3 Janejare'e ayvukwerà Kiristu rewarà oromojenu remẽ, jane kõ mõ kee e'i: “Noroenui emimojenuwerà”, e'i tite kupa. Noenu tari kupa rewarà mõ tè aepo e'i kupa. Temiovapykwerà vo 'ejẽ ijupe kõ ekoi ãmẽ. Waiwererà kõ revejẽ omãnõtà kupa. 4 Kee jaa oromojenu. Ikatuay wete Kiristu. Ãwitõ Janejare'e ywesõ ikatuay wete ekoi, ãwĩvo ve Jesu ekoi Ta'yry rõmõ, jaa oromojenu ijupe kõ. Aepo jaa noenui kupa, yvy pewarà kõ rõvijã rã'ãga^a noenuoka tari ijupe kõ rewarà mõ. Omoripeoka kõ aepo jaa toenu tare'ã kupa.

5 Ore rõwã orojimoe'e oroiko poromotekokuwa rõmõ. Jesu Kiristu rè kõrijõ ãmõ kõ oromotekokuwa, Janerõvijã ywete rõmõ toerovija kupa. Penemĩgwai kõ vo 'ejẽ oroiko pemokasiarà kõ rõmõ oroiko. Jesu tè oremonooka pekoty toroo. Ajawyi a'evo oroiko. 6 Karamoe remẽ itõkõ pãtõnusu kõrijõ ike rupi mijã. “Toyape” e'i Janejare'e remẽ, ãmẽ oyape ky'y. Aepo e'i maekwerà ywete janemotekokuwa Janejare'e ywesõ ekoia rè. A'e rupi Janejare'e kasiaya sikuwa. Ãmõ, ikatuaya sikuwa teve, Kiristu rè jamã'ẽ remẽ.^b

7 Agyvo tè jane jaiko. Turuwa vo 'ejẽ jaiko. Janejare'e 'Ãg rena vo jaiko. Ajamã'ẽ nijanekasi, yjy jinõgwerà vo tè. Ajawyi jajimokasità remẽ, Janejare'e wyi kõrijõ tè kuwa jajimokasi jaiko ipi. Janevote remẽ nijajimokasi kuwa'ãi jaiko. 8 [Oroo taa kõ rupi poromotekokuwa remẽ,] orojimomorijauvay oroiko ipi. Ajamã'ẽ Janejare'e orepijarĩ oremoisyry oremomorijauarà kõ wyi ipi. Ma'e remẽ norokuwai manyvotà oreikoa. Ajamã'ẽ orepy'a katu jẽ ee oroiko. Ãwĩvo ipe oroiko remẽ, orojirovija jẽ Janerõvijã ywete rè oroiko. 9 Mõa'ãrõwã ipe noreresa tari mãe kõ ekoi. A'e kõ oremomorijau ipe ipi. Ajamã'ẽ a'evo ipe orererekoa remẽ, Janejare'e nopoi'ãi orewyi ipi. Oremokasi jẽ orerereko ipi. Oremomorijaua ipe kupa remẽ, orokuve jẽ. 10 Jesu vo ve norokyjei oremãnõa wyi oroiko. Eevejẽ oroiko wyi norokyjei. Ajawyi ikasia rupi oroiko ipi. Ãwĩvoa ãmõ kõ okuwatà, orere omã'ẽ kupa remẽ. 11 Oroposiko oroiko remẽ, ike yvy pewarà kõ pè Jesu rewarà oromojenu jenu jẽ erokwa ipi. Ajawyi orejukatarà kõ opota jẽ orejuka ipi. Ajamã'ẽ Janejare'e ayvu rupi tè a'evo oroiko. Ma'e rewarà mõ. Ãmõ kõ omã'ẽ ore, Jesu oremokasi jẽ orerereko remẽ. Ãwisõ orepirà omãnõ mãe rã teipe remẽ, oremokasi jẽ toroiko. Ajawyi “aje” e'i ijupe kupa ky'y. 12 Ajawyi oromãnõ 'atà tè maevo. Ajamã'ẽ nimanyvoi ãwĩvo oroiko remẽ, pejẽ Janejare'e ayvukwerà peenu rewarà mõ. Pejẽ awyje peiko karuaru 'atà tè peiko, Jesu rè pejirovijapa rewarà mõ. [Ajawyi epy'a katu jẽtà penewarà mõ.]

13 Oremomarama ipe kupa remẽ, nimanyvoi oreupe ãmẽ. Noropoi'ãi Janejare'e rè jirovijaa wyi. Karamoewarà kõ vo rõwã oroikotà. Imojenua wyi ve noropoi'ãi. Kee ojikusiwa maekwerà rupi katu oroiko: “Ajirovija nere. Ajawyi neayvu amojenu aiko”, e'i maekwerà rupi katu.^c Janejare'e rè orojirovija rewarà mõ ijayvu oromojenu erokwa ipi. 14 Orokuwa Janejare'e tè omomoera Janerõvijã Jesu mã'ẽ. Ajawyi orokuwa ore ve Jesu reve oremomoeratà. Ajawyi penevejẽ orereraatà wena pè opyri tijaiko. 15 [A'evoa rõmõ ore orojimomorijau, Jesu Kiristu rekoa oromojenu peupe remẽ.] Oremomorijaua rupi pejirovija ee ky'y. A'e rupi teve aty wasu kõ ojirovija tary ve ee. Ãmẽ ywesõ Janejare'e poroereko katua okuwatà kupa. Ãmẽ sitõ a'e kõ ve omoe'età Janejare'e. Janereve omoe'età kupa ky'y.

16 Ajawyi norojimonyi 'ete ãwĩvo remẽ oroiko. Orojimokasi jẽ ãwijã mẽ oroiko ipi. Ãwisõ orepirà opa mãe rã teipe remẽ. Ajamã'ẽ orepy'a mokasi jẽ kõ'ẽ jawe jawe Janejare'e ipi. 17 Orojimomorijau ke'ĩatutà tè ipi. Ãmõ, orejimomorijaua nipuku'ãi teve. Ãmẽ orojimomorijau paire, awyje tekoua pè oroiko pukutà jimomorijau e'ãma pè awyje ky'y. Orejimomorijauawerà wyi wetesi orerepy rã. 18 Ajawyi orejimomorijaua rewarà rè norojimo'eai ipi. Janejare'e remime'ẽ rã rè ywesõ orojipy'amogeta oroiko ipi. Ãwĩvoa rã rè janerea nomã'ẽive ipi. Age'e jamã'ẽ ee mã'ẽ ke'ĩatu tè. A'e rè kõrijõ tè jamã'ẽ ipi. Ajamã'ẽ nijamã'ẽive ee mã'ẽ, a'e sõsi awyje mãerã tè.