“Jesu remimonokwerà tè ije”, e'i mã'ẽ
10
Ije, Pauru, eayvukasità peupe ky'y. Aje, Kiristu okãte'ã janere ipi. Ikatusa rupi janerereko ipi. Nijanererekoivai teve ipi. Eruparà rõmõ ãwĩvo apota poroereko ipi. Ajamã'ẽ pepytery pewarà kõ mõ kee e'i tite eupewarà mõ: “Pauru janepyri ekoi remẽ, ikatusa rupi oporegeta janeupe ipi. Age'e kuipe'e ekoi remẽ, ojimomojy tesõ kareta kusiwarerà rupi ky'y”, e'i tite eupewarà mõ kupa ipi. 2 Aje, eayvukasi ekareta rupi pejẽ. Ajamã'ẽ aa pepyri remẽ, napotai ajimomojy rõmõ penovake aiko. Aje, eayvukasità, kee jaa akuwa rewarà mõ. Ava mõ sõ kee e'i remẽ, “Pauru opota tè ojimoe'eoka jane kõ pè”, e'i sõ remẽ, ivo ve aovaja kõ jẽtà ãmẽ. “Ãwĩvo kuwasi aiko mijã!” na'ei aiko ajamã'ẽ. Naãrõi a'evoa aiko ipi.3 Sota rewarà rè tè poromosã'ãgatà tapekuwa sa'u. Sota kõ okasia e'e rè tè ojimokasi iko kupa ipi. Ore, orevo rupi teve ajamã'ẽ. Orekasia rupi rõwã oroiko ipi. 4 Sota kõ oo jiapisia pè remẽ, irapa rapa tè oo kupa ipi. Na'evoi ore oroiko. Raparà rè rõwã orojimokasi ipi. Janejare'e kasia oreraparà vo 'ejẽ oreupe ikasi. A'e ywesõ ikasi sota kõ raparà wyi ipi. A'e rupi jane kõ ayvukasia kõ noromokasiokai ipi.a Oroayvumoopaoka teve ojipy'amogeta tite mãe kõ ipi. Ajawyi Janejare'e kasia rupi tè ojiayvuvaja vaja mã'ẽ oromoma kuwa, noerovija tari mãe kõ ayvu ai oromogwe kuwa. 5 Okasia rupi, otekokuwaa rã'ãga rupi Janejare'e ayvu nomoe'ei mãe kõ ayvu ve oromogwe kuwa. A'e wyi wetesi Janejare'e kasia rupi a'evo oroereko, ãwisõ Kiristu rè tojirovija iko kupa ky'y.
6 Ajare kee a'e pejẽ. Kiristu ayvu rupi katu ikõ tapeiko nẽ. Ijayvu rupi noiko tari mãe kõ oromomorijautà ãmẽ.
7 Manyvore ãmõ kõ vo jẽ erereko pekupa! “Jesu remimonokwerà tè Pauru”, napejẽi eupewarà mõ. Maevo ikujaukwerà rupi aiko rewarà mõ. Ajamã'ẽ aje ywete Kiristu koty rewarà kõ tè pejẽ remẽ, ekuwa kuwa pekupa mijã. “Aje ywete Kiristu koty rewarà tè ãwĩ”, pejẽ kuwa ije mijã.
