà rã'ãga kõ wyi nẽ, a'e pejẽ.
[Awyjepa eayvu amojenu ky'y, eãkarãgwerà kõ.]