Janejare'e moe'ea retã rewarà
9
Karamoe remẽ Janejare'e oporegeta tãmõ Moisesi pè remẽ itõkõ, “Kee tapereko emoe'e pekupa”, e'i ijupe. “Kee tapeinõ emoe'ea retã”, e'i teve ijupe. A'evo Moisesi kõ wereko inõ ãmẽ. Opo pupe tè oinõ kupa.a 2 Tetã oinõ kupa. Tetã wyry pè ikwarà kyty ovaokena kupa, kamisa ijanamu mã'ẽ pupe. Ãmẽ kamisa kyvo kytywarà pè “Janejare'e moe'ea retã” eu. Moma'e kõ iteetejẽ oinõ kamisa kyvo kytywarà pupe kupa. Kejõ oinõ kupa. Turi rã'ãga'y. Ãmõ, meju rena, meju Janejare'e pè temime'ẽ reve. Mokopejõ oinõ kamisa kyvo kytywarà pè kupa. 3 Ãmẽ kamisa kupe kytywarà pè “Janejare'e tui upa mã'ẽ” eu. “A'e ywesõ ikatuay wete mã'ẽ” eu teve. 4 A'e pè iteetejẽ oinõ teve kupa. Kejõ oinõ kupa. Jamoeny tipije katu mã'ẽ rena oinõ kupa. A'e rova'arà rupi omoaty yvy karakuri kupa maekwerà. A'e 'aryvo omoeny inõ Janejare'e rovake kupa ipi. Ãmõ, Janejare'e ayvukwerà rena oinõ kamisa kupe kytyre kupa. Takuru pee rè ojikusiwa mã'ẽ rena tè a'e. A'e rova'arà rupi teve omoaty yvy karakuri kupa maekwerà. Ãmõ, a'e ena pupe tãmõ Arão pytukwerà oinõ amãtejẽ kupa. Kõitokõ Janejare'e oowerà oinõ pytu rè maekwerà. Ãmõ, mãnã kure kurerà kõ rena oinõ amãtejẽ ipupe kupa. Yvy karakuri jimoãtãgwerà a'e mãnã kurerà rena, warypy vo mã'ẽ ajamã'ẽ. A'e a'e kõ Janejare'e ayvukwerà rena pupe oinõ amãtejẽ kupa. Oovapy ajaire tatui kupa. 5 Kee oinõ amãtejẽ ovapyka rova 'aryvo kupa. Yvapewarà ipepõkã mãe kõ vo sõ tite i'aryvo oinõ kupa, kerupĩ eu ijupe mãe kõ. Ojipepõkãmira ojiõvaisĩ kupa. Mõrijõ kupa. [A'e yvy karakuri jimoãtãgwerà kõ tè.] Janejare'e ekoi mã'ẽ mojikuwapa tè ãwĩ kõ. A'e põ'õgwery pe wyi tè Janejare'e “awyjepa” e'i jane kõ aiwererà kõ pewarà mõ. A'evo Janejare'e ayvukwerà rena rovapyka. A'e a'e itõkõ kamisa kupe kytywarà pè oinõ kupa, Janejare'e tui upa mã'ẽ pè. A'e rewarà pe'ĩpe'ĩ tè amome'u ajamã'ẽ tapeja'a ee. Namome'upa'ãi ajamã'ẽ.b6 A'evo 'evo ojinõ maire itõkõ Janejare'e pè oporegeta mãe kõ oposiko Janejare'e moe'ea retã wyry pè ipi. Kee ekoi kupa ipi. Kamisa kyvo kytywarà pè oike ike py'y py'yi Janejare'e moe'e kupa ipi. Turi rã'ãga omoeny kupa ipi.c Wãisõ ekoi kupa. Noikei ajamã'ẽ kamisa kupe kyty kupa ipi. Kyvo kytyre kõrijõ tè oike ike kupa ipi. 7 Janejare'e pè oporegeta mãe kõ rõvijã wasu kõrijõ tè kamisa kupe kytyre oike ipi. Pe'ĩgà. Noike py'yi ajamã'ẽ ipi. Kwaray upi upi kõrijõ tè oike rã'ĩ tè ipupe ipi. Ãmẽ oiketà remẽ, teima ruwykwerà weraa ena pupe eroike ipi. Noikei teima ruwy e'ãte ipi. A'e teima ruwykwerà omopepei Janejare'e ayvukwerà rena 'aryvo erokwa ipi. Omopepei remẽ, kee e'i ipi: “Janejare'e, orojavy sikaepo neayvukwerà ipi, ije, ãmõ, eretãrãgwerà Isaeu kõ pirujẽ. Ajawyi aã teima ruwykwerà aeru oreaiwererà repykarà ra'upa rõmõ”, e'i ipi.
