Meukiseteki rewarà
7
1-2 Poromotekokuwa sa'u jẽtà jõvijã Meukiseteki rewarà rè. Kõitokõ tãmõ Aparão pewarà mõ Janejare'e pè oporegeta maekwerà a'e. Tãmõ Aparão oo ojiapisi rõmõ tõvijã kõ mõ rè remẽ itõkõ, a'e ywesõ i'arà kõ gyty ekoi.a Aja paire ojivy uu wena kyty iko. A'evo remẽ jõvijã Meukiseteki reve ojiõvaisĩ kupa. Jõvijã wasu tè Meukiseteki. Erà pè “Jõvijã wasu ivo poroereko mã'ẽ” jaa tè aepo'i. Sãrẽ taa pewarà rõvijã wasu tè Meukiseteki. Sãrẽ taa pè “nimirai 'ete” jaa tè. Ajawyi poromojimoryoka mã'ẽ tè Meukiseteki. Janejare'e en pè oporegeta katu mã'ẽ teve a'e. A'e ojiõvaisĩ tãmõ Aparão reve kupa remẽ, kee e'i tãmõ Aparão pè: “Janejare'e ikõ ikatuay tanerereko nẽ”, e'i. Janejare'e pè oporegeta mã'ẽ rõmõ aepo e'i tãmõ Aparão pè.A'evo remẽ tãmõ Aparão ma'ekwerà werojivy eru ereko, ãpã kõ opyy eraa maekwerà kõ. A'e oma'ekwerà mõ ome'ẽ Meukiseteki pè. 10 rõmõ ima'e remẽ pe'ĩ wekyi ime'ẽ ijupe. A'evo 'evo ome'ẽ ijupe.b
3 Meukiseteki nijakuwai 'ete eewarà. Tuu nijakuwai. Ijy teve nisikuwai. Tãmõi rerà kõ ve pirujẽ eewarà nisikuwai, nojikusiwai a'evoa kõ kareta rè rewarà mõ. Ãwĩvo ve isakyawerà nisikuwai. Ãmõ, ikãjãawerà ve nisikuwai. Kee jaa kõrijõ tè sikuwa ipi: “Janejare'e pè oporegeta katu mã'ẽ rõmõ ekoi”, ejaa kõrijõ tè sikuwa. Ajawyi a'evo jẽ maevo sõ tite ekoi age'e remẽ. Oiko karuaru maevo sõ tite. Ãwitõ Janejare'e Ra'yry ekoi jẽ mãerã tè, a'evo jẽ maevo sõ tite Meukiseteki ekoi.
4 Jõvijã wasu rõmõ tè Meukiseteki ekoi. A'e ywesõ wapyrasa tãmõ Aparão jõvijã wasu rõmõ, ãwisõ jõvijã wasu rõmõ teve teipe tãmõ Aparão remẽ mijã. Ajawyi ojiõvaisĩ kupa remẽ, tãmõ Aparão oma'e mõ ome'ẽ ijupe. Ãpã weraa maekwerà mõ ome'ẽ ijupe. Ajawyi tè jakuwa Meukiseteki wapyrasa tãmõ Aparão.
