6
Ore Janejare'e reve oroposiko emĩgwai kõ rõmõ oroiko ipi. Ajawyi kee oro'e pejẽ. Janejare'e penereko katuay wete okatuaya rupi. A'evoa wyi tapepoi ywe'e tite e'ã ikenẽ! oro'e pejẽ. 2 Kee e'ipa Janejare'e ikusiwaoka:“Age'e 'arà apota penereko katua rõmõ.
‘Oreporijauesa rejupa’, pejẽ ije remeve aenu.
Poroporijauesa ãmẽ”, e'i maekwerà.a
Ajawyi tapejapyaka katu ikenẽ! Janejare'e age'eve ywete opota pemokatupa. [Ajawyi tapejimokatuoka ikõ ijupe nẽ, oro'e pejẽ. Age'eve ikõ tapejirovija katu nẽ, oro'e pejẽ.]
“Ore ywesõ noreporijaui mãe kõ rõmõ oroiko”, e'i mã'ẽ
3 Orojimokasi ivo katu kõrijõ oroiko oreposikoa rupi, “nivoi mã'ẽ” tojimo'y e'ã oreposikoa rè. Noropotai orerewarà mõ ava mõ noerovijai orereminuwerà. 4-5 Pekuwa manyvo oroiko remẽ, ivo jẽ oroiko ipi. Orojimomorijau ipe oroiko Janejare'e remĩgwai kõ rõmõ remẽ, ivo jẽ tite oroiko ipi. Oremomarama tarepe orerereko kupa remẽ, “Moko tijanererekoa nẽ kupa”, oro'e kõrijõ ipi ãmẽ. Ãmõ, waypete ipe oreposikoa remẽ, norererekoivai oreposikoa. Kee tesõ ipe orerereko kupa ipi. Orenõpã nõpã ipe kupa. Ãmõ, jimopã'ãga pupe oremono ipe teve kupa. Ãmõ, atyry oremomarama tarepe orereko ipi. Ãmõ, mõa'ãrõwã oreposikoa ipe remẽ, norojimoavai tesõ orekane'õyo rõmõ oroiko. Noroke katui teve tesõ oroiko. Ãmõ, amyay oroporara tesõ teve ipe oroiko ipi. A'evo 'evo tesõ ipe oroiko remẽ, ivo jẽ tesõ ãmẽ oroiko ipi. Ãwĩvo oroiko wyi orojikuwa Janejare'e remĩgwai e'e kõ rõmõ tè oroiko.b 6 Aje, kee jaa orojikuwa. Oterẽ jẽ e'ete ivo oreikoa rè. Ãmõ, orotekokuwavay Janejare'e ayvu rè oroiko. Ãmõ, norojikõtevẽi ãmõ kõ motekokuwaa rè oroiko ipi. Ojavy javy kupa remẽ, ikatusa rupi oroereko katu kõ jẽ ãmẽ ereko kõ ipi. Ãmõ, noroporegeta ai nivoi mãe kõ pè teve ipi, [oremoaiarà kõ teipe remẽ]. Janejare'e 'Ãg orepy'a pè ekoia rupi oroiko ipi. Ãmõ, aje poroauvaya rupi orojikuwa Janejare'e remĩgwai e'e rõmõ oroiko. 7 Ãmõ, aje ywete oroporegeta ipi. Ãmõ, Janejare'e kasia orereve ekoi ipi. Ãmõ, ijayvukwerà rupi katu oroiko ipi. A'evo oroiko mã'ẽ rupi oromojikuwaoka aje ywete Janejare'e ayvu. Ãmõ, oroovajarĩ oporegeta ai ijayvu rè mãe kõ oroiko ipi. 8 Ãmõgwerà oremoe'e ywete orerereko kupa. Ãmõgwerà ajamã'ẽ orererõarõ kõrijõ iko kupa. Ãmõgwerà oporegeta ai tesõ orere kupa ipi. Ãmõgwerà oporegeta katuay orere kupa ipi. Ãmõgwerà, “Poromoripe mãe kõ”, e'i oreupewarà mõ ipi, ãwisõ poromoripearà kõ rõwã ipe ore oroiko remẽ. Aje, oroporegeta katu mãe kõ tè ore. 9 Norekuwai rã'ãga tè kupa, noenu tari oreayvu kupa rewarà mõ. Ajamã'ẽ pirujẽ orekuwa ipe kupa. Ãwisõ opota ipe oremomarama kupa remẽ, oroiko jẽ oroiko ãmẽ. Ãmõ, mape remẽ oremomorijau ipe kupa ipi. Ajamã'ẽ noromãnõive. 10 Ãmõ, mape remẽ oremoãgyooka ywete ipe kupa ipi. Oremoai epe teve kupa ipi. Ajamã'ẽ noropi orerorya wyi oroiko. Nimoma'ei mãe kõ vo ipe oroiko. Ajamã'ẽ atyry kõ oiko karuarutà Janejare'e pyri oreremimojenuwerà rupi. Aje, Janejare'e pewarà kõ rõmõ tè oroiko. Ajawyi imoma'e ywete mãe kõ vo 'ejẽ oroiko. Oremoma'e mõ ve ywete nuvei epe oreupe. Ajamã'ẽ ore ywesõ pirujẽ noreporijaui mãe kõ rõmõ tè oroiko, [Janejare'e pyri oroiko karuarutà rewarà mõ.]
