Jesu koty rewarà kõ pè ãwĩ kareta akusiwa ajupa, Janejare'e omoe'e mãe kõ pè, mokope Korĩtu taa pè. Ãmõ, Jesu koty rewarà kõ Akaja yvy rupiwarà kõ pè teve akusiwa ajupa.^a

2 Janeruwasu ikõ tapenereko katu okatuaya rupi nẽ. Tapepy'amopiryvypy katu ikõ ipi nẽ. Janerõvijã Jesu Kiristu ve ikõ a'evo tapenereko nẽ.

3 Simoe'e ywete Janejare'e, a'e Janerõvijã Jesu Kiristu Ruu. A'e tè janeporijauesa jajimomorijau remẽ janerereko ipi. Janerõvijã ywete tè rewarà mõ janeporijauesa janerereko ipi. Ãmõ, janepy'amokasi jajimomorijau ipe jaiko remẽ. Janeãgyo remẽ teve a'evo janerereko. Janejare'e tè a'e rewarà mõ a'evo janerereko ipi. 4 Jajimomorijau remẽ, janemokasi janerereko ipi. Ajawyi ãmõ kõ ojimomorijau remẽ, simokasi kõ kuwa ipãtavõ kõ ãmẽ, jamã'ẽ ee kõ remẽ ipi. Janejare'e janemokasi janerereko maekwerà rupi a'evo sireko kõ ãmẽ. 5 Kiristu koty rewarà rõmõ tè jane jaiko rewarà mõ, ivo jẽ jajimomorijau jaiko ipi. A'evo remẽ janeporijauesa janemokasiay ipi. A'evo ãmõ kõ siporijauesa teve Kiristu kasia rupi ereko kõ ipi, jimomorijaua sikuwa remẽ. 6 Ajawyi orojimomorijau maekwerà rupi Kiristu koty rewarà kõ rõmõ pejimokasità ky'y. Janejare'e pepy'amokasità penereko ky'y. Ãmẽ oremokasia remẽ, pejẽ ve pemokasiaytà ãmẽ. Pejimokasiaytà teve tapejirovija jẽ Janejare'e rè peiko, pejimomorijau ipe peiko remẽ. Ãwitõ ore orojimomorijau ipe oroiko remẽ, noropoi iwyi oroiko ipi, ãwĩvotà pejẽ peiko. 7 Ajawyi norojimonyi pene ãmẽ oroiko. Noromoa'ui Jesu Kiristu rekoa wyi pepoia. Ãwisõ pejimomorijau ipe orevo jẽ peiko remẽ, napepoi iwyi peiko ipi. Pejimokasi jẽ peiko, orevo jẽ peiko. Orokuwa a'evo peikoa, eretãrãgwerà kõ.

8 Ajawyi apota pekuwa manyvo Asia yvy pè oroiko maekwerà. Noromoa'ui oreikoa, oremomorijauvay 'ete kupa remẽ. Oremãnõa kõrijõ tè kõ oromoa'u mijã.^b 9 Ãwĩ tãwĩ jajukatà mã'ẽ vo 'ejẽ ore ky'y. “Janejare'e teipõ opota a'evo oreikoa”, oro'e, ãwisõ torojirovija ywete ee oroiko ky'y. Ajawyi kee oro'e ky'y: “Janejare'e tè omãnõ mãe kõ omomoera ipi. Ajawyi a'e rè kõrijõ tè janerako'i ipi. Janekasia rè rõwã janerako'i ipi”, oro'e. 10 Ajamã'ẽ Janejare'e tè orerereko katuoka oremomorijaua wyi ipi. Oremokatu jẽ orerereko, toromãnõ e'ã amãtejẽ oroiko. Ajawyi a'e rè kõrijõ tè orerako'i oremokasiarà rõmõ oroiko. Aje, orerereko katu jẽtà orerereko ipi. 11 Ajawyi tapeporegeta oreupewarà mõ Janejare'e pè ipi, toremokasi jẽ orerereko. Pejimoatypa remẽ tapeporegeta Janejare'e pè torerereko katu orerereko ipi. A'evo orepãtavõtà pekupa ãmẽ. Aja paire peenu aepo remẽ pirujẽ pemoe'e ywetetà Janejare'e ãmẽ ky'y.

