Janemojimoavaa 'arà rewarà
4
Ajare kee a'e pejẽ, tapeja'a ee. Ãwitõ janemojimoavaa 'arà rè Janejare'e oporegeta tãmõ kõ pè, janeupe ve oporegeta.a Kee e'i: “Peike ekoty pejimoava rõmõ epyri peiko”, e'i jẽ janeupe. Ja'ave rõwã tijaiko e'ã ajawyi. Jajimokasi jẽ Janejare'e rè jaiko, janejãvijõ jẽ. Ãmẽ tè janepytery pewarà mõ pè jẽ rõwã Janejare'e, “Nereike'ãi ekoty nejimoava rõmõ neiko”, ne'i'ãi ijupe. 2 Janejare'e ayvu e'eay ojenupa jane. Ãwitõ tãmõ kõ pè ojenupa,b ãwĩvo ve ojenupa ve jane. Ajamã'ẽ tãmõ kõ wenu ipe remẽ itõkõ, kee ne'i kupa: “Aje ywete janerena rã Janejare'e ome'ẽtà janeupe”, ne'i kupa. Ajawyi tesõ noikei kupa. 3 A'e reruparà kõ rõmõ rõwã jaiko ky'y. “Aje ywete a'evo Janejare'e janererekotà”, ja'e. Ajawyi sikuwa jaiketà ipyri jajimoava mãe kõ rõmõ jaiko ãmẽ. Tãmõ Moisesi rupi oo maekwerà kõ noikei ojimoava ipyri kupa, noerovijai kupa rewarà mõ. Ajawyi tesõ Janejare'e kee e'i ijupe kõ: “Napeike'ãi penena rã pè epyri pejimoava”, e'i ijupe kõ ky'y.c Werovija sõ kupa remẽ, oike mãrãgwe ipyri kupa mijã, kee e'ipa Janejare'e jane rewarà mõ: “Apota jane kõ tojimoava epyri”, e'ipa jane mijã. Yvy oinõ ypy remeve aepo e'ipa amãtejẽ. 4 Kee e'i ojikusiwa Janejare'e ayvu rõmõ, jimoavaa 'arà rewarà rè: “6 'arà rõmõ Janejare'e oposiko moma'e kõ reinõa rè, jane kõ reinõa rè teve. Awyjepa oinõma remẽ ojimoava rã'ĩ”, e'i ojikusiwa maekwerà.d 5 Kee e'i teve jimoavaa 'arà rè: “Noike'ãi wena rã pè kupa. Nojimoava'ãi epyri a'e pè kupa”, e'i.e6 A'e kõ pè ypy ojenu ipe janemojimoavaa 'arà rena rewarà. Karamoe remẽwarà kõ pè ypy ojenu ipe. Ajamã'ẽ a'e kõ noikei a'e pupe. Janejare'e nomoigeoka kõi, noerovijai ijayvu kupa rewarà mõ. Ãmõ kõ ãmẽ omoigeokatà opyri tojimoava kupa. 7 Kee jaa jakuwapa. Janejare'e nomoigeokai maekwerà kõ opa paire, oporegeta jẽ opyri janemojimoavaa 'arà rã rè. Ijaty kwaray paire oporegeta jẽ a'evoa rã rè. Ajawyi jakuwa a'e kõ pewarà mõ kõrijõ tè rõwã aepo e'i. Kee e'i tãmõ Tavi pè tokusiwa:
“Age'eve ikõ tapejapyaka ywete eayvukwerà rè nẽ, upi katu tapeiko ky'y.
Karamoe remẽ itõkõ penãmõi kõ ojimoãpã ywe'e tite ere ipi mijã.
Eruparà kõ rõmõ ikõ tapeiko ywe'e tite e'ã nẽ”, e'i.f
“Age'eve” e'i maekwerà. Ajawyi sikuwa ãmõ kõ oike jẽ kuwa age'eve Janejare'e pyri ojimoava.
