Iporijau mãe kõ pãtavõa rewarà
8
Eretãrãgwerà kõ, oromome'utà peupe Masetonia yvy wãnà kõ rekoawerà kõ, Jesu koty rewarà kõ rekoawerà kõ. Aje, Janejare'e wereko katu kõ okatuaya rupi ipi, ãwisõ agyvo toiko kupa. 2 Ojimomorijauvay ipe kupa remẽ, ory jẽ iko kupa ipi. Nimoma'ei epe teve kupa remẽ, poroauvay jẽ iko kupa ipi. Ajawyi opota katu ãmõ Jesu koty rewarà kõ opãtavõ kupa ipi. Okuwapa Jerusarẽ taa wãnà kõ iporijau remẽ kupa. A'evo rewarà mõ, okarakuri mõ omonooka jẽ tesõ ijupe kõ, ãwisõ nimoma'ei epe kupa remẽ ipi. 3 Nokãte'ãi 'ete okarakuri me'ẽ kupa ipi. Ava mõ, “Karakuri mõ pemonooka”, ne'i ijupe kõ mijã. Ovote omonooka kupa. Ome'ẽ takatua rupi tè ome'ẽ ijupe kõ imonooka kupa. Aje ywete a'evo ekoi kupa. 4 Kee e'i oreupe kupa: “Ore ywete oropota katu orekarakuri mõ oromonooka Jerusarẽ wãnà kõ pè, Janerõvijã koty rewarà kõ pãtavõarà rõmõ”, e'i oreupe kupa ipi.a 5 Kee oro'e tite orojipy'amogeta aepo e'i kupa remẽ: “Kejõgà teipõ karakuri ome'ẽtà kupa”, oro'e tite. Ajamã'ẽ ome'ẽ ywete oreupe kupa. Opota teãmã Jesu Kiristu remimota rupi ekoi kupa rewarà mõ a'evo ekoi kupa. Ãmõ, oreayvu rupi teve ekoi kupa. Janejare'e remimota rupi a'evo ekoi kupa.6 Kee rewarà mõ aepo amome'u pejẽ. Titu pepytery pè ekoi remẽ itõkõ kee e'i pejẽ: “Pekarakuri mõ pemokatu tapemonooka ajaire ojimomorijau mãe kõ pè”, e'i pejẽ. Ajawyi Masetonia wãnà kõ rewarà oroenu remẽ, kee oro'e Titu pè: “Korĩtu wãnà kõ poroauvay iko ipi! Ekwa teremokasi kõ jẽsi a'evo toiko jẽ kupa. Epãtavõ kõ okarakuri moatya rè”, oro'e ijupe imono. 7 Pejikuwa Janejare'e rè pejirovija mãe kõ rõmõ peiko. Ãmõ, ivo katu ayvu pemojenu mãe kõ rõmõ pejikuwa peiko. Ãmõ, Janejare'e ayvu rè petekokuwavay teve peiko. Ãmõ, pejimokasi mãe kõ rõmõ peiko. Ãmõ, orerauparà kõ rõmõ teve peiko. A'e a'evoa rè pejikuwa peiko ipi. Ajawyi karakuri me'ẽa rè ikõ tapejikuwa teve peiko nẽ, oro'e pejẽ. Poroauvaya rupi a'evo tapeiko, oro'e pejẽ.
8 Kee na'ei pejẽ ajamã'ẽ: “Eayvu rupi eremikuwa rupi tapeiko ikenẽ!” na'ei pejẽ. Kee a'e kõrijõ tè: “Masetonia wãnà kõ nokãte'ãi okarakuri rè ime'ẽ iporijau mãe kõ pè”, a'e tè. Ãwĩvo sõ pekarakuri peme'ẽ remẽ, pejikuwatà aje poroauvay mãe kõ rõmõ peiko, a'e tè pejẽ. 9 Janerõvijã Jesu Kiristu itõkõ janerauvay. Kee itõkõ ekoi. Nimoma'ei mã'ẽ vo rõmõ uu ojimojane janepytery pè, ãwisõ imoma'e ywete mã'ẽ rõmõ teãmã ekoi remẽ.b Pirujẽ wereko mã'ẽ rõmõ teãmã ekoi remẽ. Poroauvay rewarà mõ tè a'evo ekoi. [Janeupewarà mõ ojimomorijauoka.] A'evoa rupi tè imoma'e ywete mãe kõ vo 'ejẽ jaiko ipi.
10 Kee a'e ajipy'amogeta, pekarakuri peme'ẽ ojimomorijau mãe kõ pè mã'ẽ rè. Jypy remẽ itõkõ, pepytery pè aiko remẽ itõkõ, a'evoa rã rè pejipy'amogeta peiko. Pejẽ ypy itõkõ kee pejẽ ije: “Orekarakuri mõ oromoatytà ime'ẽ Jesu koty rewarà kõ ojimomorijau mãe kõ pè”, pejẽ ije. Ajawyi a'evo peiko ypy. A'evo jẽ tè peiko. Pepota a'evo peiko rewarà mõ tè a'evo peiko ipi. 11 Ajawyi a'evo jẽ ikõ tapeiko nẽ, a'e pejẽ. Tapenory jẽ ikõ ime'ẽa rè nẽ, a'e pejẽ. Peme'ẽ takatua rupi tè ikõ tapeme'ẽ ajamã'ẽ nẽ. Tapepi e'ã ikõ ime'ẽa rè, ajaate pemoawyjepatà ime'ẽa. Kee jaa ikatu, agyvo. Pekarakuri ywete remẽ, kee javu sa'u tapeme'ẽ. Napekarakuri ywe'ei remẽ, kejõgà jẽ tapeme'ẽ. A'evo tapeiko ipi. 12 Japota jame'ẽ takatu remẽ tè Janejare'e ory janere ipi. Mõa'ãrõwã janekarakuri jame'ẽ remẽ, ikatute. Ajamã'ẽ nijanekarakuri sõ remẽ, “Tome'ẽ jẽ ikenẽ”, ne'i jane. Ivo ve kejõgà jame'ẽ remẽ, ikatu teve Janejare'e pè ãmẽ ipi.
