4
[Age'e janeposikoa rã rè aporegetatà neupe ky'y.] Janejare'e reminu rõmõ aporegetatà neupe. Ãmõ, Kiristu Jesu reminu rõmõ ve. Kãramõ, Jesu uu mijẽ remẽ, poromoe'yi mã'ẽ rõmõ uutà ky'y. A'evo remẽ nokãjãive mãe kõ omoe'yità. Okãjã maekwerà kõ ve omoe'yità. Jõvijã wasu rõmõ owyjytà uu a'evoa rõmõ. A'e reminu rõmõ tè oromotekokuwatà eayvukasia rupi. 2 Ajawyi kee a'e neupe, tuku. Jesu rekoa e'e ikõ teremojenu jenu erokwa ipi nẽ. Terejimokasiay ikõ imojenua rè nẽ, a'e neupe. Wenu takatu mãe kõ pè teremojenu jenu erokwa ipi. Ãmõ, noenu tari mãe kõ pè teve teremojenu jenu erokwa. Ava mõ nivoi ekoi remẽ, teremotekokuwa ikõ ipi nẽ. “Moko ere sõ. Nikatui moko ere remẽ”, ere ikõ ijupe kõ ipi nẽ. “Ivo katu tekoua rupi jẽsi eiko”, ere ijupe kõ. Teremogeta kõ imokasi kõ ipi. Ikatusa rupi tè ikõ teremotekokuwa kõ ipi nẽ. Tanererekoiva e'ã ikõ imojenua nẽ.3 Kee rewarà mõ aepo a'e ene. Kãramõ jane kõ keetà ekoi kupa. Jesu ayvu aje ywete mã'ẽ noenu ta'ãi 'eteay kupa. Ayvu wemimotarà rè kõrijõ tè ojimotekokuwa rã'ãgatà iko kupa. A'evoa rõmõ poromo'e rã'ãga mãe kõ weka titetà omo'earà kõ rõmõ kupa. Ayvu opota wenu mã'ẽ mojenuarà kõ kõrijõ tè weka titetà kupa. A'e kõ pè ojimotekokuwaoka rã'ãgatà ãmẽ kupa. 4 Tysi Jesu rekoa wyi opoi ywe'e titetà tè kupa ky'y, enu tare'ã mõ kupa. Poromo'e rã'ãga mãe kõ ayvu kõrijõ wenu katutà kupa ipi. “Ayvu e'e tè” e'i titetà ikuwa e'ã poromo'e rã'ãga mãe kõ ayvu pè kupa. 5 Ajawyi nemo'e kõ tarepe remẽ, nemomorijautà ãmẽ kupa. Ajawyi terejireko katu ikõ, nemomorijau ipe kupa ipi remẽ nẽ, a'e ene. Ajamã'ẽ toporomo'e jẽ ikõ neiko ipi nẽ, Jesu rekoa rè. Tereposiko katuay poromotekokuwaa rõmõ neiko Janejare'e remĩgwai e'eay rõmõ.
6 Ãwĩvo erekovijarerà mõ ene eiko, a'e neupe. Temijatarà tè ije ky'y. Ke'ĩma emãnõa 'arà ky'y. 7 Erõvijã Jesu, “Ekwa eayvu katu mojenu erokwa”, e'ipa ije maekwerà rupi katu aiko, ajaate age'e aiko. Napoi eposikoa wyi, emomorijauvay ipe kupa remẽ. Ajirovija jẽ Jesu rè aiko ipi. Ajawyi epy'a katu jẽ aiko, emãnõa renone. 8 Janejare'e ekuwapa. Mãerã aiko karuarutà ipyri ky'y. Janerõvijã ywete ivo katuay mã'ẽ tè. Ivo katuay poromoe'yi mã'ẽ tè. Omowaitetà nivoi mãe kõ ivo mãe kõ wyi. Ãmẽ sõsi pirujẽ ivãea omoa'u mãe kõ weraapatà opyri toiko karuaru kupa ky'y.
