“Jesu ywesõ wapyrasa tãmõ Moisesi”, e'i mã'ẽ
3
Ajawyi kee a'e pejẽ, eretãrãgwerà kõ. Janejare'e janepyteporo, Jesu koty rewarà kõ rõmõ tijaiko. Janejare'e Remimuurerà tè Jesu. A'e omojikuwaoka Janejare'e rekoa ipyau mã'ẽ janeupe ipi. Janeporijauesaoka Uu rovakeve ipi. Ajawyi temirovija tè a'e. A'e rè jẽsi tijaja'a ywete jaiko ky'y! 2 Kee Jesu ekoi. Janejare'e wesa wemĩgwai kõ rereko katuarà rõmõ. Werovija ywete Uu ipi. Uu ayvukwerà rupi katu janerereko. Ãwitõ karamoe remẽ tãmõ Moisesi amyry Janejare'e ayvu rupi katu wereko katu wetãrãgwerà kõ ipi. A'evo ve Jesu janerereko Uu ayvu rupi ipi. 3 Jesu ywesõ wapyrasa ajamã'ẽ Moisesi. Ajawyi a'e ywesõ tijamoe'e tãmõ Moisesi wyi. Tetã reinõgarà rè tè poromosã'ãgatà tapekuwa sa'u. Ava mõ tetã oinõ remẽ, tetã rõwã jamoe'e ipi. Inõgarerà tè jamoe'e ipi, ovote rõwã tetã ojinõ rewarà mõ. A'evo ve poroinõgarerà tè Jesu wyi, a'e ywesõ tijamoe'e tãmõ Moisesi wyi, janereinõgarerà tè Jesu rewarà mõ. 4 Tetã rè tè poromosã'ãga jẽtà. Jainõ remẽ tè katu uve tetã ipi. Nuvei inõgarà remẽ, nuve'ãi tetã ãmẽ. Mã jẽ rõwã nijainõi mã'ẽ. A'evo ve pirujẽ teminõgwerà reinõgarerà tè Janejare'e. Ajawyi a'e tè tijamoe'e. 5 Janejare'e remĩgwai e'eay rõmõ tãmõ Moisesi ekoi karamoe remẽ. Ijayvu rupi katu wereko katu wetãrãgwerà kõ ereko ipi. Janejare'e, “Kee arekotà eupewarà kõ kãramõ”, e'i Moisesi pè remẽ, oterẽ gatu aepo omojenu ijupe kõ ipi. 6 Kiristu ãmẽ Janejare'e Ra'yry e'eay rõmõ ekoi ipi. Uu werovija katu mã'ẽ rõmõ tè a'e ekoi. Uu koty rewarà kõ rè oja'a katu iko ipi. Janejare'e koty rewarà kõ tè jane, jajimokasi jẽ ee jaiko remẽ. Ajawyi Jesu rè tè tijaja'a ywete jaiko ãmẽ. Jaãrõ jẽsi Janejare'e pyri jaiko karuarua rã ãmẽ jaiko.“Tãmõ kõ reruparà mõ tapeiko ywe'e tite e'ã”, e'i mã'ẽ
7 Ajawyi tijajapyaka katu Janejare'e 'Ãg ayvukwerà rè, kee e'i maekwerà rè:
“Age'eve ikõ tapejapyaka eayvu rè nẽ,
upi katu tapeiko.
8 Karamoe remẽ itõkõ penãmõi kõ ojimoape ywe'e tite eayvu renu tare'ã ipi mijã,
tekoe'ãma rupi ekoi kupa remẽ.
Erã'ã ywe'e tite teve kupa ipi mijã.a
A'e reruparà kõ rõmõ ikõ tapeiko ywe'e tite e'ã nẽ, ijeapyrerà kõ rõmõ.
9 Penãmõi kõ omã'ẽ ipe areko katu kõ remẽ.
40 kwaray rõmõ tesõ itõkõ omã'ẽ ipe ere kupa.
