Poromo'earà rã'ãga kõ rewarà
11
Eawyry mã'ẽ vo tesõ aju ajupa, akusiwatà remẽ ky'y. Ajawyi tapenerekoiva e'ã eayvu, eawyry mã'ẽ ayvu vo peenu eayvu remẽ. 2 Epy'a jikõtevẽ tesõ pene aiko. Ãwitõ Janejare'e ipy'a jikõtevẽ janere iko ipi, ãwĩvo ve penuu vo jẽ ije aiko rewarà mõ, epy'a jikõtevẽ ywete pene aiko. Ãwitõ janerajyry temiporu e'ã, ãwĩvo ve pejẽ eupe. Okãte'ã mã'ẽ vo 'ejẽ ije, pe'ĩ mã'ẽ rerekwarà rõmõ tapeiko. Ãwitõ tuu ome'ẽ wajyry kõjãmukukyry ivo katuay wete mã'ẽ rõmõ imẽnà pe'ĩ mã'ẽ pè tè, ãwĩvo porome'ẽtà pe'ĩ mã'ẽ pè teve, a'e Kiristu pè porome'ẽtà. Ivo katuay wete mã'ẽ rõmõ apota peikoa. Ãwĩvo apota Kiristu rè pekãte'ã peiko ipi. 3 Tapejimoripeoka e'ã ikõ poromo'e rã'ãga mãe kõ pè nẽ, a'e pejẽ. Ãwitõ karamoe remẽ sa'i Eva ojimoripeoka moe tekokuwaa rã'ãga pè, tãwĩvo e'ã ikõ peiko nẽ, a'e pejẽ.a Napotai Kiristu wyi pepoi ywe'e tite pejimoripeokaa rupi peiko mã'ẽ. 4 Jesu rè poromo'e rã'ãga mãe kõ ãmõ rupi tè omojenu pejẽ kupa ipi. Oreremimojenuwerà vo rõwã omojenu pejẽ kupa. Ajamã'ẽ a'e kõ ayvu peenu remẽ, penory tite ãmẽ peiko ipi, ãwisõ Janejare'e 'Ãg rupi rõwã pemo'e rã'ãga kupa remẽ. Ãmõ 'ãg rupi teipe pemo'e rã'ãga kupa ipi. A'e kõ poromoripe mãe kõ rõmõ tè ekoi. Janejare'e ayvu e'e wekovijanõ rã'ãga ãmõ ayvu pè tè kupa. “Janejare'e ayvu tè oromojenu”, e'i rã'ãga kupa ipi. Ajamã'ẽ iwarite kupa. 5 “Ore ywesõ Jesu remimono kõ rõmõ oroiko”, e'i tite ojimojõvijã rã'ãga pe'arà kyty iko kupa. Ajamã'ẽ a'e kõ ywesõ rõwã ewyi. 6 Maevo ikujaukwerà rupi rõwã aporegeta pejẽ ipi. Ajamã'ẽ Janejare'e ayvu rè atekokuwavay mã'ẽ tè ije. Ãwĩvoa pekuwa. Pemã'ẽ itõkõ orere ipi, kõ'ẽ jawe jawe iteetejẽ oroposiko katu ipi remẽ.7 Poromotekokuwa Janejare'e ayvu rè remẽ itõkõ, kee na'ei pejẽ ipi: “Janejare'e ayvu mojenua repykwerà tapeme'ẽ ije”, na'ei pejẽ ipi. Najimojõvijãokai teve itõkõ pene aiko ipi. Temĩgwai vo 'ejẽ aposiko tepy e'ãte peneve ipi. Tepy e'ãte aposiko rewarà mõ tè sipõ napeenui eayvu peiko? 8 Poromotekokuwa aiko remẽ itõkõ ãmõ Jesu koty rewarà kõ mõ tè karakuri omuroka eupe ipi mijã. A'evo tè itõkõ karakuri apyy ipi. A'evo remẽ pemotekokuwaa repykwerà rõmõ rõwã aposiko pepytery pè aiko. 9 Poromo'e ypy aiko remeve itõkõ, naporanui aiko pejẽ ipi, ãwisõ eporijau ipe aiko remẽ. Jesu koty rewarà kõ Masetonia yvy pe wyi uu remẽ, weru eporijau ee mãe kõ pirujẽ eupe kupa. Jypy remeve a'evo aiko. A'evo jẽ tè age'e aiko. Ajawyi naporanui pejẽ ipi.b 10 Akaja yvy rupi a'evo aiko ipi, pirujẽ taa kõ pè aiko remẽ. Kiristu rovake aje ywete aepo a'e. Tepy e'ãte poromotekokuwa Janejare'e ayvu rè remẽ, eupe ikatuay. Ajawyi ava pè jẽ rõwã aporanu ipi. 11 Manyvore rõwã naporanui pejẽ aiko. Noporoaui rewarà mõ rõwã naporanui peupe! [Napotai imowasu peupe rewarà mõ tè naporanui peupe!] Poroauvay rewarà mõ teve a'evo oroiko! Janejare'e okuwa a'evo oreikoa.