5 Kee jaa jakuwa teve. Meukiseteki wapyrasatà tãmõ Revi jeapyrerà rã kõ Janejare'e pè oporegeta katu mã'ẽ rõmõ. Tãmõ Aparão jeapyrerà rõmõtà tè itõkõ Revi jeapyrerà kõ mijã. Kãramõ ijeapyrerà rã kõ Janejare'e pè oporegeta mãe kõ rõmõtà ekoi, wetãrãgwerà rã kõ pewarà mõ.c Ajare tãmõ Moisesi kee okusiwatà Revi jeapyrerà kõ pewarà mõ: “Revi jeapyrerà kõ topyy moma'e kõ mõ wetãrãgwerà kõ wyi ipi, Revi jeapyrerà rõwã mãe kõ wyi. A'e kõ 10 rõmõ ima'e kõ remẽ, pe'ĩ tome'ẽ Revi jeapyrerà kõ pè ipi, Janejare'e pè oporegeta mãe kõ rõmõ ekoi kupa rewarà mõ”, e'i mã'ẽ okusiwa. Aekwerà rupi katu wereko ãmẽ kupa ipi. Tãmõ Aparão jeapyrerà rã kõ pawete a'e kõ ekoità. Ajamã'ẽ a'evo ipe remẽ, tãmõ Revi jeapyrerà rõwã mãe kõ oma'e kõ mõ ome'ẽ jẽ Revi jeapyrerà kõ pè ipi. 6 A'evoa rè kee a'e pejẽ. Tãmõ Revi jeapyrerà rõwã ipe Meukiseteki. Ajamã'ẽ opyy jẽ tãmõ Aparão ma'e mõ. Opyy remẽ, oporegeta Janejare'e pè tãmõ Aparão pewarà mõ, ikatuay Janejare'e toereko. A'evo wereko remẽ itõkõ kee e'ipa Janejare'e tãmõ Aparão pè: “Ikatuay oroerekotà. Nejeapyrerà rã kõ amojikwaoka ywetetà”, e'ipa amãtejẽ a'evo remẽ.
7 Kee jaa sikuwapa. Meukiseteki ywesõ ijayvukasi tãmõ Aparão wyi, a'e tè “Ikatuay Janejare'e tanerereko”, e'i ijupe rewarà mõ. Aepo rapijarerà ywesõ ijayvukasi ipi. Ajawyi jakuwa Meukiseteki ywesõ Aparão wapyrasa.
8 Kee jaa rè tapejipy'amogeta. Ãwitõ tãmõ Revi jeapyrerà kõ Janejare'e pè oporegeta mãe kõ rõmõ ekoi, ãwĩvo ve Meukiseteki ekoi. Ojevo jẽ moma'e mõ opyy jowyi kupa ipi. Ajamã'ẽ okãjãma mãe rã kõ pawete Revi jeapyrerà kõ ekoi. Meukiseteki ãmẽ mãerã tè ekoità. Janejare'e ayvu pè a'evoa rewarà ojikusiwapa. Ajawyi sikuwa Meukiseteki ywesõ wapyrasa Revi jeapyrerà kõ.
9-10 Kee ja'e kuwa teve. Nijãkarãive tãmõ Aparão, ojiõvaisĩ Meukiseteki reve remẽ. Kãramõ tè ijãkarãtà. Ãwĩvo vetà kãramõ iparytà. Ajaate ijeapyretà. Ajawyi oma'e kõ mõ ome'ẽ Meukiseteki pè remẽ, ojeapyrerà rã kõ pewarà mõ teve ome'ẽ amãtejẽ sikaepo ijupe. Ijeapyrerà ipupe tui jẽ. [Ajawyi sikuwa Meukiseteki ywesõtà Revi jeapyrerà rã kõ wyi, ãwisõ ojevo jẽ Janejare'e pè oporegeta mãe kõ rõmõ ekoi epe kupa remẽ.]
“Jesu wapyrasa Revi jeapyrerà kõ Janejare'e pè oporegeta mã'ẽ katu rõmõ ekoi”, e'i mã'ẽ
11 Karamoe remẽ itõkõ Janejare'e wayvu ome'ẽ tãmõ Moisesi pè, manyvo tijaiko ikoty rewarà kõ rõmõ mã'ẽ. A'evo remẽ omoe'yi tãmõ Revi jeapyrerà kõ oupe oposiko mãe rã kõ rõmõ toiko kupa. A'e kõ pytery pe wyi tãmõ Arão wesa oupe oporegeta mãe rã rõmõ toiko, ijeapyrerà rã kõ revejẽ. A'e kõ oporegeta Janejare'e pè wetãrãgwerà kõ pewarà mõ ipi. Ajamã'ẽ nijanereraa kuwai Janejare'e pyri'ĩje'ẽ kupa ipi, nokuwai janeaiwererà moje'oa kupa rewarà mõ. Ajawyi Janejare'e a'evoa wekovijanõ ky'y. Wa'yry omuu oupe oporegeta mã'ẽ e'eay rõmõ toiko ky'y. Omuu remẽ, “Revi jeapyrerà kõ vo rõwã neikotà”, e'i ijupe imuroka. “Ãwitõ Meukiseteki ekoi, ãwĩvotà neiko”, e'i ijupe imuroka.
