“Penupi oreposikoa ojikuwa”, e'i mã'ẽ
3
Ivo oroiko ypy remeve itõkõ orekuwa katu pekupa. Ajawyi ivo katu oroiko mã'ẽ noromome'u'ãi pejẽ ky'y. Orekuwapa pekupa. Ajawyi ãmõ kõ remikusiwarerà oremoe'ea rewarà napeeka'ãi. Ãwĩvo ve penemikusiwarerà oremoe'ea rewarà ãmõ kõ noeka tite'ãi. 2 Ivo peikoa rewarà mõ itõkõ oremoe'epa kupa ky'y. Penupi tè jane kõ oreposikoa okuwa. Janejare'e pepy'a moteepa ky'y. [Ajawyi tè jane kõ pirujẽ kee e'i: “Ikatu tè Janejare'e omono Pauru Korĩtu wãnà kõ pè tomojenu, ãwisõ toenu katu kupa. Aja paire ojimotee kupa ky'y”, e'i kupa.] Kareta jikusiwarerà vo 'ejẽ ãwĩvoa pepy'a pupe. 3 Kiristu okusiwaoka mã'ẽ vo 'ejẽ pejẽ oreupe peiko. Kareta rè ojikusiwa mã'ẽ rõwã ajamã'ẽ. Pepy'a pè poromoigooka mã'ẽ tè Janejare'e. A'e o'Ãg pepy'a pupe okusiwa mã'ẽ vo sõ tite. Ajawyi pekuwa Janejare'e pewarà rõmõ tè pejẽ peiko ky'y.a4 Aje ywete Janejare'e rè orojirovija. Kiristu rè teve orojirovija. Ajawyi a'evo ore oroiko. 5 Kee noro'ei pejẽ ipi: “Mosikoa ikatuay mã'ẽ orekasia rupi tè oroinõ ipi”, noro'ei pejẽ ipi. Aje Janejare'e kasia rupi tè a'evo oroiko. Ãwĩ tè okasia ome'ẽ jane. 6 Janejare'e tè oremotekokuwa o'Ãg rupi oremokasioka rõmõ, ãwisõ wayvu janereko pyaukwerà rewarà toromojenu erokwa. Kee e'i ore: “Eayvu Kiristu rewarà pemojenu remẽ, ajirovijaokatà jane kõ pè e'Ãg kasia rupi aiko ipi. Apy'amoteeoka kõtà imoigooka karuaru kõ epyri ãmẽ”, e'i. “Aepo jaa tè tapemojenu erokwa ãmẽ”, e'i ije.b
Nãwĩvoi wayvukwerà tãmõ Moisesi pè okusiwaoka maekwerà. Nijanemokatuoka kuwai jimomorijaua rã wyi. Nijanemoigooka kuwai Janejare'e pyri tijaiko, manyvo nijaiko'ãi sire'e upi rewarà mõ. Na'evoi ijayvu pyau Jesu rewarà. Janejare'e 'Ãg janemokatu janemokasioka Jesu rekoa rupi tijaiko. Janemoigooka karuaru Janejare'e pyri janerereko. Ajawyi Jesu rupi janereko pyaukwerà ikatuay wete ky'y.
Kiristu rupi janereko pyaukwerà rewarà
7 Kee jaa itõkõ wayvu omojikuwaoka tãmõ Moisesi kõ pè remẽ. Takuru rè okusiwaoka wayvukwerà ivo tekoua rewarà Moisesi pè, [yvytyrapyte 'aryvo tui remẽ.] Poroeakwaso mã'ẽ watypa Moisesi a'evo remẽ. Poroeakwaso tesõ Moisesi rova ãmẽ, Janejare'e kasia renya rè. [Ajaire Moisesi werowyjy takurupe imogeta aty wasu kõ pè remẽ], Isaeu kõ nomã'ẽ'ãi kuwa ee. Ojirova 'ejẽ iwyi kupa. Mewe ova wyi ojisysry okwa iko. Ova yapea okwapa iwyi rire tè omã'ẽ ee kupa ky'y. A'evo Janejare'e omojikuwaoka wayvukwerà aty wasu kõ pè. Okasia rupi wayvu omojikuwaoka ijupe kõ.c 8 Tysi Kiristu rupi wayvu janereko pyaukwerà rewarà omojikuwaoka jane remẽ! Karamoe remẽwarà wyi wetesi okasia omojisaoka. O'Ãg tẽ tesõ omoigeoka janepy'a pupe janemokasiarà rõmõ, ãwisõ ijayvu rupi tijaiko ky'y.