12 Aekwery vo jẽ tè aikotà. Janejare'e ayvu rè tepy e'ãte poromotekokuwa ipi mã'ẽ rõmõ tè aiko. Namotee'ãi ãwĩvoa. Kee rewarà mõ. Poromo'e rã'ãga mãe kõ kee e'i ipi: “Janejare'e remipyteporokwerà kõ teve ore oroiko, Pauru vo”, e'i rã'ãga kupa ipi. Ajamã'ẽ orevo rõwã a'e kõ ekoi, apijarà kõ rõwã ore rewarà mõ. [Epykwerà rupi tè oposiko iko kupa ipi. Noposiko'ãi tepy e'ãte kupa ipi. A'evoa rupi ojikuwa evo rõwã mãe kõ rõmõ iko kupa.]
13 Kiristu remimonokwerà rã'ãga tè a'e kõ. Poromoripe mãe kõ tè. Iwarite Kiristu ayvu mojenua e'e kõ rõmõ maevo sõ tite ekoi kupa remẽ. 14-15 A'evo ekoi kupa remẽ, oõvijã Satanasi reruparà mõ tè ekoi kupa ipi. Ãwitõ ãjãgai rõvijã Satanasi poromoripe ipi. Ivo rã'ãga ekoi ipi. “Janejare'e remĩgwai tè ije”, e'i rã'ãga poromoripea rõmõ ipi. Ãwĩvo 'ejẽ poromo'e rã'ãga mãe kõ ekoi ipi, eruparà mõ. Ajamã'ẽ kãramõ Janejare'e wepyme'ẽ kõtà, ekoawerà aiwerà kõ rupi katu.
Pauru jimomorijaua rewarà
16 Pemã'ẽ rã'ĩ! Eawyry mã'ẽ vo terereko e'ã pekupa. Aepo a'e py'yi tesõ pejẽ aiko ky'y. Ajawyi aepo pejẽ eupe remẽ, tapeenu jẽsi eayvu. Eawyry mã'ẽ ayvu vo 'ejẽ ipe mijã. Ãwĩvo aiko remẽ, ajimoe'età peneminu rõmõ aiko ky'y. 17 Aje Janerõvijã ywete ayvu rupi rõwã ejimoe'ea rè aporegetatà pejẽ. Aje ywete eawyry mã'ẽ vo 'ejẽ maevo sõ tite aporegetatà pejẽ aiko ky'y. 18 Ãmõ kõ mõa'ãrõwã aje ojimoe'e teywete weko rè iko mãe kõ. A'evo remẽ, “aje ywete” pejẽ tite ijayvu kõ pè peiko. Ije ve ajawyi ta'evo aiko ky'y. Ajimoe'eoka tary ve peupe ky'y. 19 Otekokuwa mã'ẽ vo ipe pejẽ. Ajamã'ẽ eawyry mãe kõ ayvu rè penory jẽ peiko. “Aje mã'ẽ tè” pejẽ ywe'e tite ijayvu kõ pè ipi. 20 Ãwisõ pemoaia teipe remẽ, peenu katu jẽ ywe'e tite ijayvu kõ ipi. Wayvu pupe tè penereko ipe kupa ipi. Pemoma 'ete ipe karakuri pemoripea rupi. Penerõarõ ipe kupa ipi. Penereko ai epe kupa ipi. [Manyvore ywete põ peenu jẽ tesõ ijayvu kõ ãmẽ!] 21 Ajamã'ẽ ije najimojõvijãokai peupe aiko ipi. Ajawyi, “Nikasi Pauru ayvu”, pejẽ tite eupewarà mõ ipi.