13 “Tapejima'eme'ẽma”, noro'ei pejẽ ajamã'ẽ. “Mõa'ãrõwã jane kõ tomoma'enõ ikenẽ”, noro'ei pejẽ teve. Apota ojevo jẽ peiko mã'ẽ. 14 Akuwa age'e pemoma'e ywete peiko. Ajawyi ikatuay wete kuwa iporijau mãe kõ pepãtavõ remẽ mijã. Ajawyi pekarakuri, pemoma'e tapepẽ'o imono ijupe kõ, a'e pejẽ. Ãmẽ tè a'e kõ ãmõ remẽ pejimomorijau remẽ, ivo ve omoma'e mõ opẽ'o tary ve ime'ẽ pejẽ kupa, pepãtavõarà kõ rõmõ ipi. Ãwĩvo peiko remẽ tè ojevo jẽ pemoma'età ãmẽ. Ava jẽ rõwã iporijautà ãmẽ. 15 Kee e'i itõkõ ojikusiwa Janejare'e ayvu rõmõ maekwerà rupi katu:c “Mõa'ãrõwã mãnã opyy imoaty mã'ẽ noapyrasai ajamã'ẽ. Ãwĩvo ve kejõgà tè opyy mã'ẽ pè oyte”, e'i. Aepo e'i maekwerà rupi katu peikotà ãmẽ ky'y.
Titu kõ rewarà
16 Age'e Titu ootà pekoty. Opota katu pemokasiay ipi. Janejare'e tè omokasi Titu, ãwisõ tapenauvay. Ajawyi ãwitõ oropota pemokasi, ãwĩvo ve Titu opota pemokasia. A'evoa rè orerory mã'ẽ oromome'u Janejare'e pè. 17 Ajawyi, “Nepota põ neo Korĩtu taa pè, a'e kõ mokasia rõmõ?” oro'e ijupe remẽ, “Õ'õ, apota”, e'i oreupe ãmẽ. Opota katuay pemokasia rewarà mõ, opota teãmã oo pekoty. 18 Ajawyi age'e ootà pekoty. Ãmõ Jesu koty rewarà mõ oromonotà upi. Oreretãrã tè a'e. Jesu koty rewarà kõ remimoe'e tè oromonotà upi mã'ẽ. Pirujẽ Jesu koty rewarà kõ opota katu, oposiko katu Janejare'e ayvu e'eay Jesu Kiristu rewarà mojenua rè ipi rewarà mõ. 19 A'e kõ tè opyteporo too orerupi, Jerusarẽ taa pè oroo remẽ. Ajawyi karakuri Jesu koty rewarà kõ remimoatykwerà oroeraa remẽ, ootà orerupi kupa. A'evoa rupi aje poroaua ojikuwatà. Aje, oropota ywete poropãtavõa mojikuwaa teve. A'evoa rupi omoe'e ywetetà Janejare'e kupa. 20 Noropotai kee e'i tite ãmõ kõ oreupewarà mõ, mõa'ãrõwã karakuri oroeraa remẽ: “Emã'ẽ. Ãwĩ kõ karakuri weraa remẽ, wekyità karakuri mõ oupe kupa”, te'i tite e'ã ore kupa. Aja rewarà mõ tè oreretãrã mõ oroeraatà orerupi, tomã'ẽ orere karakuri orome'ẽma remẽ. Ãmẽ tè aepo ne'i'ãi ore kupa. 21 Oropota Janerõvijã rovake ivo katu oroiko ipi. Ãwĩvo ve oropota jane kõ rovake ivo katu oroiko teve. Ajawyi a'evo oroiko ipi.d
22 Ãmõ teve oromonotà Titu kõ rupi. Oreretãrã teve a'e. A'e iteetejẽ oroã'ã esa. Ajawyi a'evoa rupi orokuwa temirovija tè sikaepo. “Hoõ” e'i katu mã'ẽ tè a'e. Ovote teãmã jane kõ omokasiay ereko ipi. A'e remirovija katu teãmã pejẽ peiko. Ajawyi age'e si pejẽ pekuwatà ky'y. Age'e ywesõ si opota pemokasia rõmõ ekoi ky'y. 23 Ije tè Titu amonotà pekoty. Ereve oposiko iko mã'ẽ tè a'e. Ãmõ, oreretãrã kõ ootà upi pekoty mãe kõ pewarà mõ kee a'e pejẽ. A'e Jesu koty rewarà kõ remimonookakwerà tè. Kiristu rekoa rupi katuwarà kõ tè a'e kõ. 24 A'e kõ pewarà mõ kee a'e pejẽ. Oo pekoty kupa remẽ ikõ tapereko katu kõ ipi nẽ, a'e pejẽ. [Pekarakuri ikõ tapemoaty imonooka upi kõ iporijau mãe kõ pãtavõa rõmõ nẽ, a'e pejẽ.] A'evo peiko remẽ tè, pirujẽ Jesu koty rewarà kõ okuwatà aje ywete poroauvay mãe kõ rõmõ tè peiko. Kee e'ità ãmẽ kupa: “Pauru nomoe'e kõ teywetei”, e'ità peupewarà mõ ãmẽ kupa.