Janejare'e ãpã rewarà
2
Kãramõ Janerõvijã Jesu Kiristu uu mijẽ remẽ, janemoatytà opyri tijaiko. A'evoa oromojenupa pejẽ, eretãrãgwerà kõ.a 2 Ajamã'ẽ oiko ãmõ kõ pepyterà rupi, ãmõ rupi tè omojenu mãe kõ mõ. Kee e'i tite kupa:– Ovãema sikaepo Janerõvijã ywete! Aepo e'i Pauru kõ oreupe jypy remẽ. Aepo jaa okusiwa teve imuroka oreupe kareta rupi, e'i tite kupa.
Aepo noro'ei ajamã'ẽ. Ajawyi taperovija ywe'e tite e'ã ijayvu kõ. Tapejimonyi tite e'ã teve enu. 3 Tapejimoripeoka e'ã tite ijupe kõ, novãeive Janerõvijã rewarà mõ. Keetà rã'ĩ ovãetà remẽ. Jane kõ ojimoãpãtà Janejare'e rè iko. Jesu werovija rã'ãga maekwerà kõ a'evotà ekoi. Ãmõ, noerovijai mãe kõ a'evotà ekoi. A'e a'e kõ ojimoãpãtà Janejare'e rè. A'evo remẽ si Janejare'e ãpã ojikuwatà jane kõ pè. Ipojy ai wete mã'ẽ tè a'e. A'e jimomorijau wasua rena kyty oo 'atà tè ojimomorijaua rã mõ. 4 A'e kee e'i rã'ãgatà jane kõ moripea rõmõ:
– Ije rõmõ'ĩte Janejarà temimoe'e rõmõ, e'i rã'ãga ywe'e titetà oupewarà mõ.
Ajawyi Janejarà rã'ãgawerà kõ jimoãtãgwerà kõ pè, “Temimoe'e rõwã ãwĩ”, e'i rã'ãgatà ijupewarà mõ. Ãwĩvo ve Janejare'e pè tẽ tesõ, “Temimoe'e rõwã”, e'i rã'ãgatà teve. Ajawyi Janejare'e moe'ea retã wyry pè tẽ tesõ oiketà ojimoe'eoka rã'ãga ipe mijã.
– Janejare'e tè ije! e'i rã'ãgatà.
A'evo ojimoe'eoka rã'ãgatà, Janerõvijã vãe e'ãve. 5 Aiko jẽ pepyri remeve itõkõ a'evoa amojenu jenupa pejẽ. Penearaipa põ aepo wyi? Napekuwai põ ky'y? 6 Na'evo'ãive ajamã'ẽ, nonurive Janejare'e ãpã rewarà mõ. Pekuwa ava põ nomurokarive mã'ẽ. A'evoa rã 'arà okwa remẽ tè a'evotà. Ãmẽ tè katu ojisatà ky'y. 7 Oiko age'e remẽ aiwea ojimosãi teãmã upa. Teã'ã rupi ojimosãi upa. Noporokapaive ajamã'ẽ. Ajamã'ẽ a'evoa pewarà mõ rõwã aepo a'e. Janejare'e ãpã nojisa'ãive, nomojisaokai mã'ẽ uve jẽ rewarà mõ. A'e Janejare'e wekyi remẽ tè katu ojisatà ky'y. 8 Aja paire tè Janerõvijã Jesu owyjytà yva pe wyi uu ky'y. Okasia reny revejẽ owyjytà ojisa. Ãmẽ si omomatà wãpã wayvukasiaya rupi ky'y.
9 Keetà rã'ĩ Janejare'e ãpã, Jesu nowyjyive remẽ. Ikasiaytà Satanasi kasia rupi. Mãrãnà jikuwa e'ã iteetejẽ oinõ rã'ãgatà, ãwisõ jane kõ “aje ywete” te'i tite ee omãjã. Ipojy ai wete mãe kõ oinõ rã'ãgatà. Ãjãgai rõvijã Satanasi kasia rupi tè a'evotà ekoi.b 10 Ãmẽ ojiemavo mãe rã kõ ojimoripeokatà ijupe. Iteetejẽ waiwererà rupi ojimoripeokatà kupa. A'e kõ ajaire Janejare'e wemavotà ity oo, “aje” ne'i ywe'e tite ijayvu e'e pè kupa rewarà mõ. Nopotai ijayvu renu kupa. Nojireko katuokari Janejare'e pè kupa. 11 Ajawyi Janejare'e opotatà tè imoripearà kõ tomoripe kõ. A'e kõ jẽsi “aje” te'i tite waria pè, ajawyi. 12 A'evoa repykarà mõ a'e jane kõ Janejare'e wemavotà. “Aje ywete teãmã” Janejare'e ayvukwerà pè eu ipi. Ajamã'ẽ “aje” ne'i ijayvukwerà pè kupa. Ojimoane'e jẽ waiwererà rè kupa. Ajawyi a'e kõ pirujẽ Janejare'e wemavotà ity oo ky'y.
“Tijajimokasi jẽ jaiko ipi”, e'i mã'ẽ
13 Na'evoi pejẽ ajamã'ẽ, eretãrãgwerà kõ. Janerõvijã ywete remiau kõ tè pejẽ. Janejare'e pepyteporopa wemireko kõ rõmõ tapeiko. Jane ypy reko remeve pepyteporopa amãtejẽ. [Penereko katu jimomorijau wasua wyi.] O'Ãg rupi katu penereko ipi. Janejare'e ayvu e'eay aje ywete mã'ẽ pè “aje” pejẽ rewarà mõ tè a'evo penereko. Ajawyi pene orerory mã'ẽ oromome'u Janejare'e pè ipi. 14 Ãwĩvoa rã teãmã pemuroka okoty. Wayvu e'eay Kiristu rewarà rupi pemuroka okoty, oromojenu pejẽ remẽ. Wemireko katu rã kõ rõmõ pemuroka okoty. Ãwitõ Janerõvijã Jesu Kiristu wereko katu, ãwĩvo ve penereko katutà eevejẽ. 15 Ajawyi, kee a'e pejẽ, eretãrãgwerà kõ. Tapejimokasi jẽ ikõ ayvu aje ywete mã'ẽ rerovijaa rè nẽ. Kõitokõ pepyterà rupi aiko remẽ, poromotekokuwa amãtejẽ ee. Ãmõ, kareta rupi poromotekokuwa jẽ ee. A'e rè ikõ tapejimokasi jẽ peiko nẽ, a'e pejẽ.
16 Janerõvijã Jesu Kiristu ikõ tapemokasi ipi nẽ, Janeruwasu reve. Janerau mã'ẽ tè Jesu. Okatuaya rupi janemokasi mã'ẽ tè a'e. Nopi'ãi janemokasia wyi mã'ẽ tè a'e. Eeve jaikoa rã rè janemoja'aoka teve okatuaya rupi janerereko mã'ẽ tè. 17 A'e ikõ tapepy'amokasi jẽ ipi nẽ. Ikasia rupi ivo tapeiko jẽ ipi. Ivo tapejẽ ve ipi.