12 Ajawyi tãmõ Revi jeapyrerà kõ rõwã Janejare'e opota oupe oporegeta katu mã'ẽ rõmõ toiko ky'y. Ovo rupi teve opota ky'y. Wa'yry tẽ tesõ omuroka oupe oporegeta mã'ẽ rõmõ toiko ky'y. Ajawyi wekovijanõ tãmõ Moisesi remikusiwarerà ky'y. 13-14 Emã'ẽ. Janejare'e opota jẽ tè sõ tãmõ Revi jeapyrerà kõ oupe oporegeta mãe kõ rõmõ remẽ, tãmõ Revi jeapyrerà rõmõ omuroka kuwa Wa'yry tisaky mijã. Ajamã'ẽ a'e jeapyrerà rõmõ rõwã isaky. Tãmõ Jutaa jeapyrerà rõmõ tè isaky. Nuvei 'ete tãmõ Jutaa jeapyrerà mõ Janejare'e pè oporegeta mã'ẽ rõmõ mijã. A'e kõ pewarà mõ Moisesi ne'i mijã.
15-17 Oterẽ jẽ oromome'utà tapekuwa katu a'evoa rewarà. Jesu ikasiay wete. Janejare'e pyri'ĩje'ẽ tẽ tesõ janereraa kuwa. Awyje nomãnõ'ãi mãerã tè Jesu, kee e'i ojikusiwa maekwerà rupi katu:
“Neiko karuarutà eupe neporegeta mã'ẽ rõmõ neiko.
Ãwitõ Meukiseteki ekoi, ãwĩvotà neiko”, e'i ijupe.d
Aja rewarà mõ tè Jesu tè Uu pè oporegeta katu mã'ẽ rõmõ ekoi. Tãmõ Moisesi remikusiwarerà rupi rõwã a'evo ekoi.
18-19 Ikatu ipe Janejare'e wayvukwerà tãmõ Moisesi pè okusiwaoka maekwerà. Ajamã'ẽ nijanepy'aky'a'o kuwa'ãi, Janejare'e pyri'ĩje'ẽ tijaike. Nijanepy'amotee kuwa'ãi. Aja rewarà mõ aekwerà wekovijanõ ky'y. Ajawyi sikuwa Janejare'e reve jaiko karuarutà mã'ẽ. Ajawyi Jesu rè jẽsi janerako'i ky'y. A'e tè janereraatà Uu pyri tijaiko karuaru. A'evoa siãrõ jẽ. A'e ywesõ ikatuay janeupe age'e ky'y. [A'e ywesõ ikatuay wete tãmõ Moisesi wyi ky'y.]
20 Ãmõ, aepo a'e maekwerà 'aryvo kee a'e pejẽ. Janejare'e Wa'yry oinõ oupe oporegeta katu mã'ẽ rõmõ remẽ, werà omovy wayvumokasia mõ. Na'evoi Janejare'e wereko mijã, oupe oporegeta mãe kõ oposikoa wãparõ remẽ. Nomovyi werà ywe'e ijupe kõ ipi. 21 Jesu pewarà mõ kõrijõ tè a'evo wereko, [Jesu ywesõ wapyrasa kõ rewarà mõ]. Kee e'i Jesu pewarà mõ maekwerà: “Ije tè Janejare'e rõmõ ka'e eayvukasia rõmõ aiko: ‘Eupe oporegeta katu mã'ẽ rõmõ neiko mãerã tè neiko’”, e'i Tuu ijupe. Aekwerà rupi katu wereko ãmẽ. Nomoteei wayvukwerà, aepo e'ipa wayvukasi rõmõ remẽ.e
22 Aepo e'i maekwerà rupi sikuwa Jesu ywesõ ikatuay tãmõ Revi jeapyrerà kõ wyi iko, Uu pè oporegeta katu mã'ẽ rõmõ ekoi. Ajawyi sikuwa Jesu rupi Janejare'e janerereko mã'ẽ ywesõ ikatuay wete janerãmõi kõ wereko maekwerà wyi.
