6
1-2 Jajimo'e ypy Kiristu rekoa rè remẽ itõkõ kee jaa rè jajimo'e ipi: “Tekou teitetea jaitypypyi”, ejaa rè itõkõ jajimo'e ypy. Ãmõ, “Jajirovija ywete Janejare'e rè janerako'i rõmõ”, ejaa rè teve. Ãmõ, “Jajimojãmorĩoka Kiristu koty rewarà kõ rõmõ, awyje jẽ tijaiko upi”, ejaa rè. Ãmõ, “Janerõvijãgwerà kõ opo oinõ janeapyte 'aryvo oporegeta Janejare'e pè janeupewarà mõ ipi”, ejaa rè.a Ãmõ, “Kãramõ Janejare'e omomoeratà okãjãma maekwerà kõ toiko mijẽ”, ejaa rè. Ãmõ, “Kãramõ Janejare'e poromosã'ãgatà poromoe'yità, awyje a'evo toiko kupa. Ãmẽ noerovija tari mãe kõ ojimomorijautà waiwererà kõ rè iko ky'y. Eako'i ee mãe kõ ãmẽ ipyri oiko karuarutà ãmẽ iko ky'y”, ejaa rè itõkõ jajimo'e ypy jaiko. Ajaire jakuwapa remẽ, nijajirojivy mijẽ'ãi aekwerà kyty jajimo'e mijẽ rõmõ, jakuwapa rewarà mõ. Ãmõ rè tè mijẽ, iwasu sa'u mã'ẽ rè tè mijẽ, jajimotekokuwatà jaiko ky'y. 3 A'evo jaiko ãmẽ ky'y. Jajimokasiay aepo jaa rè jajimotekokuwavay ky'y. Janejare'e opota remẽ, a'evo jaikotà.“Jesu rekoa wyi tijajirojivy ywe'e tite e'ã”, e'i mã'ẽ
4 Pejapyaka ikõ eayvu rè nẽ! Iwasu mã'ẽ rè poromotekokuwatà ky'y. Kee a'e pejẽ. Uve mirà kõ mõ Jesu Kiristu rè ojirovija paire ojirojivy mijẽ aekwerà kyty. A'e kõ “aje ywete” e'i Janejare'e ayvukwerà pè mijã. “Ikatuay wete janerereko katua”, e'i kupa mijã. Janejare'e o'Ãg omuu ijupe kõ mijã. 5 Kee e'i teve kupa: “Ikatuay wete Janejare'e ayvu eupe! A'e rupi aikotà!” e'i mijã. Kee e'i teve kupa: “Ikasiay Janejare'e! Tysi tõ kãramõ Jõvijã wasu rõmõ uu remẽ. Ikasiay wetetà iko!” e'i teve mijã. 6 Aepo e'i paire, soõ, oity ywe'e tite kupa ky'y. Ojirojivy mijẽ aekwerà kyty kupa ky'y. Janejare'e Ra'yry ojukaoka maekwerà kõ vo 'ejẽ ekoi kupa ãmẽ ky'y. Oojai jane kõ pytery pè ijayvukwerà renu kupa ky'y. Ojimoane'e jẽ kupa. Kee eu epetà a'evo ekoi mãe kõ pè: “Nekuwa ipe Janejare'e ikatuay. Ajawyi eity neaiwererà. Ekoa rupi tereiko mijẽ”, eu epetà ijupe kõ. “Aje ipo” ne'i'ãi kupa ajamã'ẽ. Waiwererà noitytari kupa ky'y. Awyje noity'ãi kupa ky'y.
7-8 Janejare'e ikatuay janerereko ipi. Wayvu ome'ẽma janeupe ipi. Ajawyi tijaja'a jẽ jajimotekokuwa mõ ee.
Koo rè tè poromosã'ãgatà tapekuwa sa'u. Janejare'e ãmãnà omogyoka janekoo pè ipi, janeremitãgwerà kõ morya rõmõ. I'a katu janeupe ãmẽ, janeposikoa repy rõmõ. Ajawyi janerory ee. Na'evoi joõny rõmõ kõrijõ tè sõ koo ojinõ remẽ. Ãmõ, jaivu rõmõ kõrijõ tè sõ koo ojinõ remẽ. A'evo remẽ jajipy'amopirai tesõ kuwa janekoo rè jamã'ẽ ky'y, manyvo jaa rõmõ rõwã rewarà mõ. Temimojaiwe rõmõtà. Temiapy rõmõtà. Joõny vo 'ejẽ tijaiko e'ã ajawyi.
