Jesu vãea rã renonewarà rewarà
3
Manyvotà põ tekoua Jesu vãea renone. Aepo jaa rè oromotekokuwatà terekuwa amãtejẽ manyvotà rã'ĩ mãrãnaiwerà rewarà. Terejimotekokuwa amãtejẽ ãmẽ ivãea renoneve neiko. A'e okwa remẽ waypetetà jane kõ rekoa ky'y. 2 Ãmẽ oikotà mõa'ãrõwã nivoi mãe kõ ky'y. Keetà ekoi kupa. “Ije ywesõ”, e'i teywetetà iko kupa. Ãmõ, okãte'ãtà oma'e kõ rè iko kupa. Ãmõ, ojimoe'e rã'ãgatà tè iko kupa. Ãmõ, poroerõarõtà iko kupa. Ãmõ, Janejare'e omojaiwetà iko kupa. Ãmõ, oõvijãgwerà kõ ayvu noerovija'ãi iko kupa. “I'ete” ne'i'ãi wereko katua pè iko kupa. Ivo tekoua nopota'ãi iko kupa. Ãmõ, Janejare'e nomomojy'ãi ywe'e tite iko kupa. 3 Ãmõ, noporoporijauesa'ãi iko kupa. Ãmõ, nojimory mijẽ'ãi ojikõ'õ wee maekwerà kõ rè iko kupa. Nivoi mã'ẽ omo'ytà teywete mirà kõ rè iko kupa. Ãmõ, nojireko katu'ãi nivoi tekoua wyi iko kupa. Ãmõ, poromoai ywe'e titetà iko kupa. Ãmõ, ivo tekoua nopota'ãi iko kupa. 4 Ãmõ, poromoãkwa'ãtà kupa. Ãmõ, nojirokyje'ãi ywe'e tite iko jowyi kõ kupa. Ãmõ, wee kõrijõ tè oja'atà iko kupa. Ãmõ, omorya rè ywesõ oja'atà iko kupa. Janejare'e noau'ãi iko kupa. Wãi wãisõ ekoità kupa. 5 A'evo ekoi mãe kõ, “Janejare'e rekoa rupi aiko ipi”, e'i rã'ãgatà oupe iko kupa. Ajamã'ẽ “aje” ne'i'ãi Janejare'e kasia pè iko kupa. A'e a'e kõ rè terejimory e'ã ikenẽ, a'e neupe ãmẽ.6 Uve age'e remẽ a'evo ekoi mãe kõ mõ. Kee ekoi kupa ipi. “Janejare'e ayvu mojenuarà teve ije”, e'i rã'ãga oupe kupa ipi. Oo oo jane kõ retã wyry rupi iko wemimoripearà rã kõ reka kupa ipi. Wãivĩgwerà notekokuwai mãe kõ ywesõ ojimoripeoka apijarerà kõ pè ipi. A'e kõ wãivĩgwerà ojimoane'e jẽ waiwererà rè mãe kõ. Wemimota aiwerà rupi ekoi mãe kõ a'evo ekoi. Nojireko katui nivoi tekoua wyi iko mãe kõ. A'evo ekoi wãivĩ mãe kõ ywesõ ojimoripeokatà poromoripearà kõ pè, kee e'i rã'ãga kupa remẽ: “Janejare'e ayvu rè poromo'età!” e'i rã'ãga kupa remẽ. 7 Ãmẽ a'e wãivĩgwerà kõ wenu katu ywe'e tite, aepo e'i kupa remẽ. Opota tite ojimotekokuwa kupa. Ajamã'ẽ aje ywete mã'ẽ nokuwai kupa ipi.
8 Ãmõ, kee ekoi poromoripe mãe kõ ipi. Ãwitõ karamoe remẽ Jani, Jãpere reve, ojimokasi ywe'e tite Moisesi rè kupa.a Ãwĩvo vetà age'ewarà poromoripe mãe kõ. Ayvu aje ywete mã'ẽ noenu tari kupa. Ajawyi otekokuwaa rã'ãga rupi kõrijõ tè ekoi kupa. Kiristu rè ojirovija rã'ãga rupi tè ekoi kupa. 9 Ajamã'ẽ noporomoripe puku'ãi kupa ky'y. Ke'ĩ ojikuwatà otekokuwa e'ã mãe kõ rõmõ iko kupa. Ãwitõ karamoe remẽ Moisesi kõ nojimoripeokai Jani kõ pè, ojikuwa poromoripearà kõ rõmõ ekoi kupa rewarà mõ. Ãwĩvo vetà age'e remẽwarà kõ ojikuwatà poromoripearà kõ rõmõ ekoi kupa.
