“Tijajimokasi jẽ Jesu rè tijaja'a ywete jaiko”, e'i mã'ẽ
2
Aje ywete Janerõvijã ywete ayvukwerà ojenu janeupe maekwerà. Ajawyi tijajimokasi jẽ ee tijaiko, a'e pejẽ. Ja'ave rõwã tijaiko e'ã ãmẽ. Tijanerearai e'ã teve iwyi. 2 Kee rewarà mõ aepo a'e pejẽ. Ayvu kasi teãmã yvapewarà kõ remimojenuwerà kõ. Aje ywete mã'ẽ omome'u kupa ipi. Niteei mã'ẽ omome'u maekwerà. Ajawyi tãmõ kõ noerovijai emimojenuwerà remẽ, omomorijauoka kõ ijaiwererà kõ repykarà mõ.a 3 Tysi tõ Janerõvijã ywete remimojenuwerà nisirovijai remẽ! Janemomorijauvaytà tè ivo kõ jẽ ãmẽ ky'y! Emã'ẽ. A'e yveve janerereko katua omojenu imojikuwa janeupe. Wemimo'earà kõ pè omojenu, omã'ẽ ee mãe kõ pè. A'e kõ ajaire omojenu janeupe ãmẽ ky'y. “Aje ywete ijayvukwerà”, e'i wemimojenuwerà pè kupa. Ajawyi ikõ ijayvukwerà sirovija ywete ipi nẽ, a'e pejẽ. 4 Janejare'e teve omojikuwaoka jane aje ywete Janerõvijã ywete remimojenuwerà. Okasia rupi omojikuwaoka wenu mãe kõ rovake, ãwisõ “aje ywete” te'i weminuwerà pè kupa. Mãrãnà jikuwa e'ã kõ iteetejẽ oinõoka Janerõvijã pè tomã'ẽ ee kupa. Ipojy mãe kõ. Temikuwa e'ã kõ. Ãmõ, o'Ãg tẽ tesõ omuu teve Janerõvijã koty rewarà kõ py'a pupe toiko. Wemimotarà rupi emikuwa kõ ome'ẽ teve ijupe kõ. O'Ãg kasia rupi a'evo wereko kõ, ãwisõ “aje ywete” te'i Janerõvijã ywete remimojenuwerà pè kupa ky'y.b“Mirà rõmõ Jesu isaky janerereko katuarà rõmõ toiko”, e'i mã'ẽ
5 Tapeja'a jẽ ikõ kãramõwarà rã rè nẽ. A'evo remẽ yvapewarà kõ rõwã Janejare'e omojõvijã mitità. 6 [Jane tè, ojirovija katu ee mãe kõ tè a'evotà wereko ãmẽ.] Ajare kee e'i ava mõ ikusiwa:
“Manyvore põ neja'a jẽ tesõ jane kõ rè, ene ywesõ nekasiay remẽ?
Jane kõ wyi wete nekasiay neiko!
Neja'a jẽ jane kõ rè ajamã'ẽ neiko ipi.
7 Nemojõvijãoka kõ imoe'eoka kõ,
werywete yvapewarà kõ vo toiko kupa.
Ajamã'ẽ yvapewarà kõ wyry kyty sa'u miti neinõ kõ toiko kupa.
8 Neinõ kõ nereminõgwerà jarà kõ rõmõ toiko kupa,
toja'a nereminõgwerà kõ pirujẽ rè kupa ipi”, e'i mã'ẽ ojikusiwa.c
Aepo e'i maekwerà rupi jakuwa Janejare'e pirujẽ weminõgwerà kõ ome'ẽ janepo pè. Age'e remẽ, jane kõ rè jamã'ẽ ipe erokwa. “Mã pè põ aepo e'i?” ja'e tite jamãjã ee. 9 Ajamã'ẽ jakuwa Jesu tè a'evo ekoi. A'e uu ojimojane remẽ, yvapewarà kõ wyry kyty sa'u rã'ĩ ekoi rã'ĩ mijã, yvy rupi. Jane kõ aiwererà repykarà mõ uu omãnõ wyi a'evo ekoi rã'ĩ. Janejare'e janerauvay wyi a'evo Ta'yry ekoi. Age'e Jõvijã wasu rõmõ ekoi ky'y. Pirujẽ weminõgwerà jarà rõmõ ekoi. Omãnõ janeupe rewarà mõ Tuu omojõvijãoka imoe'eoka ky'y.