“Ejo eresa”, e'i mã'ẽ
9 Ãmõ, kee a'e ene. Kuise'ẽ ejo eresa, a'e ene. 10 Ejimorypa kõ pirujẽ ojisyrypa ewyi oo. Temasi ve ojisyry oo. Emimotarà ywesõ ikasiay ijupe, Jesu rekoa wyi. Ajawyi ereity oo Tesaronika taa kyty. Ãmõ, Keresesĩ teve ojisyry oo ewyi. Karasia yvy kyty oo. Ãmõ, Titu ve Taumasia yvy kyty oo. 11 Rukasi kõrijõ tè opyta jẽ epyri. Ajawyi ejo kuise'ẽ ike eresa, a'e neupe. Ejimorypa Maku ve eesa eru nerupi. Epãtavõ kuwa eposikoa rè, Jesu ayvu mojenua rè. 12 Ejimorypa Tikiku amonopa Epesu taa kyty toposiko. 13 Ãmõ, kee a'e ene. Jypy remẽ eyru poko Kapu retã mè aity ajo, Toraji taa pe wyi ajo remẽ. Nejo remẽ, a'e ve eeru ije ãmẽ. Ãmõ, ekareta ojikusiwa mãe kõ ve eeru ije. Ãmõ, [Janejare'e ayvukwerà] kaneiru pirerà sikãgwerà rè ojikusiwa mã'ẽ ve eeru ije. A'e wyi ywesõ tanerearai e'ã ikõ nejo remẽ iwyi nẽ.
14 Aresãtiri separaria rewarà emojaiwe ywete. Ajawyi Janerõvijã ywete erepytà ajaire, emojaiwearerà rè. 15 Ajawyi terejireko katu ikõ Aresãtiri wyi nẽ, a'e ene, omojaiwe Jesu koty rewarà kõ ipi rewarà mõ. Ojimoape kõrijõ oreremimojenuwerà renu tare'ã ipi.
16 Ãmõ, kee a'e ene. Tekoua kuwaparà rovake ereru tajireko katu kupa remẽ, naiko pe'ĩ ekoty rewarà mõ. Pirujẽ ereitypa katu oo kupa. Ava jẽ rõwã, “Ikatuay Pauru”, e'i tekoua kuwaparà pè mã'ẽ. Ajamã'ẽ kee a'e Janejare'e pè a'e kõ pewarà mõ: “Papa, ereity oo kupa. Ajamã'ẽ, teremomorijau kõ e'ã”, a'e ijupe. 17 Pirujẽ ereity ipe oo kupa. Ajamã'ẽ Jõvijã Jesu nereity'ãi ãmẽ. Epãtavõ jẽ emokasi jẽ, ãwisõ ijayvukwerà pirujẽ jane kõ pè tamojenu jẽ erokwa. Pirujẽ Juteu rõwã mãe kõ pè tesõ amojenu erokwa ãmẽ. Janejare'e nejukaokarive a'evo taiko jẽ aiko rõmõ. 18 Pirujẽ nivoia pe wyi erereko katu jẽtà erereko, ajaate ereraatà wena kyty opyri taiko karuaru. A'e kuwasi jamoe'e karuaru kuwa mijã. Õ'õ, awyje katu ãwĩvo jamoe'e karuaru jaiko ipi.
Kareta moawyjepaa
19 Apota ajimory Pirisira rè kareta akusiwa mã'ẽ rupi.b Ãmõ, imẽnà Akira rè apota ajimory. Nemã'ẽ ee kõ remẽ, aepo ere ijupe kõ. Aepo ere teve Onesipuru pè, etãrãgwerà kõ pè teve. 20 Ejimorypa Erasitu Korĩtu taa pè opyta oposiko ky'y.c Ãmõ, ejimorypa Toropimu Miretu taa pè aity ajo, itekorã rewarà mõ. 21 Kuise'ẽ ejo eresa ajawyi. Ãmãnà kyrypy e'ãve ejo eresa, a'e ene.
Kejõ opota ojimory nere eremikusiwarerà rupi. Eupuru. Ãmõ, Putẽ. Ãmõ, Rinu. Ãmõ, Karautia. Ãmõ, pirujẽ ike rupiwarà kõ, Jesu koty rewarà kõ. Mokopejõ opota ojimory nere mãe kõ.
22 Janerõvijã ywete ikõ nepyri toiko ipi nẽ, a'e ene. Ãmõ, tanerereko katu teve ikõ okatuaya rupi nerereko ipi nẽ, a'e ene.
[Awyjepa akusiwa kareta neupe ajupa.]