3 Kee rewarà mõ aepo a'e ene. Jypy remẽ itõkõ jane ve nivoi jaiko ipi mijã. Aja paire tè Jesu koty rewarà kõ rõmõ jane jaiko ky'y. Nijatekokuwai 'ete itõkõ mijã. Nijajapyaka tari teve Janejare'e ayvu rè ipi mijã. Janejare'e ayvu rupi nijaiko tari mijã. Janeremimota ai kasia rupi tè jaiko ipi mijã. A'evo jajimoripe jaiko ipi mijã. Jajipokuwa ivo e'ãa rè ipi mijã. Nijajireko katui jaiko ipi mijã. Poromoai teve jaiko ipi mijã. Jajimõarõ teve ãmõ kõ pè jaiko ipi mijã. Jajikõ'õ teve ãmõ kõ rè ipi mijã. Janerovaja jẽ janere ojikõ'õ rõmõ kupa ipi mijã. [Ajawyi, tijajirojivy e'ã ikõ aekwerà kyty nẽ.] 4 Ajamã'ẽ a'evo jaiko jẽ ipe remẽ, Janejare'e janeporijauesa jẽ, janerereko katuarà rõmõ. Nivoi jẽ jaiko ipe remẽ, janerauvay jẽ. 5 Janerereko katupa teãmã. Ivo jaiko rewarà mõ rõwã janerereko katu. Aje ywete, poroporijauesa rewarà mõ tè. Ajawyi i'Ãg kasia janepy'aky'a'opa janemoteepa ky'y. Janepyaukwerà rõmõ janereinõ janerereko ky'y, janeporijauesa rewarà mõ. O'Ãg rupi a'evo janerereko. 6 Nokãte'ãi Janejare'e o'Ãg me'ẽa rè janeupe, Jesu Kiristu remireko katu kõ rõmõ. 7 Okatua rupi janeaiwererà oitypypyipaoka janewyi. Ivo mã'ẽ rõmõ janerereko ky'y. “Poroereko karuarutà epyri”, e'ipa janeupe. [A'evoa rã siãrõ jẽ jaiko. A'evoa rõmõ tè o'Ãg ome'ẽ janeupe.] 8 Aepo a'e mã'ẽ aje ywete. Ajawyi apota teremotekokuwa kõ aepo rè. Taneewe katu ikõ poromotekokuwaa rè ipi nẽ. Eremikusiwarerà rè pirujẽ teremotekokuwa kõ ipi. A'evo neiko remẽ, Janejare'e rè ojirovija mãe kõ Jesu rekoa katu okuwatà ãmẽ ky'y. Ojimokasità ivo tekoua rupi toiko ãmẽ kupa. Ãmẽ sõsi owaray jaikotà ky'y. Ikatuay a'evo jaiko remẽ ipi.

9 Ajamã'ẽ oporegeta teywete mãe kõ rè ikõ terejapyaka e'ã ipi nẽ. A'e kõ opota tite Janejare'e ayvu wyi poromomoioka. Ãmõ, opota penõvijãgwerà karamoe remẽwarà kõ rekoa rè terejimo'eai. Ãmõ, opota tãmõ Moisesi remikusiwarerà ivo tekoua rewarà rè ojiayvuvaja vaja teve kupa. Terejiayvuvaja vaja e'ã eeve kõ ajamã'ẽ. Manyvo rã mõ rõwã aepo rè nejiayvuvaja vaja. Noporomokasi mã'ẽ tè aepo ãmẽ. Noporomotekokuwai mã'ẽ teve. 10 Kee tere oporegeta teitetea rupi poromoe'yità tite mãe kõ pè: “Aepo pejẽ sõ, poromotekokuwaarà rã'ãga kõ!” ere ijupe kõ ipi. Ojimoane'e jẽ sõ kupa remẽ, aepo ere mijẽ ijupe kõ. Mõrijõ 'arà tesõ aepo ere ijupe kõ. Ãmẽ tè neayvu rupi noikoi sõ kupa remẽ, teremoisyry ãwĩ rapijarà Jesu koty rewarà kõ pytery pe wyi imono ky'y. [Kee rewarà mõ. Noja'a'ãi opy'a tekokuwaa rè kupa rewarà mõ.] 11 Kee nekuwapa ãwĩ rapijarà kõ manyvo jẽ ekoi. Nivoi ekoi kupa ipi. Jesu rekoa e'e rè noja'ai kupa ipi. Janejare'e ayvu nopotai teve kupa ipi. Weko aiwerà règà ojimoane'e jẽ kupa ipi. Ajawyi ojikuwa Janejare'e omomorijautà mãe rã kõ rõmõ kupa.

12 Amoawyjepatà eayvu ky'y. Kee a'e jẽ ene. Epãtavõarà Atẽmã amonotà rã'ĩ nerekovijarà mõ toposiko iko. Atẽmã nooi remẽ, Tikiku tè amonotà. Mokope ovãe remeve ejo kuise'ẽ jẽ ekoty. Nikopori taa pè aatà ãmãnà kyrypy e'ãve. Ajaate kwaray ypy remẽ a'e pè ajutà. Ajawyi a'e taa kyty ikõ tereo eresa nẽ, a'e neupe. 13 Ãmõ, Sena eu erà pè mã'ẽ okwatà nerena rupi. Ayvu pojy kuwaparà^a tè a'e. Ãmõ, Aporu eu erà pè mã'ẽ ve okwatà Sena rupi. Terepãtavõ kõ ikõ nerena rupi okwa kupa remẽ nẽ. Ajaire oo jẽtà kupa remẽ, emiporu rã kõ tereme'ẽ ikõ ijupe kõ toeraa kupa nẽ.

14 Ãmõ, kee a'e ene. Tijaneewe katu japosiko, ãwisõ ivo katua rupi tijaiko, Jesu koty rewarà kõ rõmõ. Nijanerako'i'ãi ãmõ kõ rè ãmẽ.

15 Ike epyriwarà kõ opota ojimory nere kareta akusiwa mã'ẽ rupi, pirujẽ epyriwarà kõ. Ãmõ, mokope orerauparà kõ rè teve oropota orojimory, Jesu rè ojirovija mãe kõ rè.

Jõvijã wasu Jesu ikõ tapenereko katu okatuaya rupi ipi nẽ.

[Awyjepa eremikusiwarerà neupewarà ky'y.]