8 A'evoa rè jaja'a remẽ, Janejare'e 'Ãg janemotekokuwa kee tija'e. A'evo jẽ wereko Janejare'e moe'e kupa remẽ, manyvo nija'e'ãi kuwa Janejare'e pyri'ĩje'ẽ imoe'e ipi. 9 Ajawyi sikuwa Janejare'e pè temime'ẽ rã nijanepy'amokatu kuwa'ãi ipi. Nijanepy'amopiryvypy katu kuwa'ãi teve ipi. Teima ruwykwerà Janejare'e pè jame'ẽ ipe remẽ, aekwery vo jẽ jaiko, japota ipe imoe'e remẽ.
10 Kee ekoi Moisesi remikusiwarerà rupi ekoi mãe kõ ipi. Wekoa rupi ojimi'u ipe Janejare'e morya rõmõ kupa ipi. Ãmõ, ojipiky'a'o ipe teve kupa ipi. [Ãmõ, oparapi kõ okusu katu ipe teve kupa ipi.] “A'evo jaiko remẽ teipõ, nijaneky'a'ãi Janejare'e pè ipi”, e'i tite kupa ipi. Opirà rova'arà pè kõrijõ tè aepo e'i kupa ipi. Ajamã'ẽ ipy'a kõ pupe iky'a jẽ, ojavy jẽ Janejare'e ayvukwerà kupa ipi rewarà mõ. A'evoa noky'a'o'ãi janepy'a ipi. Ajawyi a'evoa rupiwarà kõrijõ tè nikasi 'ete janeaiwererà moje'oa rè ipi.
Ajaate Janejare'e janepy'aky'a'oa e'e oinõ ky'y. 11 Kiristu oike Uu pè oporegeta katu mã'ẽ rõmõ remẽ, tetã teminõgwerà wyry pè rõwã oike. Ike yvy pewarà wyry pè rõwã oike. Aje ywete, Uu rena e'e pè tẽ tesõ oike, yva pè. A'e pe wyi oja'a janere Uu rovake ipi. Ikatuay Tuu janerereko ãmẽ ky'y. 12 Oike Uu pyri remẽ, awyje jẽ Uu pyri ekoi. A'e pè janeaiwererà omoepypa ky'y. Janeaiwererà omoje'opaoka janewyi. Teima jukaa pupe rõwã janeaiwererà omoepypa. Pui ra'yru jukaa pupe rõwã. So'o rã'ãga jukaa pupe rõwã teve. Ajawyi teima kõ ruwykwerà rõwã weraa ime'ẽ janeaiwererà repy rõmõ. Owykwerà tẽ tesõ weraa maevo sõ tite Uu pè ime'ẽ. Oypa janeaiwererà repyka ãmẽ ky'y.
13 Na'evoi Moisesi remikusiwarerà rupi ekoi mãe kõ, teima kõ ojuka ime'ẽ mãe kõ. A'e kõ kee kõrijõ wereko wetãrãgwerà kõ ipi iky'a'o. Teima ruwykwerà pupe kõrijõ wapirei kõ. Ãmõ 'arà mẽ so'o rã'ãga ruwykwerà pupe wapirei kõ. Ãmõ 'arà mẽ pui ruwykwerà pupe. Ãmõ remẽ pui ra'yru kaiwerà ku'ikwerà omopepei ee kõ. A'evo ipe wetãrãgwerà kõ wereko kupa ipi. Ajawyi tè niky'ai maevo sõ tite Janejare'e pè ipirà rova'arà rupi kupa. 14 A'evoa rupi rõwã Kiristu janerereko janeky'a'oa rè. Janepy'a pewarà tẽ tesõ oky'a'o omãnõa rupi, owykwerà rupi. Ojime'ẽ Janejare'e pè omãnõ janeupewarà mõ. Nuvei 'ete ijaiwererà ee mã'ẽ rõmõ a'evo ekoi. Janejare'e 'Ãg oiko karuaru mã'ẽ kasia rupi a'evo janerereko. A'evo awyje Janejare'e oiko jẽ iko mã'ẽ remimota rupi jaiko ky'y. Imoe'earà kõ rõmõ jaiko ky'y. Ajawyi teima kõ jukaa rè nijaja'ai jaiko ky'y, manyvoa rã rõmõ rõwã a'evoa rewarà mõ.
