“Nekasi aiko remẽ ywesõ si Kiristu emokasioka”, e'i mã'ẽ
12
Napotai epe erewarà rè ajimoe'e aiko ipi. Ajamã'ẽ ajimoe'e jẽ pene aiko, ãwisõ nimanyvo'ãi epe remẽ. Janerõvijã ywete omojisaoka eupe mã'ẽ amome'utà pejẽ. 2 Jypy remẽ, [Janejare'e reve aporegeta ajupa remẽ,] emovy ereraa rã'ĩ tè yva pupe. Wena kyty tẽ tesõ ereraa. 14 kwaray rõmõ tesõ arokwapa a'evo ereraa paire. Maevo e'ãg kõrijõ tè weraa yva kyty. Ãmõ, epirà teve maevo weraa. Ije ajamã'ẽ nakuwai epirà revejẽ ereraa remẽ. Janejare'e kõrijõ tè okuwa. 3-4 Akuwa Janejare'e ereraa, a'e wena ikatuay mã'ẽ kyty. Ma'e remẽ aje a'evo. Ma'e remẽ apouvai tè. Nakuwai. Janejare'e tè okuwa. Ayvu katuay wete tẽ tesõ aenu a'e kyty wyi ajo. Ava nomome'u kuwa'ãi aenu maekwerà. 5 Ãwĩvo aiko maekwerà rè ajimoe'e kuwa aiko ãmẽ. Ajamã'ẽ najimoe'ei aiko. Epikasi e'ãa rè kõrijõ tè ajimoe'e aiko. [Jesu kasia rupi kõrijõ aiko mã'ẽ rè kõrijõ ajimoe'e aiko.] 6 Apota sõ ajimoe'e remẽ, aje ywete mã'ẽ rè kõrijõ tè kuwa ajimoe'e aiko. Eawyry mã'ẽ vo rõwã kuwa ajimoe'e ãwĩvo aiko remẽ. Ajamã'ẽ napotai ajimoe'e penovake aiko mã'ẽ. Pemã'ẽ manyvo aiko pepytery pè aiko remẽ ipi. Peenu teve poromotekokuwa ajupa remẽ ipi. Penemikuwa rupi tè apota emosã'ãga pekupa, ajawyi.7 Aje, Janejare'e omojisaoka ikatuay wete mã'ẽ eupe. Ajamã'ẽ nopotai ajimoe'e ywe'e tite aekwerà rè aiko. Ajawyi ayay mã'ẽ omonooka ije taporu. Ãwitõ Satanasi remimuu emomorijauvay sõ remẽ, ãwĩvo ajimomorijau ayay mã'ẽ rè aiko. 8 Kee a'e ipe Janerõvijã ywete pè: “Emokatu rejupa!” a'e ipe ijupe ipi. Moapy tesõ aepo a'e tite ijupe. 9 Ajamã'ẽ kee e'i ije: “Ãnĩ. Noromokatu'ãi. Ajamã'ẽ moko oroerekooka ipe remẽ, oroauvay jẽ aiko. Noroity'ãi teve aiko. Nanepikasi remẽ ywesõ sitõ ekasia ikasiaytà neupe ãmẽ”, e'i ije. Ajawyi nekasi epe aiko remẽ, erory jẽ aiko. Ajimoe'età epikasi e'ãa rè aiko ãmẽ, ãwĩvo remẽ ywesõ Kiristu kasia rupi tè aikotà ky'y rewarà mõ. 10 Ajawyi erory jẽ aiko ipi, ãwisõ nepikasi 'ete ipe aiko remẽ. Ãmõ kõ ererõarõ ipe remẽ, na'ei ajamã'ẽ ijupe kõ ãmẽ ipi. Erory jẽ aiko ipi. Ãmõ, ajimomorijau ipe aiko remẽ. Ãmõ, emomorijau ipe kupa remẽ. Ãmõ, waypea rupi aiko ipe remẽ. Manyvo nyvo jẽ aiko ipe Kiristu koty rewarà rõmõ aiko remẽ, erory jẽ aiko ipi. Nepikasi aiko remẽ ywesõ si Kiristu emokasioka erereko ipi, ajawyi.
Pauru ojipy'amogeta ywete Korĩtu wãnà kõ rè remẽwarà
11 Aje, eawyry mã'ẽ ayvu vo 'ejẽ maevo sõ tite aiko, ivo aiko mã'ẽ rè ajimoe'e remẽ. Penewarà mõ tè a'evo aiko ajamã'ẽ. Pejẽ ywesõ kuwasi emoe'e pekupa mijã. Ãmõ kõ ywesõ rõwã ewyi, ãwisõ, “Ore ywesõ Jesu remimono kõ rõmõ oroiko”, e'i epe pejẽ kupa remẽ. 12 Janejare'e tè itõkõ okasia omojisaoka pejẽ, pepytery pè aposiko aiko remẽ. A'evoa rupi itõkõ emojikuwaoka wemimono e'e rõmõ taiko. Waypea rupi aiko remẽ itõkõ, ajimokasi jẽ aposiko pepytery pè aiko ipi. Ajawyi ekuwa kuwasi Jesu remimonokwere'e rõmõ pekupa mijã. 13 Ãmõ, Jesu koty rewarà kõ rena kõ rupi aiko remẽ, a'e wãnà kõ oma'e mõ ome'ẽ eupe ipi. Ajamã'ẽ pepyryvo aiko remẽ, naporanui pema'e rè ipi. Ajamã'ẽ ãwĩvo ipe aiko pepytery pè remẽ, manyvore põkõ pejẽ ywe'e tite eupewarà mõ: “Pauru nijanepota ywe'ei. Ãmõ kõ ywesõ opota katu janewyi”, pejẽ ywe'e tite eupewarà mõ. Pema'e rè sõ aporanu remẽ, ikatu kuwa pejẽ mijã. Emoe'e kuwa pekupa ãmẽ mijã.