10 Janejare'e tè omomorijauoka Wa'yry. A'evoa rupi Janerõvijã e'eay rõmõ oinõ, tijanerereko katu janereraa Uu rena kyty. Ikatuay a'evo janerereko remẽ. Pirujẽ weminõgwerà kõ wereko jẽ ereko. Opota mõa'ãrõwã jane kõ wãkarãgwerà kõ rõmõ toiko kupa ipi. Ajawyi a'evo wereko kõ eraa kõ wena e'eay kyty opyri toiko kupa.
11 Jesu janeaiwererà omoje'o janewyi. Janemotee teve, Uu rekoa rupi katu tijaiko. Ajawyi janeruu rõmõ Jesu Ruu ekoi ky'y, Jesu remireko katukwerà kõ rõmõ jaiko remẽ. Pe'ĩte Janeruu ky'y. Ajawyi Jesu “emõmirĩ” e'i jane ky'y. “Ekõjã” e'i ve wãivĩgwerà kõ pè. Nojimosĩoka'ãi aepo javo janeupe. 12 Ajare kee e'i Uu pè:
“Nekatuay wetea amojenutà emõmirĩ kõ pè, ekõjã kõ pè ve.
Oromoe'età ipyterà kõ pè”, e'i Uu pè.d
[A'evo “emõmirĩ kõ” e'i janeupewarà mõ. Nosĩ janewyi rewarà mõ aepo e'i.] 13 Kee e'i teve janeupewarà mõ:
“Janejare'e rè erako'iaytà ipi”, e'i maekwerà.
Kee e'i teve janeupewarà mõ:
“Aã ike aju, eãkarãgwerà kõ Janejare'e ome'ẽ ije mãe kõ reve”, e'i maekwerà.e
14 Janeupewarà mõ tè “eãkarãgwerà kõ” e'i. Janeupewarà mõ Jesu ojimojane, janevo toiko. Ãwitõ janero'o, ãmõ, janeruwy, ãwĩvo ve ekoi. Janevo ywete ekoi. Janevo ywete oiko omãnõ. Omãnõa rupi nomokasiokari ãjãgai rõvijã ky'y, ãwisõ tikasi e'ã janemãnõa janeupe ky'y. Ajawyi janemãnõa jarà rõmõ rõwã ãjãgai rõvijã ekoi ky'y. 15 Jane kõ oiko jẽ remẽ okyje amãtejẽ omãnõa rã wyi iko ipi. Ãwitõ temĩgwai ai kõ okyje amãtejẽ oõvijã ai wyi ipi. Ãwĩvo ve okyje ai tè omãnõa rã wyi kupa ipi. Aje ywete Jesu gyjea rupi tekoua omoma omãnõa rupi ky'y, ãwisõ tijakyje e'ã janemãnõa rã wyi jaiko ky'y. A'evoa rõmõ ojimojane omãnõ. 16 Ajawyi jakuwa yvapewarà kõ mokasiarà rõmõ rõwã uu yvy pè. Aje ywete, janemokasiarà rõmõ tè uu. Tãmõ Aparão jeapyrerà kõ mokasiarà rõmõ tè uu. 17 Ajawyi manyvo nyvo jaiko etãrã kõ rõmõ remẽ, a'evo 'atà tè Jesu ekoi ãmẽ, ojimojane uu remẽ. Ajawyi age'e e'i katu oja'a janere Uu rovakeve ky'y. Janeporijauesa mã'ẽ rõmõ ekoi. Temirovija rõmõ ekoi. Janeporijauesaoka Janejare'e rovakeve mã'ẽ e'eay rõmõ ekoi. A'evo janerereko, ãwisõ Janejare'e “awyjepa” te'i janeaiwererà pè ky'y. A'evoa rõmõ tè Jesu janevo ojinõ. 18 Okuwa katu janemokasia, ãjãgai rõvijã ojavyoka Janejare'e rekoa janeupe remẽ. Janevo jẽ ojimomorijau iko, ãjãgai rõvijã opota ipe ojavyoka ijupe remẽ mijã.f Ajawyi okuwa katu janemokasia, ãjãgai rõvijã Janejare'e wyi janereityoka ipetà remẽ.