8 Kee a'e pejẽ remẽ, “Janerõvijã ywete epyteporo pemotekokuwaarà rõmõ taiko”, a'e pejẽ remẽ, maevo penovake ajimoe'e maevo sõ tite aiko ipi. Ajamã'ẽ ãwĩvoa rè najimosĩokai, aepo a'e pejẽ remẽ. Kiristu tè epyteporo toporomokasi ijayvu rupi taiko, ãwisõ tapejirovija ywete ee peiko. A'evoa rõmõ tè oremonooka pekoty. Pemojaiwea rõmõ rõwã oremonooka pekoty. 9 Napotai ajimomojy pene ekareta kusiwarerà rupi mã'ẽ. 10 Ãmõgwerà kee e'i tite eupewarà mõ: “Kareta kusiwarerà rupi Pauru ojimomojy wete janere ipi. Ojimokasiay. Ajamã'ẽ janepyterà rupi ekoi remẽ, ojimomeme tè iko ipi. Nijayvukasi ãmẽ iko”, e'i tite maevo eupewarà mõ kupa ipi. 11 Ajawyi kee a'e aepo e'i mãe kõ pè. Ãwitõ kareta kusiwarerà rupi eayvukasi pejẽ, ãwĩvo vetà ajo pepyri remẽ. Netee'ãi ãwĩ wyi aiko, a'e pejẽ.
12 Pepytery pè uve kee e'i mãe kõ: “Jane ywesõ jatekokuwa Pauru kõ wyi”, e'i tite mãe kõ. Ajamã'ẽ ovote ojiupe tè aepo e'i ywe'e tite iko kupa. Otekokuwa e'ãa rupi tè aepo e'i kupa. [Janejare'e ayvu rupi rõwã aepo e'i iko kupa.] Ajawyi aepo jaa napotai, aepo na'ei ije rewarà mõ. 13 Janejare'e noremonookari sõ pekoty remẽ, “Janejare'e kasia rupi tè jane kõ simo'e”, noro'e'ãi kuwa pejẽ. Ajamã'ẽ aje Janejare'e tè oremono rewarà mõ tè, ijayvukwerà rupi tè oroo pekoty. Ajawyi tè, “Janejare'e remimonokwerà rõmõ tè oroiko”, a'età pejẽ. 14 Oroo pekoty remẽ itõkõ, “A'evo ikõ peiko nẽ”, e'i Janejare'e oreupe mã'ẽ noroapyrasai ipi. E'i mã'ẽ pe'ĩ kõrijõ oroereko ipi. Ãwĩ tè oremono pekoty rewarà mõ, ijayvu Kiristu rewarà rè tè poromotekokuwa oroiko. Ajawyi norojimoe'e teywetei oroiko ipi. 15 Ãmõ kõ ve itõkõ pemotekokuwa Kiristu ayvu rè ipi. Ajawyi kee noro'ei pejẽ: “Ore rõmõ'ĩte Kiristu pewarà kõ oromotekokuwa”, noro'ei oroiko ipi. Kee ywesõ oropota peiko. Janejare'e rè pejirovija katu remẽ ywesõ pejirovija ywetea oropota. A'evo remẽ ywesõ Kiristu ayvu rè ore poromotekokuwa katuaytà oroiko ipi. Penena jãvijõ jẽ poromotekokuwatà ãmẽ ky'y, Janejare'e e'i oreupe maekwerà pe'ĩ, oro'e ãmẽ pejẽ oroiko. 16 Ãmẽ awyjepa Janejare'e ayvu e'eay Kiristu rewarà oromojenu penena pè remẽ, orojisyry kuwa ajaire oroo ãmõ tena kyty. Uve jẽ tena kõ a'e pè Janejare'e rewarà nojenuive ijupe kõ mãe kõ. A'e taa kõ gyty oropota oroo ijayvukwerà mojenu erokwa. Noropotai ãmõ kõ remimo'ekwerà kõ oromo'e jẽ, noropotai ãmõ kõ omo'e maekwerà kõ rè orojimoe'e rewarà mõ. 17 Ajare kee ojikusiwapa Janejare'e ayvukwerà rõmõ: “Ava mõ sõ opota ojimoe'e remẽ, kee te'i kõrijõ: ‘Janejare'e remireko katuarà rõmõ tè ije aiko’, te'i kõrijõ ojimoe'e ãmẽ”, e'i maekwerà.b 18 Ovote ojimoe'e mã'ẽ pè rõwã temimoe'e taoty ãmẽ. Aje ywete Janejare'e remimoe'e pè tè temimoe'e taoty.