“Terejimokasi sota vo mã'ẽ rõmõ”, e'i mã'ẽ
2
Era'yry vo ene, tuku. Ajawyi kee a'e tarà mijẽ ene. Kiristu Jesu revejẽ ikõ tereiko ipi nẽ, a'e ene. A'e nemokasiarà rõmõ ekoi. Nerereko katu jẽtà nerereko ipi. 2 Jypy remẽ ojipyri jaiko remẽ itõkõ, neenu katu eremimojenuwerà kõ. Nemã'ẽma itõkõ aty wasu kõ amotekokuwa remẽ ipi. Ajawyi ene ve eayvukwerà kõ rè teremo'e jane kõ temirovija kõ imotekokuwa kõ ipi ky'y. Ãmẽ tè a'e kõ ve okuwa katutà. A'evo remẽ neremimo'ekwerà kõ ve ajaire poromo'età teve iko ipi.3 Ãwitõ ãmõ kõ emoai Kiristu Jesu koty rewarà rõmõ aiko rewarà mõ, ãwĩvo ve nemoaità kupa. Ajamã'ẽ a'evo ipe nerereko kupa remẽ, terepoi e'ã ikõ Jesu rerovijaa wyi ipi nẽ. Sota rè tè poromosã'ãgatà nemotekokuwaa rõmõ. Ãwitõ sota ikatu mã'ẽ oõvijã werovija katu jẽ jiapisia mẽ, ãwĩvo ve ikõ jimomorijaua pè tereiko ipi nẽ. 4 Ava mõ sota rõmõ ekoi remẽ, sota posikoa rè kõrijõ tè oja'a ipi. Oõvijã ayvu rupi katu ekoi ipi. Na'evoi sõ remẽ, sota rõvijã naory'ãi wemĩgwai kõ rè ãmẽ. [Ãwĩvo ve pejẽ, Kiristu koty rewarà kõ rõmõ peiko remẽ. Janejare'e morya rè ywesõ tapeja'a ipi.]
5 Ãmõ, kee a'e teve ene. Ojã mã'ẽ rè tè poromosã'ãgatà. Ava mõ ojã mã'ẽ rõmõ ojã remẽ, nojã te'ĩte'ãi ipi. Tõvijã “ejã” e'i remẽ tè katu ojãtà. Ãmõ, “Terejavy e'ã pee”, e'i tõvijã mã'ẽ rupi katu teve ojãtà. Na'evoi sõ remẽ, tõvijã nomoe'e'ãi ãmẽ. Oõvijã ayvu rupi katu ekoi remẽ tè omoe'età tõvijã ãmẽ. [Ajawyi a'evo tereiko, a'e neupe. Jesu rerovijaa rupi katu kõrijõ tereiko ipi, a'e neupe. A'evo remẽ tè Janejare'e orytà nere ãmẽ.]
6 Ãmõ, kee a'e neupe. Ãwitõ koo jarà rã'ĩ o'u ypy wemitã'akwerà ipi, a'e tè oposiko ywete ee ipi rewarà mõ. [Ãwĩvo ve japosiko ywete Janejare'e pè remẽ.] 7 Ajawyi kee a'e ene. Ejipy'amogeta katu ikõ pirujẽ eayvu rè ipi nẽ, a'e neupe. Ãmẽ ãwĩvo neiko remẽ, Janerõvijã ywete nemotekokuwatà ãmẽ ipi. Pirujẽ eayvukwerà rè netekokuwavaytà ãmẽ ipi.
8 Jesu Kiristu rè ikõ tereja'a jẽ ikõ ipi nẽ. Tãmõ Tavi Jeapyrerà e'eay tè Jesu. Janejare'e omomoera mã'ẽ tè a'e. Pirujẽ a'evo 'evoa amojenupa neupe maekwerà rè tereja'a jẽ ikõ neiko ipi nẽ. 9 Eremimojenuwerà rè noenu tari mãe kõ emopã'ã kupa ky'y. Epokwaoka kupa. Ãwitõ nivoi mãe kõ omopã'ã kupa ipi, a'evo erereko kupa. Opota ipe Janejare'e ayvu mojenua omomi kupa. Ajamã'ẽ manyvo noereko'ãi imomi kupa. 10 Ajimomorijauvay ipe remẽ, napi'ãi ajamã'ẽ Jesu ayvu mojenua wyi, ãwisõ tojirovija katu Kiristu Jesu rè kupa. Ãmẽ sõsi owaray iseny katu mã'ẽ kyty ootà oiko karuaru rõmõ iko Janejare'e pyri kupa ky'y. 11 Aje ywete kee eu:
Jesu revejẽ jamãnõma remẽ,
aje jaiko karuarutà ipyri ãmẽ.