Ajamã'ẽ erã'ã jẽ sire'e tè ãmẽ kupa.
Ojimoane'e jẽ ererovija e'ã ãmẽ kupa.
10 Ajawyi tesõ itõkõ ajimõarõ maevo sõ tite ikoty kõ ky'y.
Kee a'e ijupewarà kõ mõ:
‘Amotekokuwa kõ ipe erekoa rè ipi.
Nererovija tari tesõ ajamã'ẽ kupa.
Ipy'a ai jẽ tesõ iko kupa ipi’, a'e ijupewarà kõ mõ.
11 Ajaate kee a'e ijupe kõ ãmẽ ky'y:
‘Napeike'ãi penena rã pè pejimoavaa mõ peiko ky'y’, a'e ijupe kõ.
Ajimõarõ maevo sõ tite ikoty kõ wyi aepo a'e penãmõi kõ pè ky'y”, e'ipa Janejare'e maekwerà.b
12 Ajawyi kee a'e eayvukasi rõmõ pejẽ, eretãrãgwerà kõ. Tapejimokasi jẽ ikõ Janejare'e rè peja'a jẽ peiko, pejãvijõ jẽ. Tapepy'a ai ywe'e tite e'ã. Pepõ'õmorà mõ jẽ rõwã ipy'a aità Janejare'e ayvu renu tare'ã ãmẽ. Janejare'e oiko teãmã mã'ẽ tapeity ywe'e tite e'ã. 13 Ãwitõ tãmõ kõ pè Janejare'e kee e'i: “Age'eve ikõ tapejapyaka eayvu rè nẽ”, e'i. Ãwĩvo ve aepo e'i jẽ jane ipi. Ajawyi pejimokasi ikõ ojeeve peiko nẽ, ava jẽ rõwã topoi ywe'e tite e'ã iwyi. Kõ'ẽ jawe jawe ikõ tapejimokasi Janejare'e rè peja'a peiko nẽ. Ãmẽ tè napejimoripeoka'ãi ivo e'ãa rè. Napepy'a ai'ãi teve ãmẽ. 14 Jajirovija ypy Kiristu rè remẽ, jajirovija ywete ee ipi. Jajipykãtã ee. A'evo tijaiko jẽ age'e remẽ jaiko ãmẽ ipi, ajaate jamãnõa pè. A'evo jaiko remẽ tè aje ywete Kiristu koty rewarà kõ rõmõ jaikotà ãmẽ. 15 A'evoa rè tè Janejare'e 'Ãg kee e'i ikusiwaoka:
“Age'eve ikõ tapejapyaka eayvu rè nẽ, upi katu tapeiko.
Karamoe remẽ itõkõ penãmõi kõ ojimoãpã ywe'e tite ere ipi mijã.
A'e kõ reruparà rõmõ ikõ tapeiko ywe'e tite e'ã nẽ, ijeapyrerà kõ rõmõ”, e'i ikusiwaoka.
16 Tãmõ Moisesi Ejitu yvy pe wyi werojisyry maekwerà kõ pewarà mõ tè itõkõ aepo e'i. A'e kõ wenu ke'ĩatu tè itõkõ ijayvu. Noerovijai ajaire kupa ky'y. Ojimoape tesõ ijayvu renu tare'ã kupa ky'y. Pirujẽ a'evo ekoi kupa. 17 Ajawyi tesõ Janejare'e ojimõarõ ikoty kõ, nivoi ekoi kupa rewarà mõ. 40 kwaray rõmõ tesõ itõkõ ojimõarõ ikoty kõ, tekoe'ãma rupi ekoi kupa remẽ. A'e rupi opa ãmẽ kupa ky'y. 18 Noerovijatai kupa rewarà mõ tè Janejare'e, “Napeike'ãi penena rã pè pejimoava rõmõ peiko ky'y”, e'i ijupe kõ wayvukasi rõmõ ky'y.
19 Ajawyi tè itõkõ noikei kupa ky'y, noerovija tari Janejare'e kupa ipi rewarà mõ.