Epereu
Epereu kõ pewarà temikusiwarerà
“Jesu ywesõ ikatuay mã'ẽ rõmõ ekoi Janerõvijã wasu rõmõ”, e'i mã'ẽ
1
Karamoe remẽ itõkõ Janejare'e wayvu omuu janerãmõi kõ pè ipi. Ãmẽ upi upi wayvu mojenuarà kõ pè omojikuwaoka, tomojenu ijupe kõ ipi mijã. Iteetejẽ omojikuwaoka ijupe kõ ipi mijã.a A'evo omojikuwaoka wayvu tãmõ kõ pè ipi mijã. 2 Age'e remẽb ãmẽ Wa'yry tẽ tesõ omuu tijanemogeta ky'y. Wesa weminõgwerà jarà rõmõ maekwerà tè Ta'yry. Karamoe remẽ Janejare'e yvag yvy oinõoka remẽ, pirujẽ omono a'e tè toinõ. 3 Janejare'e okatuaya omojisaoka janeupe Wa'yry rupi. Eruparà rõmõ ekoi Ta'yry. Nojavyi 'eteay ijayvu mã'ẽ ipi. Ãwitõ warua rupi jamã'ẽ janerova rè. Ãwĩvo ve Janejare'e Ra'yry rè jamã'ẽ remẽ, Tuu rè jamã'ẽ. Ojevo jẽ Uu reve ekoi. Ijayvukasiay teve iko ipi. Pirujẽ wayvukasia rupi weminõgwerà kõ wereko katu jẽ ereko ipi. Janeaiwererà omoje'o janewyi omãnõa rupi, ãwisõ Janejare'e pè tijanepy'a ky'a e'ã ky'y. A'evo paire ojivy oo Uu pyri ky'y, a'e ywesõ ikasiay mã'ẽ pyri. I'ekatu kytyre wapy upa, eeve Janerõvijã wasu rõmõ ekoi. 4 A'evo a'e ywesõ ijayvukasiay Janejare'e remĩgwai yvapewarà kõ wyi ipi. Uu remĩgwai kõ 'arà kyty ekoi, Ta'yry rõmõ. 5 Ajare kee e'i Janejare'e Wa'yry pè ikusiwaoka karamoe remeve:“Oromojikuwaoka Era'yry rõmõ tereiko, jane kõ rovake.
Age'e ajikuwaoka teve Neruu rõmõ aiko teve”, e'i ijupe.
Wa'yry pè tè aepo e'i. Wemĩgwai yvapewarà kõ pè rõwã aepo e'i ajamã'ẽ. Ãmõ, kee e'i amãtejẽ Wa'yry pè:
“Neruu rõmõ aikotà. Ãwĩ Era'yry rõmõ neikotà”, e'i teve.c
6 Ãwĩvo ve omuu Wa'yry ypykwerà yvy pè tojimojane remẽ, kee e'i ijupewarà mõ:
“Eremĩgwai yvapewarà kõ remimoe'e rõmõ Era'yry toiko”, e'i.d
7 Yvapewarà kõ pewarà mõ ãmẽ kee e'i Janejare'e ikusiwaoka:
“Janejare'e omokasi wemĩgwai yvapewarà kõ ipi.
Ãwitõ yvytu ikasiay, ãwĩvo toiko kupa.
Ãwitõ tata ikasiay, ãwĩvo ve toiko kupa”, e'i.e
8 A'e kõ pewarà mõ “eremĩgwai kõ” e'i ipi. Wa'yry pewarà mõ ãmẽ “Jõvijã” e'i. A'e pewarà mõ kee e'i ikusiwaoka karamoe remeve:
“Janejare'e tè ene.
Neiko karuarutà Jõvijã wasu rõmõ neiko.
Ivo katu nereko neremĩgwai kõ Jõvijã wasu rõmõ ipi.
9 Ivo tekoua nepota katu ipi.
Nivoi tekoua ãmẽ nerepotai 'ete ipi.
Ajawyi tè Janejare'e nemokasi Jõvijã wasu rõmõ tereiko.
Nerevewarà kõ 'arà kytywarà rõmõ nemoẽoka.
Nemoryvay teve nemoe'eoka”, e'i maekwerà.f
10 Kee e'i teve ikusiwaoka ijupewarà mõ:
“Jõvijã, karamoe remẽ naikoi moma'e mijã.
Ãmẽ yvy neinõ. Yvag ve neinõ.
Nepo pè maevo sõ tite neinõ.
11-12 Aekwerà kõ opatà kãramõ ky'y. Yvy kõ. Yva kõ teve opatà.
Ãwitõ kamisa okekeipa ipi, ãwĩvo vetà nereminõgwerà opatà.
Neekovijanõ kõ jẽtà aja paire.
Ene ãmẽ neiko puku jẽtà neiko.
Nanetee'ãi teve. Naneka'akuwa'ãi teve.
Neiko karuaru jẽtà neiko”, e'i ikusiwaoka.g
“Ejo e'ekatu kytyre tereapy, ereve Jõvijã wasu tè ene rewarà mõ.
Neãpã kõ newyry kyty rõmõ ainõtà. I'arà kõ gyty oromoẽokatà”, e'i amãtejẽ ijupe.h