12 Jajimomorijau ipe remẽ, tijajimo'y jẽ ee jaiko ipi.
Ãmẽ sõsi jaiko karuarutà ãmẽ ipyri jaiko.
Ojimojõvijã wasu remẽ, jane ve ipyri jaikotà ãmẽ ky'y.
Jõvijã rõmõ teve jaikotà ipyri ãmẽ.
Tijajimosĩoka e'ã iwyi nivoi mãe kõ rovake jaiko ipi.
“Erõvijã rõwã Jesu”, tija'e tite e'ã ãmẽ ovake kõ.
A'evo sõ jaiko remẽ, ivo ve, “Ekoty rewarà rõwã”, e'i tary ve janeupe ãmẽ Jesu. Janerovajatà ãmẽ.a
13 Ajamã'ẽ nijajirovijai sõ ee ky'y remẽ,
temirovija rõmõ ekoi jẽtà ãmẽ.
Wayvu katuay rupi tè ekoi mã'ẽ tè.
Niwari mã'ẽ tè.
Nomoteei wayvu mã'ẽ tè, eu ijupe.
“Janejare'e teremory ipi”, e'i mã'ẽ
14 Ãmõ, kee a'e. Jesu koty rewarà kõ pè neporegeta remẽ, kee tere mijẽ ijupe kõ: “Janejare'e reminu rõmõ kee a'e pejẽ. Moregetaa teitetea rõwã Jesu rekoa. Jiayvuvaja vajaa rõwã teve. A'evoa rè rõwã Janejare'e ayvu pemotekokuwatà! A'evoa rè nijanemokasioka'ãi Jesu rerovijaa ipi”, ere ijupe kõ.
15 Ãmõ, kee a'e teve ene. Ejimokasiay wete ikõ ivo katu teremotekokuwa jane kõ Jesu ayvu e'eay rè nẽ. Ãwitõ oposiko mã'ẽ noenõsĩ'ãi oposikoawerà, ãwĩvotà ene Janejare'e rovake. Ãwĩvo neiko remẽ, kee e'ità neupe: “Õ'õ, Jesu remĩgwai e'e tè ãwĩ”, e'ità ãmẽ Janejare'e neupe. 16 Janejare'e nomomojyi mãe kõ poregetaa rè ikõ terejapyaka e'ã nẽ. Ãmõ, kee e'i mã'ẽ rè terejapyaka e'ã: “Janejare'e aje ywete rõwã janeupe”, e'i mã'ẽ rè ikõ terejapyaka e'ã nẽ. Aepo jaa poromomoioka Janejare'e ayvu wyi ipi. 17 Ipojy mã'ẽ tè poromo'e rã'ãga mãe kõ ipi. Ãwitõ moe porosu'u remẽ, porooupa aykwerà. Ãwĩvo ve poromo'e rã'ãga mãe kõ janepy'a kõ rupi porooupa poromokasioka e'ãa. Nijanemotekokuwaokai. Imeneu a'evo ekoi ipi. Poromo'e rã'ãgagà iko ipi. Piretu a'evo ve ekoi. Ãwĩ kõ a'evo ekoi mãe kõ tè. 18 Ajawyi opoipa ywe'e tite Jesu rekoa e'e wyi kupa. Kee e'i tite poromo'e kupa ky'y:
– Jesu rè jajirovija ypy remẽ, janemomoerapa. Awyjepa. Jamãnõ remẽ nijapoera mijẽ'ãi, e'i tite a'evo mãe kõ.
