2
Ajawyi ka'e pejẽ. Napotai poromoãgyooka. Ajawyi tè naai rã'ĩ pekoty. 2 Poromoãgyo sõ remẽ, nemoryoka'ãi kuwa pekupa mijã. Pejẽ kõrijõ tè emoryoka pekupa mãe kõ rõmõ peiko. 3 Ajawyi tè a'e kareta jypy remẽwarà akusiwa amãtejẽ imonooka peupe tapemã'ẽ ee. Pemotekokuwaa tè akusiwa, “Akuwa waiwererà wyi opoità amãtejẽ kupa”, a'e peupewarà mõ. A'evo remẽ tè aa pekoty remẽ, eroryvaytà pene ãmẽ. Pejẽ ãmẽ penoryvaytà ere, pejimoteepa rewarà mõ. 4 Napotai ãwĩ kareta akusiwa imonooka mijã, epy'a pirai tè rewarà mõ. Aja'otarẽ tesõ kareta kusiwa. Napotai pemoãgyo mijã. Kee apota tapejẽ ãwĩ kareta pemogeta remẽ: “Aje Pauru janerauvay. Ajawyi aepo okusiwa jane”, tapejẽ.Nivoi maekwerà py'aky'a'oa rewarà
5 Ãwĩvoa rè itõkõ akusiwa imonooka tapemã'ẽ ee. Pepyriwarà mõ waiwererà rè oposiko wyi, pejipy'amopirai tesõ ee mijã. Ije ve ãmẽ ajipy'amopirai epe aiko. Ajamã'ẽ pejẽ ywesõ pejipy'amopirai peiko. Ajawyi tè aekwerà akusiwa mijã. Age'e ka'e pejẽ ky'y. Napotai pemomorijau karuaru nivoi maekwerà ereko ky'y. 6 Pemomorijaupa ky'y. I'ete ky'y. 7 Waiwererà wyi opoipa. Aje, age'e ojimokasia 'arà okwa ky'y. Ajawyi ikatu ikõ pereko ky'y nẽ, a'e pejẽ. Ajawyi orytà Janejare'e ayvu rè ky'y. Ãmẽ tè nijãgyo karuaru'ãi, waiwererà opoi paire. 8 Ajawyi kee tapejẽ ijupe: “Aje oroau wyi tè, oromomorijau rã'ĩte nerereko, ãwisõ terejavy e'ã ky'y”, tapejẽ ijupe. Aepo pejẽ remẽ, okuwatà wauvaya ãmẽ. 9 A'evoa rõmõ tè ãwĩ kareta akusiwa imonooka pejẽ mijã. “Akusiwa ijupe kõ maekwerà rupi katu põ ekoi kupa?” a'e tè pejẽ mijã. 10 [Jypy remẽ itõkõ ijaiwererà emoãgyoay wete ãwijã mẽ.] Ajamã'ẽ age'e remẽ, opoipa waiwererà wyi ky'y. “Awyjepa” pejẽma ijaiwererà pè. Ajawyi ije ve “awyjepa” a'e ijupe ky'y. Poroauvay wyi a'evo aiko. Kiristu rovake a'evo aiko. 11 Kiristu rovake poromoryoka mijẽ remẽ, ãmẽ tè ãjãgai rõvijã Satanasi nijamoe'eoka ywe'e tite'ãi tojimokasi janere. Opota mijẽ janeaiwererà rè tijaposiko mijẽ ipi. A'evoa rè tijatekokuwa amãtejẽ jaiko.
12 Toraji taa pè aa Janejare'e ayvu e'eay Kiristu rewarà amojenu remẽ kõ Janerõvijã ywete nomowaypei eupe taposiko a'e pè. Wenu katu eayvu ãmẽ kupa. 13 A'evo ipe remẽ kõ ajikõtevẽ aiko, Titu naesai a'e pè rewarà mõ. A'e janeretãrã vo mã'ẽ tè Titu. Ajawyi kõ ajisyry te'ĩte aa Masetonia yvy kyty.a
“Kiristu janemokasi rewarà mõ jane ywesõ jaiko”, e'i mã'ẽ
14 Ka'e Janejare'e pè: “Nekatuay wete, Kiristu revejẽ oroiko rewarà mõ”, a'e ijupe. Aiwea 'arà kytywarà rõmõ Janejare'e. Janemomoioka Kiristu mãnõa rupi janererojivy janereru opyri. A'e tè orepyteporo oremono Kiristu rewarà toromojenu jenu erokwa jane kõ pè. Ajawyi maipe kyty oroo remẽ, Kiristu rewarà ojikuwa ãmẽ ky'y. Ãwitõ ipije katu mã'ẽ pirujẽ taa rupi otau e'ẽ tè ipi, ãwĩvo ve Kiristu rewarà pirujẽ tena tena kõ rupi ekoipa, oreremimojenuwerà rupi. 15 Kiristu rupi oroiko remẽ, Kiristu remime'ẽgwerà maevo sõ tite Janejare'e pè oroiko. Ãwitõ ipije katu mã'ẽ, a'evo 'ejẽ Janejare'e pè oroiko. Ãmõ kõ oromotekokuwa janerekoa pyaukwerà rè oroiko ipi. Werovija ypy mãe kõ oromotekokuwa oroiko. Noerovijaive mãe kõ teve oromotekokuwa oroiko. 16 Waiwererà reve omãnõtà mãe kõ pè inẽ mã'ẽ vo tè oreremimojenuwerà, nopotai enua kupa rewarà mõ. Ajamã'ẽ Kiristu rè ojirovijatà sikaepo mãe kõ pè ipije katu mã'ẽ vo oreremimojenuwerà ijupe kõ. Oreayvu rupi rõwã ãwĩ ayvu katuaya oromojenu ipi. Janejare'e ayvu rupi tè oromojenu erokwa. 17 Ãmõgwerà Janejare'e ayvu omojenu remẽ itõkõ karakuri repy rõmõ tè omojenu kupa ipi. Õ'õ rõwã põ ijupe kõ? Mosikoa e'e tè ijupe kõ. Na'evoi ore oroiko ajamã'ẽ. A'e kõ vo rõwã, karakuri repy rõmõ rõwã oromojenu erokwa ipi. Janejare'e tè oremonooka. Ajawyi tè ivo katu poromotekokuwa, Kiristu remĩgwai e'eay rõmõ toroiko. Janejare'e okuwa a'evo oroiko ipi.