Janejare'e pè oporegeta mãe kõ rõvijã rewarà
5
Janejare'e pè oporegeta mãe kõ rõvijãa rekoa rè tè ikõ pejipy'amogeta rã'ĩ peiko nẽ. Janejare'e opyteporo tãmõ Revi jeapyrerà kõ wyi maekwerà tè a'e. Janejare'e remĩgwai rõmõ oposiko wetãrãgwerà kõ pewarà mõ mã'ẽ tè a'e. A'e temime'ẽ rã ome'ẽ Janejare'e pè ipi. Ãmõ, moma'e ojuka ime'ẽ ijupe ipi, jane kõ aiwererà repykarà ra'upa rõmõ.b 2 Opota ipe Janejare'e rekoa rupi ekoi mijã. Ajamã'ẽ ojavy jẽ iko ipi. A'evo teãmã ekoi ipi. Ajawyi nijanekasi mã'ẽ okuwa jẽ. Janeporijauesa ãmẽ. Ajawyi ava mõ sõ ojavy Janejare'e rekoa otekokuwa e'ã rõmõ remẽ, Janejare'e pè oporegeta mã'ẽ ikatusa rupi omogeta ojavy mã'ẽ ipi. Nojikõtevẽi ee imogeta, ojavy teãmã mã'ẽ teve a'e rewarà mõ. 3 Ajawyi moma'e mõ ojuka ime'ẽ Janejare'e pè remẽ, wetãrãgwerà kõ aiwererà pewarà mõ kõrijõ tè rõwã ome'ẽ ipi. Waiwererà pewarà mõ teve ome'ẽ ijupe ipi.4 Kee a'e teve pejẽ. Ava jẽ rõwã ojipyteporo ovote Janejare'e pè oporegeta mãe kõ rõvijã rõmõ ipi. Janejare'e tè opyteporo. Ãwitõ tãmõ Arão ypy opyteporo.c 5 Ãwĩvo ve Kiristu opyteporo. Ovote rõwã teve ojipyteporo. Tuu tè wesa oupe oporegeta mã'ẽ rõmõ toiko, kee e'ipa ijupe maekwerà rupi katu:
“Oromojikuwaoka Era'yry rõmõ tereiko, jane kõ rovake.
Age'e ajikuwaoka teve Neruu rõmõ aiko teve”, e'i maekwerà.d
6 Kee e'i teve ikusiwaoka:
“Eupe oporegeta katu mã'ẽ rõmõ neiko karuarutà.
Ãwitõ Meukiseteki ekoi karamoe remẽ, ãwĩvotà neiko karuaru”, e'i Wa'yry Jesu Kiristu pè maekwerà.e
7 Ike yvy rupi Jesu ekoi remẽ itõkõ ojimomorijau janevo jẽ. Ajamã'ẽ werovija jẽ Uu, ajaate omãnõ.
– Epãtavõ rejupa! e'i Uu pè omãnõtà remẽ.
Ikasiay Janejare'e. Opota sõ remẽ, omokasi kuwa Wa'yry tomãnõ e'ã mijã. Ajawyi aepo e'i Jesu ijupe. Wapukai tesõ Uu pè javo. Oja'o teve aepo javo.
– Neremimota rupi aikotà ajamã'ẽ! e'i Jesu Uu pè.
Ajawyi Janejare'e omokasiay aepo e'i remẽ. 8 Janejare'e Ra'yry teipe Jesu mijã. Ajamã'ẽ ojimomorijau jẽ tesõ. Ay wete ijupe remẽ, Uu werovija jẽ ãmẽ ajaate omãnõ. Ojimomorijauvay wete remẽ ywesõ werovija jẽ Uu. 9 A'evoa rupi Janejare'e oupe oporegeta katu mã'ẽ rõmõ oinõ. Pirujẽ ijayvu rupi ekoi mãe kõ rereko katuarà rõmõ oinõ. 10 Ajawyi tè Janejare'e kee e'ipa amãtejẽ ijupewarà mõ:
“Eupe oporegeta katu mã'ẽ rõmõ neiko karuarutà.
Ãwitõ Meukiseteki ekoi karamoe remẽ, ãwĩvotà neiko karuaru”, e'i maekwerà.
Aje, Uu pè oporegeta katu mã'ẽ rõmõ Jesu ekoi. [Ajawyi tapepoi e'ã iwyi, a'e pejẽ.]
“Tijaneewe katu Jesu rè jirovija rõmõ jaiko”, e'i mã'ẽ
11 Oropota ipe pemotekokuwavay aekwerà rè mijã, oreremikusiwarerà rupi. Waypete sa'u poromotekokuwa ajamã'ẽ, mewe tè pejimotekokuwa ipi rewarà mõ. 12 Age'e rõwã ipe Jesu koty rewarà kõ rõmõ peiko. Petekokuwavay kuwasi mijã! Poromo'earà rõmõ kuwasi peiko mijã! Pejimo'e ypy tè rõwã peiko ky'y. Manyvore põ ja'y sakyrerà vo 'ejẽ peiko! Emã'ẽ! Joãkarã isakyrĩ remẽ, susury kõrijõ tè o'u ipi. Ajamã'ẽ no'u karuaru'aĩ ipi. Ajaire ojimovijapa sa'u ky'y remẽ, opoi iwyi ky'y. Ja'umã'ẽ e'e tè o'utà ky'y. Na'evoi pejẽ. Pejimoja'yrĩ peiko. Janejare'e rekoa rè napetekokuwai karuaru maevo sõ tite peiko. 13-14 Ja'yry notekokuwaive mã'ẽ susury kõrijõ tè o'u iko ipi, isakyrĩ rewarà mõ. Ojimovijapa remẽ tè otekokuwapa ipi. Na'evoi pejẽ ajamã'ẽ. Napetekokuwai karuaru peiko. Kee pejẽ ipi: “Manyvo põ ivo jaiko?” pejẽ tite peiko. “Manyvo põ nivoi jaiko?” pejẽ tite peiko. A'evoa otekokuwa mãe kõ okuwapa ipi! Ivo katua rupi ekoi kupa ipi. Ojimotekokuwavay a'evoa rè iko kupa ipi. [Pejẽ ve, petekokuwavay kuwasi peiko mijã!]