11 Pirujẽ aepo oromome'u pejẽ, eremiau kõ. Aje, orepy'a pè tè poroauvay oroiko. 12 Manyvore ywete norerau ywe'ei pekupa, ãwisõ ore jẽ tite poroauvay ipe remẽ. 13 Aje ywete poroauvay oroiko ipi. Ajawyi ikatusa rupi oroporegeta pejẽ ipi. Ãwitõ eãkarã pè ikatusa rupi aporegeta kuwa, ãwĩvo ve aporegeta pejẽ ipi. Ãwĩvo ve tapeporegeta ore. Pepy'a pè ikõ orerau katu pekupa nẽ, oro'e pejẽ.
“Tijajireko katu poropy'amoky'a mã'ẽ wyi jaiko”, e'i mã'ẽ
14 Janejare'e noerovijai mãe kõ vo rõwã tapeiko ipi. Kee rewarà mõ. Noerovijari mãe kõ tè ojee ekoi rewarà mõ. Ajawyi ivo mãe kõ nivoi mãe kõ nojimoje'a'ãi kuwa. Ãwitõ aryvo tè ekoi mã'ẽ no'ã'ãi kuwa pãtõ rupi iko ipi, ãwĩvo. 15 Ãwitõ Kiristu ãjãgai rõvijã reve nojisu'u'ãi 'eteay kuwa ojeeve iko. A'evo ve Jesu koty rewarà kõ noerovijai mãe kõ reve nojisu'u'ãi. 16 A'evo ve Janejare'e pewarà, ijarà rã'ãga jimoãtãgwerà reve ovo rupi tè ojiwyi kupa. Jane Janejare'e retã vo 'ejẽ jaiko, jajirovija ee mãe kõ rõmõ. I'Ãg janepy'a pupepa ojimoena iko ky'y. Ajawyi aepo a'e pejẽ. Kee jaa itõkõ Janejare'e e'i ikusiwaokapa amãtejẽ karamoe remeve:
“Ere ojirovija mãe kõ pytery pè ajimoenatà, eeve kõ taiko.
Ijare'e kõ rõmõ tè aikotà.
Eupewarà kõ rõmõ ekoità ãmẽ kupa”, e'i maekwerà.c
17 Kee e'i teve Janerõvijã ywete:
“Tapejimowaite nivoi mãe kõ wyi.
Ekoa kõ rupi tapeiko e'ã peiko.
Pepy'amoky'a mã'ẽ wyi ikõ pejireko katu peiko nẽ.
Ãwĩvo peiko remẽ, poroerekotà eupewarà kõ rõmõ ãmẽ”, e'i maekwerà.d
18 Ãmõ, kee e'i:
“Penuu rõmõ aikotà.
Pejẽ ãmẽ era'yry kõ rõmõtà tè peiko. Ãmõ, erajyry kõ rõmõtà tè peiko”, e'i Janerõvijã ywete, a'e ywesõ ikasiay wete mã'ẽ rõmõ tè ekoi mã'ẽ.e