10
Tãmõ Moisesi remikusiwarerà rupi ekoi mãe kõ nokuwai Janejare'e poroereko katu mã'ẽ ipi ajamã'ẽ. Okuwa ipe sõ kupa mijã. Nokuwai Kiristu mãnõa rupi javãe kuwa Janejare'e pyri mã'ẽ kupa. Tãmõ Moisesi ayvu rupi ekoi mãe kõ, “Noyive janeaiwererà repykarà”, e'i tite kupa ipi. Ajawyi weima kõ weru eru tè jẽ ijuka kupa ipi. Kwaray upi upi a'evo ekoi kupa ipi. Opota ipe Janejare'e pyri'ĩje'ẽ ovãe kupa remẽ, manyvo noereko'ãi kupa, teima jukaa noyi ijaiwererà kõ repykarà mõ rewarà mõ. 2 Emã'ẽ. Aekwerà rupi Janejare'e omoe'e ipe kupa. Nojipy'aky'a'oi kupa ajamã'ẽ. Aje ywete ojipy'aky'a'o sõ kupa remẽ, “Awyje Janejare'e eky'a'opa”, e'i kuwa kupa mijã. Aja paire noja'a'ãi kuwa waiwererà kõ rè kupa mijã. Nojuka mijẽ'ãi kuwa weima kõ Janejare'e pè epykarà mõ kupa mijã. Opa kuwa a'evoa mijã. 3 Nopai ajamã'ẽ. Waiwererà kõ rè oja'a jẽ kupa ipi. Ojimopirai jẽ ee kõ kupa ipi. Ajawyi weru tè jẽ weima kõ ime'ẽ Janejare'e pè kupa ipi. Kwaray upi upi a'evo ekoi kupa ipi. 4 Noy'ãi 'ete eima kõ ruwykwerà kõ ijaiwererà repykarà mõ ajamã'ẽ.5-6 Ajawyi Kiristu uutà ike yvy pè remẽ, kee e'i amãtejẽ Uu pè:
“Kee nerei ije: ‘Apota nerima mõ neapy ime'ẽ ije emorya mõ’, nerei ije.
‘Neremitãgwerà rã'ãigwerà mõ eeru ime'ẽ ije’, nerei ije.
Nanerory we'ei a'evoa rè.
A'evoa pè rõwã ‘awyjepa’ eretà jane kõ aiwererà kõ pewarà mõ.
Epirà neinõ eupe, [tajimojane ipyterà kõ pè aiko.]
Jane kõ aiwererà kõ repykarà mõ tamãnõ.
A'evo nepota taiko.
7 Ajawyi tè ‘hoõ’ a'e ene.
‘Neremimota rupi a'evo aikotà ãmẽ’, a'e ene.
A'evo aiko mãe rã rewarà nekusiwaokapa amãtejẽ nekareta rè.
Aekwerà rupi katu aikotà”, e'i amãtejẽ Uu pè.a
8 Kee e'i maekwerà rè tapeja'a: “‘Apota nerima mõ neapy ime'ẽ ije emorya mõ’, nerei ije. ‘Neremitãgwerà rã'ãigwerà mõ eeru ime'ẽ ije’, nerei ije. Nanerory we'ei a'evoa rè. A'evoa pè rõwã ‘awyjepa’ eretà jane kõ aiwererà kõ pewarà mõ”, e'i maekwerà rè tapeja'a. Aepo e'ipa Jesu, tãmõ Moisesi remikusiwarerà rupi ekoi mãe kõ pewarà mõ. 9-10 Ãmõ, kee e'i teve maekwerà rè tapeja'a: “Ajawyi ‘hoõ’ a'e ene. Neremimota rupi a'evo aikotà ãmẽ”, e'i maekwerà rè tapeja'a. Aje, Janejare'e remimota rupi Jesu ekoi ipi. Ojimojane omãnõ janeaiwererà repykarà mõ. Awyjepa epykwerà ãmẽ ky'y. Oitypypyipaoka janeaiwererà janewyi ky'y, awyje mãerã tè ky'y. Ajawyi nijanepy'aky'ai Janejare'e pè ky'y. A'evo Janejare'e omomioka teima jame'ẽ ijupe mã'ẽ ky'y. A'e rekovijarerà rõmõ Jesu Kiristu ojime'ẽma tè ky'y. Awyjepa ojime'ẽ janeupewarà mõ.
