2 Ika'akuwa sa'u mãe kõ pè kee tere imotekokuwa ipi: “Tapejireko katu ikõ peiko nẽ. Temimoe'e rõmõ ikõ tapeiko ipi nẽ. Tapejimokasi ikõ Janejare'e rekoa rè ipi nẽ. Ãmõ, tapejirovija ywete ikõ Janejare'e rè ipi nẽ. Ãmõ, tapeauvay ikõ ãmõ kõ ipi nẽ. Ãmõ, tapepoi tite e'ã ikõ Janejare'e rekoa wyi pejimomorijau ipe remẽ nẽ”, ere ikõ ijupe kõ nẽ. Aepo tere ika'akuwa sa'u mãe kõ imotekokuwa kõ.

3 Ãmõ, isa'imã sa'u mãe kõ pè kee ere teve: “Jesu ikõ tapemomojy nẽ. Ivo ikõ tapeiko ipi nẽ. Ãmõ, tapeayvu ai e'ã ikõ peiko ipi nẽ. Ãmõ, pemãrãkuwaa tapemoyvypyoka e'ã ikõ peka'ua pupe ipi nẽ. Ivo tekoua rè ikõ poromotekokuwa mãe kõ rõmõ tapeiko nẽ”, ere ikõ isa'imã sa'u mãe kõ pè nẽ. 4 A'e kõ tè ikõ tomotekokuwa kõjãmuku kõ ivo tekoua rè ipi nẽ. Kee te'i ijupe kõ kupa: “Tapeauvay ikõ pemẽnà ipi nẽ. Ãmõ, pememyry kõ ikõ tapeauvay teve ipi nẽ”, te'i ijupe kõ. 5 “Ãmõ, tapejireko katu ikõ peiko ipi nẽ. Ãmõ, pirujẽ aiwea wyi ikõ tapejireko katu peiko ipi nẽ”, te'i. “Ãmõ, penetã rewarà rè ywesõ ikõ tapeja'a ipi nẽ. Ãmõ, tapeja'a katu ikõ ãmõ kõ rè ipi nẽ. Ãmõ, pemẽnà kõ ayvu rupi ikõ tapeiko katu ipi nẽ”, te'i isa'imã sa'u mãe kõ kõjãmuku kõ pè imotekokuwa kõ. A'evo ekoi kupa remẽ tè ãmõ kõ kee e'ità ee kõ omãjã: “Haa! Ikatuay wete Janejare'e ayvu!” e'ità kõjãmuku kõ rè omãjã. Ava jẽ rõwã kee e'ità ãmẽ ee kõ omãjã: “Nikatui maevo Janejare'e ayvu”, ava jẽ rõwã e'ità.

6 Ãmõ, kõnomĩokyrerà kõ teremotekokuwa teve imokasi kõ, ãwisõ tojireko katu teve kupa. 7 Ene teve, tuku. Ivo ikõ eiko manyvo neiko remẽ ipi nẽ. Ãmẽ tè kõnomĩokyrerà kõ nereruparà mõ ekoità. Ãmõ, tanerovaory katu ikõ neremimotekokuwa kõ rovake ipi nẽ. 8 Ajamã'ẽ ivo katu teremotekokuwavay jane kõ pirujẽ Janejare'e ayvu e'eay rè ipi. Nerejavyi ijayvu rè poromotekokuwaa rè remẽ, janeãpã kõ nivoi mã'ẽ manyvo nomo'y'ãi nere. Ojimosĩokatà kõrijõ tè nere omãjã ãmẽ kupa, wayvu ai paire.

9 Ãmõ, temĩgwai temipyykwerà kõ pè kee tere teve:^a “Penõvijã kõ ayvu ikõ taperovija ipi nẽ. Tapemory ikõ penõvijã ipi nẽ. Tapeayvuvaja vaja e'ã ikõ penõvijã kõ ipi nẽ. 10 Ãmõ, tapemona e'ã ikõ penõvijã ma'e rè ipi nẽ. Ivo ikõ tapeiko ipi nẽ. A'evo peiko remẽ, temimoe'e rõmõ peikotà ãmẽ”, tere ijupe kõ. “A'evo peiko remẽ, kee e'ità ãmõ kõ pene omãjã: ‘Emã'ẽ ee kõ! Jesu rekoa rupi katu ekoi kupa ipi! Aje, ikatuay wete Janejare'e rekoa ipi! Ikatuay wete Janejare'e poroereko katuarà rõmõ ekoi!’ e'ità pene omãjã kupa”, ere temĩgwai kõ pè.

11 Janejare'e okatuaya rupi janerereko katu ipi. A'evo poroerekoa omojikuwaokapa pirujẽ jane kõ pè ky'y, Jesu Kiristu rupi. 12 Ajawyi kee Janejare'e opota tijaiko Jesu koty rewarà kõ rõmõ, ike yvy pewarà kõ pytery pè jaiko jẽ remẽ. Janejare'e rekoa rupi tè jaiko ky'y. Nivoi tekoua wyi ikõ tijajireko katu ipi nẽ. Noerovijari mãe kõ remimotarà rè tijajitupi e'ã ipi. Janejare'e py'a rupi katuwarà kõ rõmõ tijaiko ipi, emireko katu kõ rõmõ. Ivo katua rupi tijaiko ipi. 13 Kãramõ Jesu Kiristu janerereko katuarà rõmõ uu tarà mijẽ [janepijarà mõ janereraa wena kyty]. Jõvijã wasu rõmõ ojikuwatà uu. A'evo remẽ Janejare'e kasia ojikuwatà uu. A'evoa rã simoa'u jẽ jaiko age'e. Ajawyi siãrõ jẽ jaiko remẽ, ivo tijaiko jẽ ipi, a'e ene. 14 Jesu ojijukaoka janerereko katuarà rõmõ. A'evoa rupi pirujẽ nivoi jaikoa wyi janemomoipa. Ivoay rõmõ janereinõ, ãwisõ owaray tijaiko ijupewarà mõ. Weruparà mõ janereinõ janerereko ipi. A'evoa rõmõ janereinõ.

15 A'evo 'evoa kõ rè teremotekokuwa kõ imokasi kõ, Titu. Noenui neayvu mãe kõ ikõ teremotekokuwa jẽ ipi nẽ. Ajamã'ẽ ava mõ sõ nivoi jẽ ekoi remẽ ikõ, emogeta kõ jẽ ãmẽ nẽ. “Terejimoteepa ikenẽ” ere ijupe neayvukasi rõmõ. “Ajamã'ẽ eayvu rupi rõwã aporegeta neupe. Janejare'e ayvu e'e rupi tè aporegeta ipi, nerõvijã rõmõ”, ere ijupe ky'y. Terejierõarõoka e'ã ava mõ pè.