– Emokasi Pauru kõ Jõvijã Jesu ayvukwerà tomojenu jenu erokwa. Emokasi ojapyaka ee mãe kõ, tojapyaka katu ee kupa. Nerekoa rupi toiko ãmẽ kupa ky'y, tapejẽ ijupe.

Ãwitõ kwee remẽ pejapyaka katu enu, ta'evo kupa. Aepo pejẽ oreupewarà mõ Janejare'e pè peporegeta remẽ ipi.

2 Ãmõ kee tapejẽ:

– Terereko katu Pauru kõ poromojaiwe mãe kõ wyi, tapejẽ Janejare'e pè ipi.

Sikuwa pirujẽ rõwã Jesu rè ojirovijatà mãe kõ. Ãmõ ãmõgwerà kõrijõ tè ojirovijatà ee. [Ajawyi aepo pejẽ Janejare'e pè peporegeta oreupewarà mõ ipi, a'e pejẽ.] 3 Aje Janerõvijã ywete wayvukwerà rupi katu ekoi ipi. Ajawyi, aje ywete pepy'amokasità ipi. Aje nivoi mã'ẽ rõvijã wyi pemokasità penereko katu ipi. 4 Orokuwa oreayvu rupi peiko jẽ peiko ipi. Orokuwa teãmã napepoi'ãi iwyi. Janerõvijã ywete orepy'amopiryvypy katu a'evoa rè ipi.

5 Janerõvijã ywete tapepy'amokasiay jẽ, ãwisõ kee tapejẽ: “Aje ywete Janejare'e remiauvay tè ije”, tapejẽ. Napeity ywe'e tite'ãi ãmẽ. Pejimokasiay jẽtà ee peiko. Ãwitõ Kiristu Uu remimota rupi oiko jẽ omãnõa pe'ĩ, ãwĩvo ve tapeiko nẽ.

6 Ãmõ tè mijẽ amome'utà pejẽ, eretãrãgwerà kõ. Janerõvijã Jesu Kiristu ayvukasia rupi tè kee a'e pejẽ. Jesu koty rewarà mõ sõ nijeweri iko ipi remẽ, noenu tari sõ oreayvukwerà remẽ, tapejisyry ikõ iwyi nẽ. Nivoi a'evo ekoi rewarà mõ a'evo tapeiko. 7 Emã'ẽ. Pepyterà rupi oroiko remẽ itõkõ oroposiko ywete ipi. Oreewe katu itõkõ oroiko ipi. A'evoa pekuwapa. Ajawyi orereruparà mõ tapeiko, a'e pejẽ. 8 Ajawyi ava mõ ome'ẽ ja'umã'ẽ mõ oreupe remẽ itõkõ, oromoepy tè katu kõ tè ipi. Ãmõ, kõ'ẽ jawe jawe teve itõkõ oroposiko wete ipi. Oreaiva ipe remẽ oroposiko jẽ. Norerako'i pene. Orevote orema'e kõ oropyy ipi. Ãmẽ orerako'i sõ pene remẽ, epy wete mã'ẽ vo kuwa oroiko penovake mijã. 9 Ajamã'ẽ tepy e'ãte kuwasi orojimi'u pepyri mijã, pemotekokuwaarà tè ore rewarà mõ. Ajamã'ẽ oropota tè ivo oreikoa mojikuwa pejẽ. Ajawyi tè norerako'i pene penemi'õ rè ipi. Oroposiko ywete kõrijõ itõkõ oroiko, orema'e rã repy rã rè, oreremi'õ rã repy ãrã rè teve. Ajawyi orereruparà mõ tapeiko, a'e pejẽ. 10 Kõitokõ jypy remẽ kee oro'e pejẽ:

– Ava mõ sõ nijeweri oposiko ipi remẽ ikõ, ja'umã'ẽ tapeme'ẽ e'ã ijupe ipi nẽ, oro'e pejẽ.

11 Ajamã'ẽ kee e'i mã'ẽ oroenu: “Oiko Tesaronika taa wãnà kõ mõ, nijeweri tesõ iko, Jesu koty rewarà kõ teipe remẽ. A'e kõ oo oo kõrijõ oporegeta teitete rõmõ ãmõ kõ pè ipi”, e'i mã'ẽ. [Ajawyi tè orokusiwa oreayvukasia mõ ijupe kõ imono aã kareta rupi.] 12 Ajawyi a'evo mãe kõ pè kee oro'e Janerõvijã Jesu Kiristu ayvu rupi imono. Tapeposiko ikõ penemi'õ rã repy rã rè ipi nẽ. Pema'e rã repy rã rè teve tapeposiko. Ãmõ, tekoua katua rupi ikõ tapeiko ipi nẽ. Aepo oro'e imono nijeweri mãe kõ pè, pepyterà rupiwarà kõ pè.

13 Pejẽ ãmẽ, kee a'e, eretãrãgwerà kõ. [Jesu rekoa rupi ikõ tapeiko jẽ nẽ, a'e.] Tapenerekoiva e'ã ikõ ivo peikoa nẽ, ivo poroerekoa ve.

14 Ãmõ, kee a'e pejẽ. Ava mõ sõ aã oreremikusiwarerà noenu tari remẽ, tapejimory e'ã ikõ ee ãmẽ nẽ. Maevo wekoa aiwererà rè ojimosĩokatà ity ãmẽ ky'y. 15 Ajawyi ikatusa rupi ikõ apijarerà tapemogeta ipi nẽ. Tapemoãtãre'ã e'ã ikõ ajamã'ẽ imogeta nẽ. Peãpã rõwã ajamã'ẽ. Penetãrã tè. Ajawyi ikatusa rupi tapemogeta ipi.

16 Maipe rupi peiko remeve ikõ Janerõvijã ywete tapepy'amopiryvypy katu ipi nẽ. Peneve ikõ toiko ipi nẽ. Manyvo peiko ipi remẽ teve, a'evo ikõ tapenereko nẽ, janepy'amokatuarà tè Janerõvijã rewarà mõ.

17 Age'e ije ywete akusiwa ajupa ky'y, epo pè tè. Ije, Pauru. Apota ajimory pene eremikusiwarerà rupi. Ãwĩvo akusiwa imoawyjepa ipi. Ajawyi age'e a'evo akusiwa ajupa.

18 Janerõvijã ywete Jesu Kiristu. A'e ikõ tapenereko katu okatuaya rupi ipi nẽ.

[Awyjepa ãmẽ eremikusiwarerà ky'y.]