Janereko pyaukwerà rewarà
15 Kiristu omãnõ janeupewarà mõ remẽ, oypa janeaiwererà repykwerà ky'y. A'evoa rupi janereko pyaukwerà ojiãparõ jane. “Janejare'e pyri'ĩje'ẽ tekou karuarua”, jaa tè Jesu mãnõa. Janejare'e janepyteporopa opyriwarà kõ rõmõ tijaiko karuaru. Kee e'ipa Janejare'e jane:
– Poromomoioka peaiwererà wyi. Ajawyi pejotà epyri peiko karuaru rõmõ ky'y, e'ipa jane.
Janejare'e ayvukwerà tãmõ Moisesi pè okusiwaoka maekwerà rupi jaiko remẽ, noyi janeaiwererà repykarà ipi. Ajawyi manyvo nisireko'ãi janevote janeaiwererà itypypyipa janewyi mijã. Kiristu tè omãnõa rupi tè oitypypyipaoka kõ janewyi ky'y.
Okãjãma mãe kõ rè tè poromosã'ãga mã'ẽ
16-17 Okãjãma mãe kõ ma'ekwerà mosãia rè tè poromosã'ãgatà. Kee eu amãtejẽ ipi: “Kee tapemosãi ema'ekwerà kõ erenawery pè”, eu. Ajawyi aekwerà rupi katu a'evo jareko kãramõ ipi. Ava mõ okãjã remẽ, jarovija ijayvukwerà ipi. Ima'ekwerà kõ jamosãi ijayvukwerà rupi ipi. Uve jẽ remẽ, nijamosãi'ãive ima'e kõ. Okãjã remẽ kõrijõ tè jamosãi ipi. Ikãjãa tè wãrõ rã'ĩ kupa. Aja paire tè ima'ekwerà jamosãità ky'y. 18 Ãwĩvo ve karamoe remẽ Janejare'e werekotà janerãmõi kõ oupewarà kõ rõmõ remẽ, tãmõ Moisesi tojukaoka rã'ĩ weima kõ mõ. A'e ruwykwerà wenõe imãnõawerà kõ mojikuwaparà rõmõ kupa. A'evo remeve Janejare'e wereko ypy kõ wemĩgwai kõ rõmõ ky'y. 19 Janejare'e omo'eoka wayvukasia Moisesi pè ikusiwaoka. “Kee tapeiko eremĩgwai kõ rõmõ”, e'i Janejare'e maekwerà. Ajaire a'e rupi ekoi ypy kupa remẽ, Moisesi pirujẽ omojenu rã'ĩ, ãwisõ manyvo tekoua tokuwa kupa. A'evo paire tè pui ra'yry kõ ruwykwerà oinõ ena pupe. So'o rã'ãga ra'yry kõ ruwykwerà teve oinõ. Yy pupe omo'y rã'ĩ. Ajaire kaneiru raawerà temimopirãgwerà wãpasĩ jai rè.d A'e omõsõ rã'ĩ moma'e ruwykwerà pupe yy revewarà pupe. A'e kaneiru raawerà pupe omopepei Janejare'e ayvukwerà kareta rè ojikusiwa mã'ẽ rè. Jane kõ rè teve omopepei erokwa. 20 Ãmẽ Moisesi kee e'i tãmõ kõ pè, Isaeu kõ pè:
– Age'e Janejare'e janererekotà oupewarà kõ rõmõ. Tijajireko katu ajawyi, ijayvukasia rupi katu tijaiko, e'i ijupe kõ. Pemã'ẽ aã teima ruwykwerà rè esa. Aã rupi Janejare'e omojikuwaoka wayvukwerà janeupewarà mõ. “Awyje a'e rupi janererekotà oupewarà kõ rõmõ”, eu mã'ẽ mojikuwaparà rõmõ, e'i ijupe kõ.e 21 A'evo ve Janejare'e moe'ea retã rè omopepei erokwa kupa, ojiãparõ remẽ. Teima ruwykwerà omopepei ee kupa. Ipupewarà kõ rè ve omopepei erokwa, “Awyje Janejare'e pewarà kõ aã tetã pewarà kõ”, eu mã'ẽ mojikuwapa. 22 A'evo tekoua rupi katu tekou ipi. Janejare'e pè oporegeta mãe kõ wetãrãgwerà kõ pewarà mõ tè oporegeta Janejare'e pè remẽ upi upi teima ruwykwerà oporu kupa ipi, imãnõawerà mojikuwaparà rõmõ kupa. Janejare'e ayvukasia rupi a'evo ekoi kupa. Omãnõ teima wyi Janejare'e “awyjepa” e'i ime'ẽarerà aiwererà pè ipi. Na'evoi remẽ “awyjepa” ne'i, teima ruwykwerà e'ãte remẽ.
