“Jesu ywesõ e'i katu Uu pè oporegeta katu mã'ẽ rõmõ ekoi”, e'i mã'ẽ
8
Kee a'epa pejẽ. Jesu Uu pè oporegeta katu mã'ẽ janeupewarà mõ ipi, a'epa pejẽ. Tuu ywesõ ikasiay wete mã'ẽ rõmõ ekoi. Yva pè ekoi. A'e pyri Jesu ekoi. I'ekatu kyty wapy upa, eevejẽ Jõvijã wasu rõmõ. A'evoa rè ywesõ aã kareta akusiwa ajupa peupewarà mõ. 2 Uu rena e'e pè tẽ tesõ Jesu oikepa. Mirà kõ reminõgwerà pupe rõwã ekoi. Ena e'e pè tẽ tesõ ekoi. Uu pyri tẽ tesõ ekoi ky'y. A'e pe wyi tè oja'a katu janere upa.3 Ãmõ, kee a'e pejẽ. Ikewarà Janejare'e pè oporegeta mãe kõ rõvijã kõ temime'ẽ arã ome'ẽ Janejare'e pè ipi. Ãmõ, moma'e ojuka ime'ẽ ijupe ipi, jane kõ aiwererà repykarà ra'upa rõmõ. Janejare'e pè oporegeta mãe kõ pirujẽ a'evo ekoi ipi. A'evo ekoi teãmã kupa ipi. Ajawyi Jesu ve wemime'ẽ ome'ẽ teve Uu pè oporegeta katu mã'ẽ rõmõ. 4 Ike yvy rupi jẽ sõ ekoi remẽ, Uu pè oporegeta mã'ẽ rõmõ rõwã kuwa ekoi Jesu mijã. Uvepa oporegeta ijupe mãe kõ ike. [Revi jeapyrerà kõ tè a'evo ekoi ipi.] A'e kõ tè wemime'ẽ ãrã ome'ẽ Janejare'e pè ipi. Tãmõ Moisesi remikusiwarerà rupi a'evo ekoi kupa ipi.
5 Kee a'e teve pejẽ. Karamoe remẽ itõkõ Janejare'e kee e'i tãmõ Moisesi pè: “Emoe'ea retã einõoka”, e'i ijupe. “Kõitokõ yvytyrapyte 'aryvo neju remẽ amojisaoka neupe. Aekwerà rupi katu ikõ einõoka nẽ”, e'i ijupe.a A'evo oinõoka remẽ, wena e'e yva pewarà rã'ãga wã'ãoka. Ajawyi jamã'ẽ ee remẽ, jakuwa sa'u manyvo Janejare'e rena e'e yva pewarà. Ãwĩvo ve Revi jeapyrerà kõ Janejare'e pè oporegeta mãe kõ rõmõ oposiko remẽ, Jesu tè sikaepo wã'ã amãtejẽ kupa. [A'e ra'upa teãmã ekoi kupa.] 6 Jesu ywesõ wapyrasa kõ ajamã'ẽ. Ajawyi Janejare'e oinõ oupe oporegeta mã'ẽ rõmõ janeupewarà mõ. A'e ywesõ ikatuay wete. Ãwĩvo ve Janejare'e janererekoa Jesu oinõ mã'ẽ ywesõ ikatuay wete tãmõ Moisesi oinõ maekwerà wyi. Ajawyi wekovijanõ ky'y, Wa'yry Jesu pè. Ãmẽ ywesõ ikatuay janerereko, Janejare'e e'ipa maekwerà rupi katu. 7-8 Aje, Janejare'e ayvukwerà Jesu rewarà wapyrasa ijayvukwerà tãmõ Moisesi rewarà. Nikasi janerãmõi kõ Janejare'e ayvukwerà rerovijaa rè ipi, Moisesi pè okusiwaoka maekwerà. Ajawyi ekovijarerà omojikuwaokapa, tiwaype e'ã jane kõ pè ky'y. Ikatuay wete sõ ijayvukwerà tãmõ Moisesi rewarà remẽ, ekovijarerà ne'i'ãi kuwa mijã. A'evoa rã rè kee e'i amãtejẽ Janejare'e ikusiwaoka janeupewarà mõ:
“Kãramõ ajikuwa tarà mijẽ ekoty rewarà kõ pè.
Ãmõ rupi tè areko kõtà ky'y.
9 Karamoe remẽ itõkõ eayvukwerà amojenu ipe imojikuwa penãmõi kõ pè mijã,
arojisyryoka kõ Ejitu yvy pe wyi remẽ.
Takuru pee rè akusiwa eayvukwerà ime'ẽ ijupe kõ, manyvotà tekoua rè.
‘Hoõ, a'evo oroikotà’, e'i epe ãmẽ kupa.
Ajamã'ẽ noja'ai 'ete itõkõ ere kupa.
Eayvukwerà rè ve noja'ai 'ete kupa.
Ajawyi aitypa kõ rã'ĩ.
10 Ajawyi kãramõ ãmõ rupi tè areko kõtà ky'y.
[Takuru pee rè rõwã ainõtà eayvukwerà ky'y.]
Oterẽ jẽ ame'ẽtà ijupe kõ ky'y.
Ipy'a kõ pupe tẽ tesõ ainõokatà eayvu ky'y.
Ãmõ, aãkãmotekokuwa kõtà eayvu rè.
Ãmẽ sõsi tõvijã wasu kõ rõmõ aikotà ky'y.
A'e kõ ãmẽ eremĩgwai kõ rõmõ ekoità.
11 Pirujẽ ekuwatà ãmẽ kupa ky'y.
Naiko pe'ĩ'ãi nekuwai mã'ẽ mõ ky'y.
Ajawyi noeka'ãi omo'ea rã kupa ky'y.
12 Ãmẽ si naja'a'ãi ijaiwererà kõ rè ky'y.
Erearaipatà ijaiwererà kõ wyi ky'y”, e'i maekwerà.b
13 Aekwerà rupi katu Janejare'e janerereko ky'y, Jesu rupi. Ajawyi noja'ai wayvukwerà tãmõ Moisesi pè e'i maekwerà rè ky'y. Ekovijarerà rè tè oja'a ky'y. Ãwitõ janeremimõjãgwerà mõ ijupa remẽ, ekovijarerà jainõ ipi. Ijupa mã'ẽ ãmẽ jamomo imono ipi. Ipyau mã'ẽ rè tè jaja'a ky'y. Ãwĩvo ve Janejare'e wayvu Jesu rewarà rè kõrijõ tè oja'a ky'y, a'e ywesõ ikatuay wete rewarà mõ.