“Janejare'e ayvu e'e rè teremotekokuwa kõ ipi”, e'i mã'ẽ
10 Aje oromotekokuwa ee mã'ẽ rupi katu neiko ipi. Etekokuwaa rupi poromotekokuwa ee mã'ẽ nekuwa ipi. Ãmõ, ivo katu aiko mã'ẽ nekuwa teve. Janejare'e remimota rupi aiko mã'ẽ nekuwa katu teve. Ãmõ, Janejare'e rè ajirovija mã'ẽ ve nekuwa. Ãmõ, nererekoivai aiko mã'ẽ ve nekuwa. Ãmõ, poroauvay aiko mã'ẽ nekuwa teve ipi. Ava mõ erereko ai remẽ, naovajai ãmẽ ipi. Ajimomãatã kõrijõ ãmẽ aiko ipi. 11 Ãtiokia taa pè aposiko remẽ itõkõ a'e wãnà kõ nivoi erereko. Ikoniu taa pè aposiko remẽ itõkõ a'evo teve erereko kupa. Ãmõ, Risara taa pè aposiko remẽ itõkõ a'evo erereko kupa. A'e a'e wãnà kõ itõkõ nivoi erereko ipi. Emomorijauvay erereko kupa ipi. Ajamã'ẽ Janerõvijã ywete erereko katu iwyi kõ erereko ipi.b
12 Aje ywete Kiristu Jesu reruparà mõ jaiko remẽ, nivoi janerereko kupa ipi. 13 Nivoi mãe kõ nikatui ekoi ipi. Ãmõ, Janejare'e ayvu rè poromo'e rã'ãga mãe kõ nikatui ekoi ipi. Ajaire ywesõ si nikatu'ãi ekoi kupa ky'y. Poromoripe jẽtà iko kupa. Ãmõ, ovote ojiupi tè ojimoripetà iko kupa. 14 Ajamã'ẽ ãmõ rupi teve jane jaiko, tuku. Ajawyi oromotekokuwa ee mã'ẽ rè terejimotekokuwa jẽ neiko ipi, “aje ywete” ere ijupe maekwerà rè. A'e tererovija katu jẽ ikõ neiko ipi nẽ. Nekuwa nemotekokuwaarerà kõ temirovija kõ rõmõ kõ tè ekoi rewarà mõ aepo a'e neupe. 15 Neja'yry remeve neenu Janejare'e ayvu e'e. Kee e'i maekwerà rè nejimotekokuwapa neiko: “Janejare'e janerereko katu jimomorijau wasua wyi ipi”, e'i maekwerà rè nejimotekokuwapa neiko. “Kiristu Jesu rè jajirovija remẽ janerereko katu”, e'i maekwerà rè. Aepo jaa rè nejimotekokuwapa neiko Janejare'e ayvukwerà rupi. 16 Pirujẽ Janejare'e ayvukwerà aje ywete mã'ẽ tè. Janejare'e tè wayvukwerà okusiwaoka janeupe ipi. O'Ãg rupi omotekokuwaoka jane kõ tokusiwa kupa ipi. Ajawyi ijayvukwerà ikatuay wete poromotekokuwaa rõmõ ekoi. A'e rupi tè aje ywete mã'ẽ jakuwa ipi. Ãmõ, jakuwa ava mõ nivoi poromo'e remẽ. Jaovajarĩ ãmẽ ipi. Ãmõ, a'e rupi nivoi ekoia jakuwa. Ãmõ, ivo katu ekoia jakuwa teve ipi. Pirujẽ a'evo 'evoa kõ rè jamovyvy Janejare'e ayvu toenu kupa. 17 Janejare'e opota wemĩgwai e'eay rõmõ tijaiko ipi. A'evoa rõmõ wayvu okusiwaoka janeupe, ãwisõ upi tijajimotekokuwavay jaiko ipi. A'e rupi tè ivo katu jaiko ipi.