“Jesu mãnõa oypa katu janeaiwererà repykarà mõ”, e'i mã'ẽ
23 A'evo tãmõ Moisesi kõ wereko Janejare'e moe'ea retã, ipupewarà kõ reve. Teima ruwykwerà omopepei ee kõ erokwa ime'ẽ Janejare'e pè. Ãmẽ tè Janejare'e, “Niky'ai eupe”, e'i ijupe kõ ky'y. Opyy ãmẽ ky'y. A'evo a'e tetã rewarà wã'ã Janejare'e rena e'e yvapewarà rewarà.f Janejare'e rena e'e pè ãmẽ teima ruwykwerà nikasi ijupe temime'ẽ rõmõ. 24 A'e pupe tè Kiristu oike ky'y. Yvy pewarà tetã pupe rõwã oike. Uu rena pupe tẽ tesõ oike ky'y, yva pewarà pè tè. A'e pè Uu pyri wyi oja'a janere upa. 25 Kiristu noike py'y py'yi. Pe'ĩ'ate ojime'ẽ remẽ, oypa imãnõawerà janeaiwererà repykarà mõ. Na'evoi ike yvy pè Janejare'e pè oporegeta mãe kõ. Noyi emime'ẽgwerà kõ ipi. Ajawyi nopi 'ete ime'ẽa wyi kupa ipi. Ajawyi a'e kõ rõvijã wasu oike ike jẽ kamisa kupe kytyre ipi. Kwaray upi upi tè oike ipi. Oike remẽ upi upi teima ruwykwerà weraa imojikuwaoka mijẽ Janejare'e pè ipi, “awyjepa” te'i ijaiwererà kõ pè ipi. A'evo rõwã Jesu. Oypa katu imãnõawerà. 26 Noyi sõ remẽ, omãnõ py'yi jẽ kuwa mijã. Yvy jinõ ypy remeve, omãnõ ypy kuwa rã'ĩ mijã. Ajaire omãnõ mijẽ kuwa ekovijarà rõmõ. Nopa'ãi kuwa a'evoa. Ajamã'ẽ na'evoi. Oy tè imãnõawerà. Ajawyi karamoe remeve rõwã omãnõ. Janereko remẽ tè omãnõ. Pe'ĩ'ate imãnõa. A'evoa rupi omoepypa amãtejẽ janeaiwererà ky'y. Awyjepa ãmẽ ky'y.
27 Jane ve pe'ĩ'ate tijakãjã ipi. Awyje jẽ jakãjã jaa ipi. Jakãjã maire, Janejare'e janemoe'yità. 28 Ãwĩvo ve pe'ĩ'ate Kiristu omãnõ, ojime'ẽ mirà kõ aiwererà repy rõmõ remẽ. Pe'ĩ'ate amãtejẽ ojime'ẽ. A'evo oypa mõa'ãrõwã mirà kõ aiwererà repyka. Kãramõ uu tarà mijẽ. Mirà kõ aiwererà rè rõwã uutà ky'y. Wãrõarerà kõ pijarà mõ tè uutà ky'y. Ãmẽ sõsi janereraatà wena kyty opyri tijaiko karuaru ky'y.
[Ajawyi tapejirojivy e'ã aekwerà kyty, a'e pejẽ.]