12 Oreroryvay, Janejare'e ivo katu orerereko oroo oroposiko remẽ ipi rewarà mõ. [A'evoa rupi, oromoawyjepa oreposikoa ky'y.] Orepy'a katu ee oroiko ãmẽ ky'y. Ivo katu oroiko peneve maekwerà rè ywesõ orerory oroiko ipi. A'evoa oropota ipi. Ajawyi itõkõ noreayvu teitetei itõkõ pepyterà rupi oroiko ipi. Ãmõ taa wãnà kõ pyterà rupi teve a'evo oroiko ipi. Janejare'e kasia rupi tè a'evo oroiko ipi. Orotekokuwavay ee oroiko ipi. Orevote rõwã ajamã'ẽ a'evo oroiko. Janejare'e tè oremotekokuwavay rewarà mõ tè a'evo oroiko. 13 Ãwĩ kareta orokusiwa pejẽ mã'ẽ niwaypei peenu ky'y. Ajawyi pekuwa katutà imogeta ãmẽ ky'y. Ãmẽ tè niwaype'ãi pejipy'amogeta ee peiko. Apota petekokuwavay ee peiko. 14 Age'e remẽ napetekokuwaive peiko. Ajamã'ẽ apota aã kareta rupi pejimotekokuwavay peiko ky'y. Ãmẽ tè Janerõvijã Jesu uu mijẽ remẽ, ãmẽ sõsi pejimoe'età orere ãmẽ peiko ky'y. Ãwĩvo ve orojimoe'e tary ve pene Jesu rovake oroiko.^c

15-16 Ivo katu aiko maekwerà pekuwapa. Ajawyi ajipy'amogeta eoa rã rè aa penesa mã'ẽ. Apota ipe aa penesa mijã, toporomory Janejare'e ayvu rè pemotekokuwa. Masetonia yvy rupi aa remẽ, apota ipe aa penesa mijã. Ajaire, ajivy mijẽ ajo remẽ teve, apota ipe aa pekoty mijã, tepãtavõ eoa repy rè pekupa, Juteja yvy kyty aa remẽ.^d 17 Ewari tè rõwã, “Aatà penesa”, a'e remẽ mijã. Eayvu teitete mã'ẽ rõwã ipe ije mijã!

18 Temirovija rõmõ tè Janejare'e ekoi. Aje ywete e'i mã'ẽ teve. Ajawyi ije ve apota ivo katu aiko eruparà mõ mã'ẽ. Ajawyi, “Aatà penesa”, a'e pejẽ remẽ, iwari mã'ẽ vo rõwã aiko. 19 Kee rewarà mõ. Jesu Kiristu, Janejare'e Ra'yry aje ywete mã'ẽ tè. A'e rè ije poromotekokuwa aiko ipi. Ãmõ, Sirasi^e pemotekokuwa teve ee iko ipi. Ãmõ, Timoteu a'evo ve ekoi. Ãwĩ tãwĩ wayvu nomoteei mã'ẽ tè Jesu. Uu ayvu rupi katuay ekoi ipi. Werovija katu ipi.^f 20 Ãwĩvo ve Janejare'e, pe'ĩ'yte oporegeta mã'ẽ tè. Wayvu rupi katuay ekoi ipi. A'evoa sikuwa ãmẽ. Ajawyi, “Ivo katuay wete”, ja'età Kiristu rupi Janejare'e katua rè. A'evoa rupi ivo ve Janejare'e ywesõ ekoia rè jaja'atà. 21 Janejare'e tẽ tesõ okasia ome'ẽ jane, Kiristu revejẽ jaiko mãe kõ rõmõ tijaiko. Janemoe'yi oupewarà rõmõ tijaiko. 22 Oupewarà mojikuwapa oinõ janere. O'Ãg tẽ tesõ oinõ janepy'a pupe, [oupewarà mojikuwaparà rõmõ]. A'e rupi pirujẽ wemime'ẽ rã omojikuwaoka janeupe, ãwisõ “aje ywete” tija'e ijupe ipi.

23 Emã'ẽ. Janejare'e okuwa manyvore põ naai penesa jypy remẽ mã'ẽ. Epy'a pupewarà okuwa ipi. Poroporijauesa aiko rewarà mõ tè naai penesa mijã. [Apota ipe aa penesa remẽ, ajamã'ẽ naai penesa.] Napotai poromosĩoka aiko. A'evoa Janejare'e okuwapa. 24 Noropotai orojiayvumokasi pene oroiko, Janejare'e rè pejirovija mã'ẽ rè. Oropota poromokasi kõrijõ penereko, tapenoryvay peiko ky'y. Oropota tapejimokasi jẽ Jesu rè pejirovijaa rè peiko ãmẽ.