A'e kõ ojimoe'e ywete remẽ, peenu katu ijayvu kõ ipi. Ãwĩvo remẽ sipõ pepota? Ajawyi ta'evo aiko ky'y! Aje eawyry mã'ẽ vo 'ejẽ aporegetatà pejẽ ky'y! [Ãwĩvo remẽ maevo peenutà eayvu ãmẽ ky'y!] 22 Kee ta'e ajawyi. Epereu ayvu rupi oporegeta mãe kõ tè kupa remẽ, a'evo ve ije. Epereu ayvu rupi aporegeta mã'ẽ teve ije!c Isaeu jeapyrerà tè kupa remẽ, a'evo ve Isaeu jeapyrerà teve ije! Ãmõ, tãmõ Aparão jeapyrerà tè kupa remẽ, a'evo ve tãmõ Aparão jeapyrerà teve ije! 23 Kiristu remĩgwai rõmõ oposiko kupa remẽ, ije teve aposiko a'e rõmõ aiko. Ajamã'ẽ ije ywesõ aposiko iwyi kõ aiko. (Agyvo aporegeta remẽ, eawyry mã'ẽ ayvu vo tesõ aporegeta ky'y. Ajamã'ẽ nimanyvoi eupe.) Aje iwyi kõ wetesi aposiko aiko ipi. Ãwĩvo ve ije ywesõ teve emopã'ã erereko kupa ipi. Iwyi kõ wetesi enõpã tè erereko kupa ipi. Iwyi kõ wete ve werywete ejuka kupa ipi.d 24 Agyvo aiko Kiristu remĩgwai rõmõ aiko. 5 rõmõ tesõ kõ Juteu kõ epyy enõpã nõpã, teima pirerà jimõjãgwerà pupe. A'evo ve enõpã nõpã kupa remẽ upi upi, 39 rõmõ tesõ enõpã kupa ipi!e 25 Ãmõ kõ, Romã pewarà kõ enõpã nõpã yvyra pupe. Moapy tesõ a'evo erereko kupa. Ãmẽ kõ pe'ĩ'yte ejapi japia takuru pè kupa. Ãmõ, nawiu rupi aa remẽ, ojipypy ereve. Moapy teve a'evo aiko. Ãmõ remẽ kõ orojipypy remẽ, pãranã pipo pipokwerà rupi ekõ'ẽma tè. Ajaate karumẽ arokwapa pãranã pupe aiko.f 26 Ãwĩvo ajimomorijau taa kõ rupi aa aa aiko remẽ ipi. Yy erevuru remẽ kõ werywete emomarama. Ãmõ remẽ kõ, imona mãe kõ werywete emomarama teve, pee rupi aa aiko remẽ. Ãmõ remẽ kõ, eretãrãgwerà kõ yveve tesõ emomarama. Ãmõ remẽ kõ, Juteu rõwã mãe kõ ve werywete emomarama. Ãwĩvo ajimomorijau aiko ipi, taa kõ rupi akwa remẽ. Tekoe'ãma rupi teve a'evo aiko ipi. Ãmõ, pãranã wasu mytery pè a'evo aiko teve. Ãmõ, Jesu koty rewarà rã'ãga kõ po pè ajimomorijau teve aiko.g 27 A'evo 'evo aiko ipi. Aposiko ywete aiko ipi. Ajimomorijauvay teve aiko ipi. Ijaty tesõ nakei ipi. Jareve reve tesõ ekõ'ẽ kõ'ẽma aiko ipi. Amyay aporara teve tesõ aiko ipi. Ãmõ, 'ywa aporara teve aiko ipi. Eporijau tè ake. Eremi'õ naikoi 'ete teve eupe. Ãmõ, eretã naikoi teve. Ãmõ, eyru naikoi teve ipi. [Pe'ĩypyte rõwã ãwĩvo aiko ajamã'ẽ. Kiristu remĩgwai rõmõ tè a'evo ajimomorijau aiko ipi. Ãmõ kõ sõ a'evo ekoi remẽ, opoipa kuwa oposikoa wyi kupa mijã.]
28 Agyvo aiko teve aiko ipi. Jamã'ẽ ee mã'ẽ rupi kõrijõ rõwã ajimomorijau aiko ipi. Nijamã'ẽi ee mã'ẽ rupi teve ajimomorijau aiko ipi. Jesu rè ojirovija mãe kõ rè ajipy'amogeta ywete aiko ipi, pirujẽ taa kõ pewarà kõ rè, nakuwai manyvo ekoi kupa ky'y rewarà mõ. Kõ'ẽ jawe jawe ajipy'amogeta ee kõ aiko ipi. A'evoa rè ajimomorijau teve aiko ipi. 29 Jesu koty rewarà kõ mõ nipy'a kasi remẽ, eãgyoay ee kõ aiko ipi. Ãmõ, ikoty rewarà kõ mõ ovoarà pè ojavyoka ijayvu remẽ, eãgyoay teve ee kõ aiko, aauvay kõ rewarà mõ. Ãwĩvoa rupi teve ajimomorijau aiko ipi.
30 [Atyry kõ omã'ẽ ere,] evote najimokasi aiko remẽ. Ajawyi a'evo 'evo aiko maekwerà rè kõrijõ tè ajimoe'età aiko. Evote ekasia rè rõwã ajimoe'età aiko. 31 Janejare'e okuwa ewari rõwã aepo a'e mã'ẽ. A'e, Janerõvijã Jesu Ruu. A'e ywesõ temimoe'e rõmõ ekoi mã'ẽ tè. 32 [Jypy remẽ epikasi e'ãa Janejare'e omojisaoka eupe,] Tamasiku taa rupi aa aiko remẽ. Kee. Kovenatu tẽ tesõ kõ opota epyy mijã. Jõvijã Areta ayvu rupi kovenatu rõmõ ojinõ maekwerà itõkõ a'e. A'e tè a'evo erereko. Taa okenaa sota kõ erãrõarà rõmõ kupa upa, kovenatu ayvu rupi tè epyytà kupa mijã. [Manyvo najireko'ãi ajava iwyi kõ ãmẽ mijã.] 33 Ajamã'ẽ Jesu koty rewarà kõ epãtavõ tajisyry tyvija rupi aa a'e taa pe wyi. Emowyjy rykyry wasu mã'ẽ pupe, emojava emono kupa. Ijokenaa ikwa mã'ẽ mõ rupi emono kupa.h Ajawyi najipyokai ijupe kõ. [Ãwĩvoa rupi Janejare'e omojisaoka epikasi e'ãa eupe. Ajawyi akuwa evote nekasi aiko.]