11 Ãmõ, Janejare'e pè oporegeta mãe kõ rekoa rè poromoja'aokatà. Teima kõ ojuka py'yi Janejare'e pè ime'ẽ kupa ipi. Kõ'ẽ jawe jawe a'evo ekoi kupa ipi. Nomoepypa'ãi a'evoa pupe jane kõ aiwererà kupa ajamã'ẽ. Ajawyi nawyjepaive iposikoa kõ ãmẽ mijã. 12 Kiristu ãmẽ pe'ĩ'ate ojime'ẽ janeaiwererà repykarà mõ omãnõ. Oypa katu ãmẽ ky'y. Awyje omoepypa. Awyjepa ky'y. A'evo paire wapy Uu pyri upa ky'y, awyjepa iposikoa rewarà mõ. 13 A'e pè wãrõ jẽ ajaate Tuu omoẽokatà ijãpã kõ 'arà kyty. 14 A'evo Kiristu omoepypa katu janeaiwererà. Pe'ĩ'ate omãnõ janeupewarà mõ remẽ oy tè ky'y. A'evo janepy'aky'a'opa. Awyje ivo katu mã'ẽ rõmõ Janejare'e janerereko ky'y. 15 Ajare Janejare'e 'Ãg kee e'i amãtejẽ tijakuwa:
16 “Kãramõ ãmõ rupi tè areko kõtà ky'y”, e'i janeupewarà mõ.
[“Takuru pee rè rõwã ainõtà eayvu ky'y.]
Ipy'a kõ pupe tẽ tesõ ainõtà eayvu ky'y.
Ãmõ, aãkãmotekokuwa kõtà eayvu rè ky'y”, e'i janeupewarà mõ.b
17 Kee e'i teve: “Naja'a'ãi ijaiwererà kõ rè ky'y. Erearaipatà ijaiwererà kõ wyi ãmẽ ky'y”, e'i.c 18 “Awyjepa” e'ipa Janejare'e janeaiwererà kõ pè. Oypa katu epykwerà. [Ajawyi tijajirojivy e'ã aekwerà kyty.]
“Jajimomãatã jẽ Jesu rè jaiko”, e'i mã'ẽ
19 Eretãrãgwerà kõ, kee a'e pejẽ. “Ejo epyri”, e'ipa Janejare'e jane ky'y. “Jesu omãnõ peupe rewarà mõ ejo”, e'ipa. 20 Aje, omãnõ janeaiwererà repykarà mõ maekwerà tè Jesu. Age'e oiko jẽ iko. Kamisa ijanamu mã'ẽ ojiovapyjavo ky'y.d Janejare'e pyri javãe kuwa ky'y, Jesu mãnõa rupi. 21 Uu pè oporegeta katu mã'ẽ tè Jesu. A'e oja'a katu janere, Uu rena pe wyi ipi. 22 Ajawyi ja'e jẽsi Janejare'e pyri jaiko. Janejare'e janepy'aky'a'opa, ãwisõ tijajimopirai e'ã janeaiwererà rè jaiko ky'y. Ãwitõ jajau yy pè remẽ, jajipikusu katu jakupa ipi. Ãwĩvo ve Jesu janepy'aky'a'opa ky'y. Aje ywete tija'e ywe'e jajirovija Janejare'e rè. 23 Janejare'e, “Kee poroerekotà”, e'i janeupe remẽ, wayvukwerà rupi katu janerereko ipi. Temirovija tè Janejare'e. Ajare, “Janejare'e aje ywete a'evotà janerereko”, ja'epa ãmẽ. Ajawyi tijajipykãtã aepo ja'e ijupe maekwerà rè.
24 Ãmõ, kee a'e pejẽ. Tijaja'a katu ojee jaiko ipi. Kee tija'e ojiupe ipi, jajimokasi rõmõ: “Jajiauvay ikõ jaiko ipi nẽ. Jajipãtavõ gatu ikõ jaiko ipi nẽ. Jajireko katu ikõ jaiko ipi nẽ”, tija'e ojiupe jaiko ipi. 25 Jajimoaty jẽ ikõ Janejare'e moe'ea rè jaiko ipi nẽ. A'evo jaiko remẽ, jajimokasità. Ãmõgwerà na'evoi ywe'e tite ky'y. Ajawyi aepo a'e pejẽ. Age'e remẽ ywesõ a'evo tijaiko ky'y, ke'ĩ Jesu ovãe rewarà mõ.
