2 Kee a'e teve pejẽ. Oropota orerau mijẽ pekupa. Noporomojaiwei itõkõ penereko ipi. Noporomoripei teve penereko ipi. Ivo katuay itõkõ poroereko penereko ipi. 3 “Nivoi peiko” na'ei ajamã'ẽ peupe. Kee a'epa itõkõ pejẽ: “Poroauvay aiko. Awyje nopi'ãi poroauvaya. Jaiko jẽ jaiko remeve, penevejẽ oroikotà. Ãmõ, penevejẽ oroikotà, ajaate oromãnõtà”, a'epa itõkõ pejẽ. Aepo a'e jẽ tè. 4 Ajawyi najipy'amopirai'ãi pene aiko. Eroryvay jẽ pene aiko. Aje ywete Janejare'e ayvu rupi peikoa akuwa. Ajawyi poromoe'e wete jane kõ rovake aiko ipi. Ajimomorijau ipe aiko remeve erory jẽ pene aiko ipi.

5 Ãmõ, kee a'e pejẽ. Masetonia yvy pè oroiko remẽwarerà ve norekane'õyoi tesõ oroiko. Pirujẽ taa kõ rupi oremomorijau ipe kupa ipi. Ãmõ kõ oreayvuvaja vaja 'ete teve ipe ipi. Orojimonyi wete ipe ãmẽ oroiko ipi.^a 6 Ajamã'ẽ Janejare'e oremoryoka jẽ oremokasioka orerereko. Ãwĩvo Janejare'e poromoryoka jẽ poroereko ipi. Titu omuroka [penena pe wyi] orekoty oremoryoka oremokasioka. 7 Ajamã'ẽ ivãea rewarà mõ kõrijõ tè rõwã orerory oroiko ipi. Penewarà omojenu oreupe, kee jaa: “Korĩtu wãnà kõ epy'amokasioka tesõ erereko”, e'i oreupe. Ajawyi tè orerory aepo renu ãmẽ ipi. Ãmõ, “Opota omã'ẽ nere kupa. Ãmõ, ijãgyo teve nerereko ai maekwerà rè kupa. Ãmõ, opota mijẽ ojimory nere kupa”, e'i penewarà mojenu ore Titu. Aepo jaa aenu remẽ ywesõ eroryvay aiko ky'y.

8 Akuwa eremikusiwarerà rè pemã'ẽ remẽ, peãgyo tite ee pemãjã mijã. Ajawyi, “Moma'e rã sõpõkõ akusiwa tite!” a'e mijã. Ãwĩ kareta akusiwa imonooka tapemã'ẽ ee, tapeãgyo ywe'e tè pejimosĩoka ee pemãjã. Ajamã'ẽ itõkõ eremikusiwarerà rupi pejimotekokuwa tè peiko ky'y. Ajawyi napeãgyo'ãi ee ky'y. 9 Ajawyi age'e si eroryvay aiko ky'y. Poromosĩoka peaiwererà rè rewarà mõ rõwã ajamã'ẽ erory aiko. Kee rewarà mõ tè erory aiko. Pejimosĩoka peaiwererà rè remẽ, peitypypyipaoka Janejare'e pè peaiwererà ky'y rewarà mõ tè erory aiko. Pepoipa peaiwererà wyi ãmẽ ky'y. Janejare'e tè a'evooka penerekooka. Ajawyi tè eroryvay aiko ky'y. Akuwa noporomoai kareta akusiwa maekwerà rupi aiko. 10 Ajawyi kee a'e pejẽ. Janejare'e janemosĩoka janeaiwererà rè remẽ, kee ja'e ipi: “Moma'e rã sõpõkõ a'evo aiko mijã!” ja'e ipi. Jajimome'u Janejare'e pè janeaiwererà reitypypyipaoka ipi ãmẽ ky'y. A'evoa rupi Janejare'e janemokatu ky'y. Ajawyi nijajimosĩoka pãnẽi janeaiwererà rè jaiko ipi. Ajamã'ẽ noerovijai mãe kõ ojimosĩoka ipe remẽ, ojimosĩoka jẽ ipe tè iko kupa. Noitypypyipaoka waiwererà kõ Janejare'e pè remẽ, ijaiwererà kõ revejẽ omãnõtà kupa ãmẽ ky'y. 11 Aã tapekuwa. Pejimosĩoka mã'ẽ ikatu tè Janejare'e pè, napejimosĩoka pãnẽi rewarà mõ. Emã'ẽ. Kuise'ẽ pejimosĩoka peaiwererà rè peiko. Kuise'ẽ teve pepota ywete peaiwererà reitypypyioka ijupe. Ãmẽ nivoi ekoi mã'ẽ rè pemã'ẽ remẽ, kee pejẽ ky'y: “Aje, ipojy ai tè ãwĩ rapijarà janepytery pè ekoi remẽ!” pejẽ ky'y. Ajawyi pemoisyry pepytery pe wyi ky'y. Ivo katu ekoi mã'ẽ kõrijõ pepota katu ky'y. Erekaray wete pekupa ãmẽ ky'y. Ãwĩvo peiko rewarà mõ, ivo peikoa pemojikuwa jane kõ rovake ky'y.

12 Ãwĩvo kareta akusiwa tapemã'ẽ ee. Nivoi mã'ẽ waiwererà toityoka rewarà mõ ywesõ rõwã akusiwa kareta. Ãmõ, temimoai pãtavõa rewarà mõ ywesõ rõwã. Kee rewarà mõ ywesõ akusiwa pejẽ. Napekuwa ywe'ei maevo orerau pekupa mijã. Ajamã'ẽ oreayvu rupi peiko remẽ, Janejare'e omojikuwaoka orerauvaya peupe ky'y. 13 Ajawyi oreroryvay oroiko ãmẽ ky'y. Orepy'a piryvypy katu teve pene oroiko ky'y.

Ãmõ, kee rewarà mõ teve orerory oroiko. Titu peneve ekoi remẽ itõkõ ojipy'amokasiay iko. Ajaire uu remẽ, oryvay penewarà omojenu oreupe remẽ. Ajawyi a'evoa rè oreroryvay teve oroiko. 14 Titu nooive pekoty remeve, kee oro'e amãtejẽ ijupe: “Aje, Korĩtu wãnà kõ ikatu nererekotà, ivo katu tè kupa rewarà mõ”, oro'e ijupe. Aje ywete oro'e ijupe. Ãwitõ peupe norewari oroiko ipi, ãwĩvo ve Titu pè norewari oroiko ipi. Ãmẽ Titu oo pekoty ky'y remẽ, napejavyi oreayvu oro'e ijupe maekwerà. Upi katu tè peiko. Ivo katu tè pereko Titu ereko. 15 Titu penauvay teãmã penereko. Ajawyi oja'a jẽ pene iko ipi, kee javo: “Ivo katu erereko kupa. Ojapyaka katu teve eayvu rè kupa. Upi katu ekoi ãmẽ kupa. Ãmõ, emomojy kupa”, e'i oreupe, oja'a pene remẽ. Ajawyi age'e ywesõ Titu penauvay ky'y. 16 Ajawyi najipy'amopirai 'ete pene aiko ky'y. Eroryvay a'evo peiko rewarà mõ aiko.