“Tapemoaty amãtejẽ penemime'ẽ rã”, e'i mã'ẽ
9
“Pekarakuri peme'ẽ tijamonooka Juteja yvy kyty Janerõvijã koty rewarà kõ pãtavõa rõmõ”, na'e'ãi ky'y, aepo pekuwapa rewarà mõ. 2 Jypy remeve itõkõ pepota pepãtavõ kõ ipi. Ajawyi tè poromoe'e ywete Masetonia yvy wãnà kõ remikuwa rõmõ. Kee a'epa ijupe kõ: “Korĩtu taa wãnà kõ, mire'eay tè”, a'epa. “Akaja yvy pewarà kõ a'e kõ. Wãi ãmõ kwaray pe wyive opota Juteja wãnà kõ opãtavõ kupa”, a'epa peupewarà mõ. Ajawyi “hoõ” pejẽ katu ipi rewarà mõ, okuwa a'evo peiko mã'ẽ kupa ky'y. Ajawyi a'e kõ ve opota okarakuri mõ ome'ẽ, ipãtavõarà kõ rõmõ. 3 Kee a'epa ijupe kõ: “Akuwa Korĩtu wãnà kõ omoatypa amãtejẽtà karakuri tisiraa jakwa remẽ”, a'epa ijupe kõ. Age'e Titu kõ amonotà pekoty erenone rupi, aje ywete tapemoatypa amãtejẽ. Napemoatyi ime'ẽ sõ remẽ, poromoe'e pãnẽ tè kuwa ãmẽ. 4 Kãramõ Masetonia yvy wãnà kõ sõ oo erupi pekoty remẽ, manyvo na'e'ãi kuwa ãmẽ ijupe kõ, poromoe'e pãnẽ tesõ aiko remẽ. Pejẽ ve manyvo napejẽ'ãi kuwa, “hoõ” pejẽ katu oreupe paire. 5 Ajawyi tè Titu kõ amono amãtejẽtà erenone rupi pemokasiarà rõmõ mokope, karakuri penemime'ẽ rã moatya rè. Peayvukwerà rupi ikõ tapemokatu karakuri ãmẽ nẽ. Ãmẽ tè avãe a'e pè remẽ, pemoatypa amãtejẽtà karakuri erenone. Ãwĩvo remẽ tè peme'ẽ takatua rupi tè peme'ẽtà. Oroporanu rire rõwã peme'ẽtà ãmẽ.Temitã rã'ãigwerà jaõtã mã'ẽ rè tè poromosã'ãga mã'ẽ
6 Kee a'e mã'ẽ rè pemã'ẽ esa. Ava mõ sõ pe'ĩpe'ĩ moma'eyva rã'ãigwerà oõtã remẽ, ivo ve i'akwerà pe'ĩpe'ĩ teve omoaty ipi. Ãmõ, mõa'ãrõwã oõtã remẽ, mõa'ãrõwã teve i'akwerà omoatytà. A'evoa rè tapeja'a penemime'ẽ rã pemoaty remẽ. 7 Tapejipy'amogeta rã'ĩ jẽsi mapejõ põ peme'ẽtà, pejãvijõ jẽ. Aekwerà rupi tapeme'ẽ ajaire. Peme'ẽ takatua rupi tè peme'ẽtà ãmẽ. Tapejimõarõ e'ã ime'ẽa rè peiko. Tapenoryvay ime'ẽa rè peiko. A'evo jaiko mã'ẽ Janejare'e opota katu ipi. 8 Janejare'e ywesõ kuwa mõa'ãrõwã ome'ẽ penemiporu rõmõ, tapemosãi jane kõ pè erokwa ipi. Nopa'ãi kuwa pepo pewarà pemosãi ywete ipe remẽ. 9 Ajare kee ojikusiwa maekwerà rupi tapeiko: “Kejavõigà rõwã iporijau mãe kõ pè ome'ẽ moma'e ipi. Ivo poroereko karuaru ipi mã'ẽ”, e'i maekwerà rupi katu tapeiko.a
10 Ãwitõ Janejare'e tè moma'eyva rã'ãigwerà ome'ẽ janeupe tijaõtã ipi. Ãwĩvo janeremi'õvãnõ ipi. Omoy katu janeremi'õ janeupe ipi. Ãwĩvo ve ãmõ kõ peporijauesa remẽ, Janejare'e omoy katutà pemoma'e kõ toy katu jẽ pejẽ. Napeporijau'ãi poropãtavõa rupi peiko. Ãmẽ ywesõ Janejare'e omoy katutà pejẽ.b 11 Aje, Janejare'e pemoma'enõ ywetetà. Ãmẽ tè oiko jẽtà penemime'ẽ rã. Kee javu sa'u ikarakuri ywete mãe kõ votà peiko, pepãtavõ iporijau mãe kõ remẽ. Oroeraa penemime'ẽ rã ime'ẽ ijupe kõ remẽ, omoe'e ywetetà Janejare'e penewarà mõ kupa. 12 Ãwĩvo Janerõvijã koty rewarà kõ pepãtavõ remẽ, niporijau'ãi kupa ky'y. Oy katutà emiporu rã kõ ijupe kõ. Omoe'e ywetetà Janejare'e peupewarà mõ ãmẽ kupa. 13 Napekãte'ãi ee mã'ẽ rè omã'ẽ kupa remẽ, kee e'ità kupa: “Aje ywete Kiristu ayvu rupi katu tè ekoi kupa ipi”, e'ità ãmẽ kupa. “Ãwitõ janepãtavõ kupa, ãwĩvo ve ãmõ kõ ve opãtavõ kupa ipi”, e'ità peupewarà mõ ãmẽ kupa. Ajare omoe'e ywetetà Janejare'e penewarà mõ kupa. 14 Penauvaytà ãmẽ kupa. Ajawyi kee e'ità Janejare'e pè peupewarà mõ kupa: “Janejare'e, eporijauesa Korĩtu wãnà kõ, ikatuay wete orerereko kupa rewarà mõ. Nokãte'ãi teve okarakuri rè ome'ẽ oreupe kupa remẽ ipi. Ãmõ, aje ywete poroporijauesa ywete kupa ipi”, e'ità Janejare'e pè kupa. 15 Simoe'e Janejare'e wemime'ẽgwerà janeupewarà rewarà mõ. A'e ywesõ nokãte'ãi jane mã'ẽ rõmõ ekoi ipi.