“Tijajimokasi jẽ Jesu rekoa rupi jaiko”, e'i mã'ẽ
26 Sikuwapa Janejare'e ayvukwerà Jesu rewarà aje ywete mã'ẽ. Ava mõ sõ okuwa paire ojimoane'e jẽ ojimojaiwe mijẽ remẽ, ava nomoepy kuwa'ãi ijaiwererà ãmẽ ky'y, Jesu oity ywe'e tite remẽ. Ovote ojimomorijautà waiwererà rè ãmẽ iko ky'y. 27 A'evo mãe kõ ojirova ywe'e tite Janejare'e wyi iko. Ajawyi Janejare'e poromoe'yi remẽ, omono kõtà tojimomorijau tata wasu noei mã'ẽ pupe. 28 Emã'ẽ. Temiporijauesa rõmõ rõwã tãmõ Moisesi remikusiwarerà oity ywe'e tite mãe kõ. Ojirova kõrijõ iwyi mãe kõ. A'evoa rè omã'ẽ mãe kõ tomome'u ãmẽ. Mõrijõ rõmõ tomome'u. Moapy rõmõ teve tomome'u. Aje ywete a'evo remẽ temiau rõwã apijarerà omãnõtà. 29 Tysi tõ Janejare'e Ra'yry tẽ tesõ werõarõ mãe kõ! “Omãnõ tè a'e”, e'i tite mã'ẽ. “Jane kõ aiwererà repykarà mõ rõwã omãnõ”, e'i ywe'e tite mã'ẽ. Janejare'e 'Ãg poroereko katu mã'ẽ oojai teve mã'ẽ. A'evo mãe kõ ywesõ ojimomorijauvaytà Janejare'e po pè! 30 A'evo mãe kõ rè kee e'ipa ikusiwaoka: “Ije tè nivoi mãe kõ rè poroepytà”, e'ipa. Kee e'ipa teve ikusiwaoka: “Janerõvijã ywete omosã'ãgatà oupewarà kõ”, e'ipa.e 31 Emã'ẽ. Ipojy ai tè Janejare'e oiko jẽ iko mã'ẽ po pè jimomorijau wasua.
32 Ajawyi kee a'e pejẽ. Manyvo peiko Kiristu rè peja'a ypy remẽ maekwerà rè tapeja'a, a'e pejẽ. Pejimomorijauvay ipe remẽ itõkõ pejipytaso jẽ ee ãmẽ peiko. Aekwerà vo jẽ tè tapejimokasi jẽ peiko, a'e pejẽ. 33 Ãmõ 'ary pè remẽ itõkõ penojai epe jane kõ rovake Kiristu rè pejirovija remẽ kupa ipi. Ãmõ, pemoai epe kupa remẽ itõkõ pejimokasiay jẽ Jesu rè pejipykãtã rõmõ. Ãmõ, pemã'ẽ temiau e'ã rè remẽ itõkõ pejimoaty jẽ ipyri kõ imokasiarà kõ rõmõ peiko ipi mijã. 34 Jesu koty rewarà kõ mõ omopã'ã kupa remẽ itõkõ pejimomorijau teve ivo kõ jẽ peiko ipi mijã. Pema'e kõ wekyipa pewyi kupa remẽ itõkõ, “hoõ” pejẽ kõrijõ teve ãmẽ ipi mijã. Penory jẽ itõkõ a'evo penereko kupa remẽ ipi mijã. Kee pejẽ itõkõ a'evo remẽ: “Janejare'e erereko katuay wetetà wena pè”, pejẽ kõrijõ tè ãmẽ mijã. “Nopa'ãi erereko katua”, pejẽ kõrijõ ãmẽ mijã. “Erereko katua ywesõ epy wete mã'ẽ vo eupe”, pejẽ kõrijõ ãmẽ. Ajawyi itõkõ penory jẽ kõrijõ peiko ãmẽ. A'evo itõkõ peiko, Jesu rè peja'a ypy remẽ ipi mijã.
35 Aekwerà vo jẽ ikõ tapeiko nẽ, a'e pejẽ. Tapejimokasi jẽ ikõ Jesu rè peiko nẽ, a'e pejẽ. Ãmẽ tè Janejare'e remime'ẽ rã pepyytà epy e'eay rõmõ ãmẽ. 36 Ajawyi tapejipykãtã jẽ ikõ Jesu rè peiko nẽ, a'e pejẽ. Janejare'e remimota rupi katu tapeiko jẽ peiko. Pemomorijau ipe kupa remẽ, tapejimosãtãmy kõrijõ jẽ peiko. Penereko katuay wetetà ãmẽ, wayvukwerà rupi katu. 37 Nipuku'ãi Jesu vãea. Ajare kee e'ipa Janejare'e ikusiwaoka tisikuwa amãtejẽ:
“Ke'ĩ ovãetà. Nipuku'ãi ivãea 'arà.
38 Eremimota rupi ekoi mãe kõ ‘aje’ e'i ojitãrõ ere iko ipi.
Epyri oiko karuarutà iko ãmẽ kupa.
Ajamã'ẽ ereity ywe'e tite mãe kõ rè nerory'ãi”, e'ipa Janejare'e maekwerà.f
39 Japoi ywe'e tite iwyi mãe kõ rõwã jane ajamã'ẽ. Jajirovija jẽ ee jaiko mãe kõ tè jane. Ajawyi ipyri jaiko karuarutà mãe kõ tè jane.