23 Kee jaa teve sikuwa. Okãjãmatà teãmã mãe rã kõ tè tãmõ Revi jeapyrerà kõ. Ajawyi a'e kõ okãjã 'atà tè kupa. Ajawyi noja'a puku'ãi wetãrãgwerà kõ rè Janejare'e pè kupa ipi. Ekovijarerà kõ tè oja'atà ee kõ ajaire. Ajawyi ijatyray kupa. 24 Jesu ãmẽ nokãjã'ãi mãerã tè. Naekovija mijẽ'ãi. Ajawyi pe'ĩte ekoi. 25 Ajawyi janerereko karuaru. Oja'a karuaru janere Uu rovakeve ipi. Ãwitõ age'e remẽ, ãwĩvo jẽ mãerã tè. Nokãjã'ãi rewarà mõ a'evo janerereko jẽ.
26 Ajawyi ikatuay wete Uu pè oporegeta mã'ẽ rõmõ ekoi. Janepãtavõarà rõmõ ekoi. Uu py'a rupi katu ekoi a'e. Oterẽ jẽ Uu remimota rupi katu ekoi ipi. Nuvei 'eteay ijaiwererà mõ ee. Nivoi jaiko teãmã mã'ẽ vo rõwã ekoi. Ajawyi Janejare'e omoẽoka okoty imono opyri, temimoe'e rõmõ toiko ky'y. 27 Na'evoi tãmõ Revi jeapyrerà kõ Janejare'e pè oporegeta mãe kõ rõmõ ekoi remẽ. A'e kõ nivoi jẽ tè ekoi kupa ipi. Ajawyi moma'e ome'ẽtà wetãrãgwerà kõ pewarà mõ Janejare'e pè remẽ, waiwererà repykarà ra'upa rõmõ rã'ĩ ome'ẽ kupa ipi. Aja paire tè wetãrãgwerà kõ aiwererà repykarà ra'upa rõmõ ome'ẽ kupa ipi. A'evo 'evo ekoi kupa ipi. Na'evoi ãmẽ Jesu ekoi. Nuvei 'ete ijaiwererà ee. Ajawyi janeaiwererà repykarà mõ omãnõ remẽ, awyjepa ky'y. Omoepypa janeaiwererà kõ ky'y. Oy tè epy. Nomãnõ mijẽ'ãi janerepy rõmõ ky'y. 28 Na'evoi tãmõ Moisesi remikusiwarerà rupi Janejare'e pè oporegeta mãe kõ ekoi. A'e kõ ojavy 'ejẽ Janejare'e ayvukwerà kupa ipi. Ajawyi a'e kõ rekovijarerà rõmõ Janejare'e Ra'yry oikepa ky'y. Nojavyi Uu ayvu mã'ẽ rõmõ ekoi. Janejare'e tè a'evoa rõmõ oinõ ijupe. A'evo oinõ remẽ werà omovy wayvukasia rõmõ. Kee e'i maekwerà: “Ije tè Janejare'e rõmõ ka'e eayvukasia rõmõ aiko”, e'i maekwerà. Aepo e'i mã'ẽ pè, “Namotee'ãi eayvukwerà”, ejaa tè. Tãmõ Moisesi pè wayvu omome'u paire tè aepo e'i. A'evo tãmõ Moisesi pè e'i maekwerà wekovijanõ. A'evo sikuwa Uu pè oporegeta katu mã'ẽ rõmõ Ta'yry ekoi mãerã tè jane ky'y.