Aepo rè Jesu koty rewarà kõ mõ ojapyaka ywe'e tite. Nojirovija ywe'ei tite Jesu rè ãmẽ kupa ky'y. 19 Ajamã'ẽ Janejare'e ayvu aje ywete mã'ẽ tè. Temirovija rõmõ tè ekoi ipi. Aje nijarovija pãnẽ'ãi ijayvu ipi. Ajare kee e'i Janejare'e ayvu e'e ojikusiwa: “Janerõvijã ywete okuwa okoty rewarà kõ ipi”,b e'i. Ãmõ kee e'i ojikusiwa: “Pirujẽ, ‘Janerõvijã ywete koty rewarà tè ije’, e'i mãe kõ nivoi tekoua wyi topoi ikenẽ”, e'i ikusiwa maekwerà.
20-21 Ajawyi poromo'e rã'ãga mãe kõ ayvu wyi terejireko katu neiko ipi. Ãmõ, moregeta teitetea wyi. Ãmẽ tè Jesu remĩgwai e'eay rõmõ neikotà neiko ãmẽ ky'y. Temiporukweràc rè tè poromosã'ãgatà. Tetã wasu wyry pè, iteetejẽ ijarà wemiporukwerà kõ wereko ipi. Yvyra temiporukwerà kõ, yjy temiporukwerà kõ, yvy karakuri temiporukwerà kõ teve. Naepyi mã'ẽ yvyra temiporukwerà kõ. Ãmõ, yjy temiporukwerà kõ. Ãwĩ ãwĩ kõ. A'e kõ kõ'ẽ jawe jawe ijarà oporu ipi. Na'evoi ãmẽ temiporukwere'eay kõ, ma'e yvy karakuri temiporukwerà kõ. Noposikoyty rã'ĩ ee ipi. Nijaporu teitetei ipi. Temiporukwerà epy wete mã'ẽ vo 'ejẽ tijaiko, Jesu remĩgwai e'eay rõmõ ipi. Ijupewarà mõ tè tijaiko. Ãmẽ tè oposikotà janereve ãmẽ iko. Wemĩgwai e'e rõmõ janererekotà ãmẽ ky'y.
22 Terejimokasi Janerõvijã ywete rekoa rupi neiko. Ãmõ, terejirovija ywete ee neiko ipi. Ãmõ, tereauvay jane kõ ereko ipi. Ivo katuay tereiko jane kõ pyterà rupi neiko ipi. A'evo tereiko. Ãmõ, pirujẽ Jesu koty rewarà kõ ve ta'evo ekoi. Nivoi tekoua pe wyi terejisyry nejireko katu neiko ipi. Terejimoja'y e'ã ikõ neiko ipi nẽ. Aje ywete poromotekokuwa mã'ẽ rõmõ tè neikotà ãmẽ.
23 Terejapyaka e'ã ijayvu teitete mãe kõ ayvu rè ipi, manyvo jaa rõmõ rõwã ijayvu kõ rewarà mõ. Poromoteitete ipi rewarà mõ. 24 Janerõvijã ywete remĩgwai tè ene rewarà mõ, ayvu teitete rupi tereiko e'ã ipi. Ikatusa rupi kõrijõ tè tereporegeta jane kõ pè neiko ipi. Teremotekokuwavay kõ kõrijõ Janejare'e ayvukwerà rè neiko, pirujẽ. Terejimopirai e'ã imotekokuwa kõ neiko ipi.
25 Neayvu noerovijai mãe kõ nemotekokuwatà remẽ, ikatusa rupi teremotekokuwa kõ ipi. Jikõ'õa rupi rõwã. Maevo Janejare'e 'Ãg kasia rupi ojimosĩokatà weko aiwerà reitypypyioka Janejare'e pè ãmẽ kupa. Ojimotekokuwatà Jesu rekoa aje ywete mã'ẽ rè ãmẽ kupa ky'y. 26 Ojeekyità ãjãgai rõvijã kasia pe wyi ãmẽ kupa ky'y, ojimotekokuwa paire. Kee. Ãjãgai rõvijã wereko poropyya vo sõ mã'ẽ. Jesu rekoa ojavyoka jane kõ pè remẽ, ãjãgai rõvijã rekoa rupi tè ekoi ywe'e titetà kupa. Ajawyi eko aiwerà rupi ekoi ywe'e titetà kupa ky'y. Ajamã'ẽ ojimotekokuwapa kupa ky'y remẽ, ojeekyità ãjãgai rõvijã po pe wyi kupa ky'y.