9 Poroauvay wyi aepo oro'e pejẽ, eretãrãgwerà kõ. “A'evo si!” tapejẽ. “Jesu oity kupa”, noro'ei pejẽ ajamã'ẽ. Norojipy'amopirai pene. Orokuwa Jesu rè peewe katu peiko. Orokuwa ekoa rupi ywesõ pepota peiko, emireko katu kõ rõmõ. 10 Ivo katu Janejare'e poroereko ipi. Omã'ẽ pene, manyvo peiko remẽ ipi. Janejare'e peauvay rewarà mõ itõkõ pepãtavõ gatu Jesu koty rewarà kõ imokasi kõ ipi. Ãwitõ jypy remẽ a'evo peiko ipi, ãwĩvo jẽ age'e remẽ peiko. A'evoa Janejare'e okuwa penewarà. 11 Oropota a'evo tapeiko jẽ, pejãvijõ jẽ, ajaate Jesu ovãe mijẽ remẽ. Ãmẽ tè penoryvaytà ee ovãe remẽ. 12 Ja'ave rõwã tapeiko e'ã, a'e pejẽ. Pejipy jẽ ikõ ee peiko nẽ. A'evo ekoi mãe kõ ikatuay Janejare'e wereko kõtà ipi, wayvukwerà rupi katu.
“Aje ywete Janejare'e wayvukwerà rupi katu ekoi”, e'i mã'ẽ
13-14 Janejare'e “poroereko katutà” e'i jane remẽ, aekwerà rupi katu janerereko ipi. Nijanerako'i pãnẽi ijayvukwerà rè ipi. Ajawyi “aje” tija'e ijayvukwerà pè ipi. Tãmõ Aparão rè tapeja'a. Ãwitõ tãmõ Aparão “aje” e'i ijayvu pè, kee e'i Janejare'e ijupe remẽ: “Ikatuay wete oroerekotà. Amojikwaoka ywetetà nejeapyrerà rã kõ. Eayvukwerà rupi katu a'evotà oroereko”, e'i tãmõ Aparão pè.b Aepo e'i remẽ, kee e'i wayvu mokasia rõmõ: “Aje ywete aepo a'e, Janejare'e tè ije rewarà mõ. Namotee'ãi eayvu mã'ẽ tè ije”, e'i. Janejare'e ywesõ ijayvukasiay janewyi ipi. Nuvei 'ete Janejare'e vo ijayvukasi mã'ẽ. Ajawyi wayvu ome'ẽma amãtejẽ tãmõ Aparão pè remẽ, “aje” e'i Aparão ijupe. 15 Tãmõ Aparão age'e rõwã tesõ wãrõ puku. Ajamã'ẽ noerekoivai ãrõa rè. Eako'i jẽ ee. Ajaate kãramõ ijãkarã Janejare'e ome'ẽ ijupe ky'y. E'i maekwerà rupi katu tè a'evo ekoi.
16 Japota “aje” taoty janeayvu pè remẽ, janewyi wete ijayvukasi mã'ẽ rerà jamovy ipi.c 17 Ãwĩvo ve Janejare'e, “Kee oroerekotà”, e'i jane kõ pè remẽ, werà omovy wayvukasia mojikuwaparà rõmõ. Ajawyi, “Aje ywete a'evo Janejare'e ererekotà”, taoty ipi. 18 Niwari mã'ẽ tè Janejare'e. Ajawyi temirovija teãmã e'i mã'ẽ. Wayvukwerà rupi katu ekoi ipi. A'evo ve werà omovy wayvu mokasia rõmõ remẽ, temirovija teãmã a'e. Ajawyi, “Aje ywete a'evo oroerekotà”, e'i janeupe remẽ, “Aje a'evotà”, tija'e ijupe. A'evoa rè jajimokasi. Janejare'e, “Kee a'età”, e'i maekwerà pè “aje” ja'e. Jaãrõ jẽ ãmẽ, ajaate a'evotà Janejare'e wereko. 19 A'evo jaiko remẽ, yarà jaãpasĩ mã'ẽ vo 'ejẽ jaikotà. Kee. Yarà jaãpasĩ gatu remẽ, nojerai oo ipi. Ãwĩvo ve Jesu pyri janeikoa rã jaãrõ jẽ remẽ, nijaity ywe'e tite'ãi Jesu rekoa ipi. Jaja'a ywete jẽ ee wyi nijaity'ãi ipi. Jajirovijaray jẽ ee. Ãmẽ tè janejipy'amogetaa kõ nitee'ãi. Jesu oopa Uu rena kyty. Uu pyri'ĩje'ẽ tẽ tesõ ekoi ky'y. Ikewarà vo rõwã ekoi ky'y. Ike Janejare'e moe'ea retã yvy pewarà pè, uve kamisa ijanamu mã'ẽ ijokenapa mõ, tijavãe e'ã Janejare'e pyri'ĩje'ẽ mã'ẽ. Yva pè ãmẽ Jesu oopa awyje Uu pyri'ĩje'ẽ iko ky'y. 20 Janerenone oo amãtejẽ upa. A'e pe wyi oja'a janere upa, Uu pyri'ĩje'ẽ wyi. Awyje Uu pè oporegeta katu mã'ẽ rõmõ ekoi ky'y, janeupewarà mõ. Mãerã tè a'evo ekoi. Ãwitõ Meukiseteki mãerã tè ekoi Janejare'e pè oporegeta mã'ẽ rõmõ, a'evo Jesu ekoi ky'y.