9 A'evo itõkõ Janejare'e ayvu karamoe remẽ noenui kupa. Upi noikoi sire'e kupa. Ajaire oity e'e 'ete kupa. Ajamã'ẽ a'e omojikuwaoka ijupe kõ remẽ, okasiaya omojisaoka ijupe kõ. Age'e Jesu rewarà omojikuwaoka jane remẽ, o'Ãg tẽ tesõ omoigeoka janepy'a pupe ky'y. A'evo janemokasi tijapoi janeaiwererà wyi, ivo tijanerereko ky'y. A'evo remẽ ywesõ okasia omojisaoka jane ky'y. 10 Karamoe remẽ okasia omojisaoka imojikuwa. Ajamã'ẽ ãwitõ karamoe remẽ okasia omojisaoka remẽ, a'e ywesõ ikasiay mã'ẽ rõmõ ekoi. Aekwery ve ywete si okasia omojisaoka age'e remẽ. 11 Karamoe okasia omojisaoka remẽ, omojisaoka ke'ĩatu tè jane kõ pè. Na'evoi age'ewarà ky'y. Awyje mãerã tè omojisaokatà ky'y.
12 Ajawyi age'e remẽ, orojimokasiay Janejare'e ayvu mojenu erokwa. Janereko pyau nopa'ãi mã'ẽ tè oromojenu ky'y. Ajawyi norokyjei oroiko ky'y. A'evoa orokuwa. 13 Jane ãmẽ ovo rupi teve tãmõ Moisesi rekoawerà wyi. Janejare'e kasia renya mewe okwapatà Moisesi rova wyi remẽ, ojiovaõvã kamisa pupe Isaeu kõ wyi, tomã'ẽ e'ã ee kupa, ova renya okwapa iwyi mã'ẽ rè tomã'ẽ e'ã kupa.d 14 A'e kõ noerovija ywe'ei. Ajawyi Janejare'e kasia renya rè nomã'ẽi kupa. Aekwery vo jẽ tè ekoi ijeapyrerà kõ age'e remẽ. Ajawyi nomogeta kuwa'ãi Janejare'e remikusiwaokakwerà kupa. Nokuwai manyvo jaa tè kupa. Ãwitõ karamoe remẽ ekoi kupa, ãwĩvo ve ekoi age'e remẽ kupa. Nojimoteei kupa. Kiristu reve kõrijõ tè jaiko remẽ tè kuwa Janejare'e kasia rè jamã'ẽ. 15 Ajawyi age'e remẽ, Isaeu kõ tãmõ Moisesi remikusiwarerà omogeta remẽ, aekwery vo jẽ tè ekoi kupa. Notekokuwaive ee kupa. Ojiovaõvã mã'ẽ vo 'ejẽ ekoi kupa.e 16 Ajamã'ẽ Janerõvijã ywete rè jajirovija remẽ tè katu kõrijõ jatekokuwa ãmẽ ipi. Ojiovaõvã mã'ẽ vo rõwã jane ãmẽ jaiko ky'y. Janejare'e janerovaõvãno maevo sõ tite janerereko. 17 Janerõvijã ywete rõmõ Janejare'e 'Ãg ekoi remẽ, ijayvu oike katu janepy'a pupe ky'y. 18 Janeporakapa tesõ ijayvukasia. A'e rupi i'Ãg janepy'amotee ypy. Janepy'amotee jẽ janerereko, ãmẽ ywesõ eruparà mõ tijaiko ky'y. Ãmẽ ywesõ ikasia ojisaokatà janeupe. Jane kõ omã'ẽ janere remẽ, Janerõvijã ywete katuaya rè omã'ẽ kupa ãmẽ ky'y, ikasia rè teve.