8 Kanaã yvy pè oike kupa mã'ẽ pè rõwã aepo e'i Janejare'e. Ajawyi kãramõ tãmõ Josue weroike janerãmõi kõ Kanaã yvy pè paire, Janejare'e oporegeta jẽtà janeikea rã rè. Kanaã yvy pè oike mã'ẽ pè tè sõ aepo e'i remẽ, noporegeta'ãi kuwa janemojimoavaa 'arà rã rè ajaire mijã.g 9 Ajawyi sikuwa janemojimoavaa 'arà rã, Janejare'e koty rewarà kõ pewarà mõ. Ãwitõ Janejare'e ojimoava poroinõ maire yvy jinõ ypy remẽ, ãwĩvo ve janemojimoavatà opyri janerereko. 10 Pirujẽ janeposikoa wyi jajimoavatà ky'y. Ãwitõ Janejare'e omoawyjepa oposikoa remẽ ojimoava karamoe remẽ, ãwĩvo vetà jane jaike ipyri remẽ. 11 Ajawyi jajimokasiay ikõ Janejare'e rè jaiko nẽ, ãmẽ tè jaiketà jajimoava rõmõ ipyri nẽ, janejãvijõ jẽ. Ãwitõ karamoe remẽwarà kõ noerovija tari Janejare'e, tãwĩvo e'ã jaiko. Sirovija jẽsi ikõ ijayvu nẽ.
12 Janejare'e e'i mã'ẽ ikasiay wete. Jajapyaka ijayvu rè remẽ, janepy'a pupe oike janeroupa. Marija aime jeovai mã'ẽ rè tè poromosã'ãgatà tapekuwa. Ãwitõ marija aime pupe mijarà ro'okwerà jakysi remẽ, ikãgwerà pe'ĩ tesõ oo ipi. Noaui marija aime jeovai mã'ẽ moma'e ro'o ikysi ipi. Ãwĩvo ve Janejare'e e'i mã'ẽ ywesõ noau'ãi janerekoa. Janejipy'amogeta ai kõ omojikuwaoka jane ipi. Janeremimota ai ve omojikuwaoka jane ipi. Emikuwa kõ pirujẽ. 13 Nijainõ gatu'ãi 'eteay janeaiwererà mõ Janejare'e wyi ipi. Pirujẽ moma'e kõ rè omã'ẽ tè jẽ iko ipi. Nuvei temisage'ã mõ ijupe, ovake tè jaiko ipi rewarà mõ. A'e pè jajimome'utà kãramõ.
“Jesu janeporijauesaoka Uu rovakeve ipi”, e'i mã'ẽ
14 Kee jaa ja'epa: “Jesu rè erako'i erereko katuarà rõmõ”, ja'epa. Tijajipykãtã jẽ ikõ ee nẽ ajawyi, a'e pejẽ. Emã'ẽ. Janejare'e Ra'yry tẽ tesõ Jesu. A'e Uu rena kyty oo opyta. Uu pyri ekoi yva pè. A'e rovakeve tẽ tesõ oja'a katu jane kõ rè iko ipi. Janeporijauesaoka teve Uu pè janerereko ipi. Ãwitõ ike yvy pè Janejare'e pè oporegeta mãe kõ poroporijauesaoka ipi, ãwĩvo ve Jesu janeporijauesaoka Uu pè ipi. 15 Aje ywete janeporijauesaoka ywete mã'ẽ tè Jesu. Ne'i katui oposiko mã'ẽ rõwã ekoi. Nomowasui 'ete oposiko mã'ẽ tè Jesu. Okuwa katu nijanekasi mã'ẽ ipi. Ojimojane remẽ, a'e ve nikasi mã'ẽ rõmõ ekoi mijã. Ojimomorijauvay janevo jẽ. Manyvo nyvo jẽ ãjãgai rõvijã janerã'ã janerereko, ãwisõ tijaity Janejare'e. Ãwĩvo ywete ipe wã'ã ipe Jesu. A'e rè Jesu ojimomorijauvay ipe. Ajamã'ẽ nojavyi. Ojirovija jẽ Uu rè iko ipi. Ajawyi ãjãgai rõvijã janerã'ã remẽ, Jesu okuwa a'evo janerã'ã mã'ẽ. Janeporijauesa ãmẽ. 16 Ajawyi tijasĩ e'ã ikõ Janejare'e wyi nẽ. Ipyri'ĩje'ẽ tijaa imogeta ipi, okatuaya rupi janerereko katu ipi rewarà mõ. Janeporijauesa janerereko ipi. Janerauvay janerereko ipi. Janemokasioka teve ipi, nijanekasi remẽ.