14 Mõrijõ tesõ aa penesa mijã. Age'e apota mijẽ aa penesa. Ajamã'ẽ aa remẽ, eoa repykwerà rè naporanu'ãi pejẽ, “Tiwaype e'ã ijupe kõ”, a'e peupewarà mõ rewarà mõ, poroauvay aiko wyi. Eãkarã vo 'ete pejẽ. Ajawyi apota teve erauvay pekupa. Emã'ẽ. Ãwitõ tuu tè oja'a wãkarã kõ rè ipi. Ajawyi, “Peja'a kuwasi ere”, ne'i ijupe kõ ipi. “Aja'atà pene”, e'i ijupe kõ. Ãwĩvo ve ije. Ajawyi pema'e kõ mõ rè naporanu'ãi. 15 Eroryvay pirujẽ emoma'e kõ ame'ẽma kuwa jimo'yjẽ, pepãtavõa rõmõ remẽ. Poroauvay rewarà mõ, emoma'e pirujẽ kuwa ame'ẽma [ãwisõ Jesu Kiristu rè tapeja'a] mijã. Apota poromokasi ipi rewarà mõ, emãnõa wyi nakyjei aiko. Ãwĩvo poroauvay aiko rewarà mõ sipõ nerau ywe'ei pekupa? 16 Karakuri mõ jẽ rõwã itõkõ apyy pewyi. Manyvore põ poromoripe mã'ẽ vo 'ejẽ erereko jẽ pekupa? 17 Nerako'i 'eteay itõkõ pene aiko ipi. Amono ypy pekoty mãe kõ teve itõkõ naeako'i pene iko ipi. Napemoripei penereko kupa ipi. 18 Titu itõkõ napemoripei penereko, amono pekoty remẽ. Ãmõ eremimonokwerà teve itõkõ napemoripei, Titu rupi oo maekwerà. Evo jẽ naeako'i itõkõ pene kupa. Ojevo jẽ itõkõ oroiko.
19 Maevo kee pejẽ tite ekareta pemogeta remẽ: “Ojireko katu Pauru kõ age'e simo'y ee mã'ẽ wyi”, pejẽ tite maevo ije. Ãnĩ! Na'evo'ãi aiko. Orepy'a pewarà Janejare'e okuwa katu. Pirujẽ Kiristu e'i oreupe toromojenu peupe mã'ẽ tè oromojenu pejẽ ipi. Ajawyi kee jaa tapekuwa, ejimorypa katu kõ. Pirujẽ manyvo nyvo jẽ oroiko remẽ, pemokasia kõ rõmõ tè oroiko ipi. A'evo oroiko mã'ẽ tè ore. 20 Maevo avãe mokope remẽ, ije tè ãmõ rupi tè amã'ẽtà pene. Maevo eremimotarà rupi rõwã poroesatà avãe. Ije ve penemimotarà rupi rõwã eresatà pekupa ãmẽ. Ma'e remẽ agyvo sikaepo peiko ipi. Peayvu teitete sikaepo ojiupe peiko ipi remẽ. Pejimoa'u teve sikaepo ojeeve peiko. Ãmõ, pejikõ'õ teve sikaepo ojeeve peiko. Ãmõ, pejimoe'y e'yi sikaepo ojiwyi peiko. Ãmõ, peayvu ai teve sikaepo ojiupe peiko. Ãmõ, pejimovyvyrai tè sikaepo peiko. Ãmõ, pejimoe'e tite sikaepo peiko. Ãmõ, peiko teitete teve sikaepo peiko. A'evo 'evo maevo sikaepo peiko remẽ. 21 Ma'e remẽ kee peiko mã'ẽ rõmõ poroesatà avãe remẽ. Ma'e remẽ napeityi 'eteay peaiwererà wyi, karamoewarà wyi. Ma'e remẽ aekwerà ve jẽ peiko. Pejipy'amoky'a jẽ peaiwererà rè peiko. Pejimomy'a jẽ peiko. Napejimosĩoka miti ma'e remẽ peaiwererà rè peiko. Pejimoane'e jẽ ee peiko. A'evo sõ peiko remẽ, emoãgyoaytà pekupa ãmẽ. Maevo emoja'o ywetetà pekupa ãmẽ, Janejare'e reminu rõmõ. Ãmõ, penewarà mõ ajimosĩoka tevetà Janejare'e rovake aiko, poromoe'e pãnẽ ãmõ kõ reminu rõmõ rewarà mõ.