4 Ike rupi jakuve jẽ remẽ, aã janepirà ikewarà ijamu 'ejẽ iko. Nowai ekoi. Nijapota ywe'ei janepirà ikewarà reity mijã. Ajamã'ẽ janepirà yva pewarà ywesõ japota ky'y. Okãjã mã'ẽ rekovijarerà rõmõ awyje toiko. 5 [Oreremikuwa rupi rõwã aepo oro'e pejẽ.] Janejare'e remikuwa rupi tè aepo oro'e pejẽ. Janerereko katupa teãmã a'e. O'Ãg ome'ẽ teve janepy'a pè. A'e rupi sikuwa aje ywete janepirà pyau ajaire ome'ẽtà janeupe.

6 Ajawyi nijajimonyi [kãramõwarà rã rè], a'evoa rewarà sikuwapa rewarà mõ. Janepirà aã ikewarà ve sõ jareko remẽ, nijaike kuwa'ãi Janerõvijã ywete rena pè. 7 Ajamã'ẽ age'e remẽ jamã'ẽ ee mã'ẽ rupi rõwã jaiko. Aje, jajirovija ee mã'ẽ rupi tè jaiko, ãwisõ nijamã'ẽi epe ee remẽ. 8 Janejare'e o'Ãg oinõ janepy'a pupe. Ajawyi sikuwa janepirà pyau oinõtà jane mã'ẽ. Ipyri jaikotà ãmẽ ky'y, age'e remẽwarà vo rõwã ky'y. A'evoa rã ywesõ ikatuay wetetà ãmẽ janeupe. 9 Ãmõ, Janejare'e morya ywesõ oropota, ike yvy rupi oroiko jẽ remẽ. Orokãjã ipe remẽ teve. 10 Kãramõ pirujẽ jaatà Kiristu rovake jaiko. Ãmẽ sõsi janemoe'yità ky'y. Manyvo jaiko ike yvy pè jaiko jẽ remẽ maekwerà rupi janemoepytà. Ivoa rupi jaiko remẽ. Ãmõ, nivoi katu jaiko remẽ. Aekwerà rupi katu janemoepytà.^a [Ajawyi Janejare'e remimota rupi tè apota aiko mã'ẽ.]

11 Orokuwa Janerõvijã ywete ipojy wete mã'ẽ tè. [Ajawyi oromomojy wete oroiko ipi.] Ajawyi oroposiko ywete ãmõ kõ motekokuwa rè oroiko ipi, Janerõvijã ywete rè tojirovija kupa ky'y. Janejare'e okuwa orepy'a pewarà ipi. Ivo oroiko mã'ẽ okuwa teve. Ãwĩvo ve oropota pejẽ ve orekuwa pekupa. 12 Norojimoe'ei penovake oroiko. Ajamã'ẽ oropota petekokuwa ivo oroiko mã'ẽ rè tè. Ãmẽ ava mõ oporegeta ai sõ orere peneminu mõ remẽ, napesĩ'ãi ãmẽ orewyi peiko. Pekuwatà ijayvuvaja kõ. A'e kõ ojimoe'e rã'ãga iko ipi. Ivo maevo sõ tite ãmõ kõ rovake ekoi kupa ipi. Ajamã'ẽ ipy'a pewarà kõ, soõ ãmẽ, nivoi ekoi. 13 Ãmõgwerà, “Eawyry mã'ẽ tè Pauru kõ”, e'i tite kupa. Ajamã'ẽ Janejare'e ayvu e'eay rewarà mõ tè notekokuwai mã'ẽ vo 'ejẽ oroiko. Ajamã'ẽ orotekokuwavay oroiko mã'ẽ tè ore. Ivo tekoua rè tè oroposiko pemotekokuwaarà rõmõ oroiko ipi. 14 Pemokasia rè oroposiko oroiko, Kiristu janerauvaya rewarà orokuwa ipi rewarà mõ. Ajawyi poroauvay teve poroerekoa. Janejare'e opota katu ãwĩvoa oroiko ipi. Orokuwa pe'ĩte omãnõ janerekovijarerà rõmõ mã'ẽ. Ajawyi jane omãnõ mã'ẽ vo 'ejẽ jane, ivo jẽ. 15 A'e omãnõ pirujẽ jane kõ rekovijarerà rõmõ, ãwisõ janeremimotarà rupi rõwã tijaiko ky'y. Aje, emimota rupi kõrijõ tè tijaiko ky'y. A'evoa rã rõmõ omãnõ. Ajaire opoera mijẽ omãnõ maire janerereko katuarà rõmõ ky'y. 16 Aje, ajaire ãmõ kõ rekoa rè oromã'ẽ remẽ, kee noro'e teywete'ãi: “Ãwĩ ikatuay. Ãwĩ ikatu sa'u kõrijõ tè. Ãwĩ ãmẽ nikatu ywe'ei”, noro'e teywete'ãi. Ãmõ, kwee remẽ Kiristu pewarà mõ, kee oro'e tite: “Mirà te'e teipõ ãwĩ”, oro'e tite ijupe. “Ikewarà teipõ”, oro'e tite ve. Ajamã'ẽ age'e remẽ aepo noro'ei ky'y. Orokuwa katupa ky'y. 17 Kiristu revejẽ jaiko remẽ, jane ipyau mã'ẽ vo jaiko ipi. Janereko ypykwerà wekyipa janewyi ity ipi.^b Aje Janejare'e janereko pyau oinõ janere ky'y. 18 A'evoa Janejare'e tè oinõ janere. Ãmõ, janemojimoryoka wee Kiristu rupi ky'y, ãwisõ jimorypa rõmõ rõwã ipe jaiko mijã remẽ. Ãwĩvo ve orerupi Janejare'e poromojimory wee ky'y, oromojenu ijayvu ãmõ kõ pè remẽ. Oreposikoa teãmã a'e. 19 Kee oro'e jane kõ motekokuwa ipi: “Kiristu omãnõma janerekovijarerà rõmõ. Ajawyi aje Kiristu revejẽ jaiko remẽ tè katu Janejare'e ojimory mijẽ janere ipi. Ajawyi janeaiwererà rè nojipy'amogetai iko ky'y”, oro'e imotekokuwa kõ ipi. Aepo e'i Janejare'e oreupe. Ajawyi aepo jaa oromojenu ipi. 20 Ajawyi Kiristu ayvu rupi emimojenuwerà rè poromotekokuwa oroiko ipi. Kee mã'ẽ vo oroiko. Ãwitõ Janejare'e ywete orerupi oporegeta, “Kee Kiristu ekoi”, toro'e pejẽ, a'evo oroiko. Ajawyi Kiristu ayvu rupi tè kee oro'e pejẽ: “Pepota Janejare'e ojimory pene, ãwisõ jimorypa rõmõ rõwã pejẽ remẽ”, oro'e. 21 Nuvei 'ete wete mijẽsi Kiristu aiwererà mõ ee. Ajamã'ẽ janerauvay rewarà mõ pirujẽ janeaiwererà Janejare'e omo'y Kiristu rè, ivo teãmã mã'ẽ rè. Nivoi mã'ẽ vo Janejare'e wereko Kiristu tomãnõ janerekovijarà rõmõ, janerereko katuarà rõmõ. Ajawyi tè ivo katu mã'ẽ rõmõ Janejare'e janerereko Kiristu revejẽ ky'y ipi.