“Tapetekokuwa peiko”, e'i mã'ẽ
13
1-2 Aa penesa remẽ itõkõ, mõrijõ rõmõ tesõ aa. Kee a'epa itõkõ nivoi mãe kõ pè, pepytery pè aiko remẽ: “Ivo tapeiko. Peaiwererà tapeitypypyipa awyje”, a'epa itõkõ pejẽ. Ãmõ, “Jesu revejẽ jaiko remẽ, janeaiwererà rè nijajirojivyi mijẽ japosiko ipi”, a'epa itõkõ pejẽ. Mõrijõ rõmõ aa penesa remẽ itõkõ a'evoa rè aporegetapa pejẽ. Age'e remẽ, ke'ĩrõwã aiko pewyi ky'y. Ajawyi ãmõ remẽ, aa mijẽ pekoty remẽ, “aje ipo” na'e'ãi pejẽ ky'y. Noporoporijauesa'ãi teve ãmẽ ky'y, moapy rõmõ tesõ aa ky'y rewarà mõ. Kee e'i Janejare'e ikusiwaoka maekwerà rupi katu poroerekotà: “Nivoi mã'ẽ jamo'ytà ava mõ rè remẽ, pe'ĩte mã'ẽ remikuwa rupi rõwã ta'evo. Mõrijõ e'i mã'ẽ remikuwa rupi tè ikõ ‘aje’ taoty nẽ. Moapy rõmõ e'i mã'ẽ remikuwa rupi teve. Ta'evo kõrijõ ikõ peiko nẽ”, e'i maekwerà.a Ajawyi aekwerà rupi katu poroerekotà ky'y. 3 Ãmẽ a'evo poroereko remẽ, pekuwatà Kiristu ayvu rupi tè aposiko ajupa. Ajawyi “aje” tapejẽ eupe ky'y. Kiristu kasia rupi tè poroerekotà ky'y. Nikasi mã'ẽ rõwã Kiristu. Aje ikasiay wete mã'ẽ tè. Okasia omojisaokatà pepytery pè ãmẽ. 4 Yvyra jipokana rè itõkõ omoputuputuri ijuka kupa. Nikasi mã'ẽ vo 'ejẽ wereko kupa. Ajamã'ẽ Janejare'e kasia rupi tè opoera mijẽ oiko mijẽ rõmõ. Age'e si awyje oiko jẽ oiko ky'y. Ãwĩvo ve ore, Kiristu reve pe'ĩypyte mã'ẽ rõmõ. Norepikasi epe oroiko. Ajamã'ẽ Janejare'e kasia rupi tè oroiko. Ajawyi oroo mijẽ pepytery pè oroiko remẽ, Janejare'e kasia rupi tè poromosã'ãgatà ky'y.5 Ajawyi tapejimosã'ãga amãtejẽ esa. Aje ywete põkõ Jesu Kiristu rè pejirovija katu? Napekuwai sipõ Jesu Kiristu 'Ãg pepy'a pupe ekoi, aje ywete pejirovija ee remẽ? Napejirovijai ee remẽ tè katutà, naiko'ãi. 6 Aje ywete pejirovija ee remẽ, pekuwatà ore ve aje ywete upi oroiko. Oropota a'evoa pekuwa. 7 Janejare'e pè oroporegeta peupewarà mõ remẽ, kee oro'e oporegeta ipi: “Emokasi kõ oterẽ jẽ neremimota rupi toiko kupa. Nivoi toiko e'ã kupa”, oro'e ipi. Kee noro'ei: “Oremojikuwaoka ivo katu poromotekokuwa mãe kõ rõmõ rejupa”, noro'ei. 8 Oropota aje mã'ẽ tè tojimo'ypa. A'e rupi poromosã'ãgatà, aje nivoi peiko remẽ, aje ivo peiko remẽ. 9 Janejare'e ayvu e'eay rè pejimokasia ywesõ oropota. Ajawyi nimanyvoi oreupe norekasi pewyi remẽ. Orerory ãmẽ pene oroiko ipi. Ajawyi kee oro'e Janejare'e pè peupewarà mõ ipi: “Papa yvapewarà, nekasia eme'ẽ Korĩtu wãnà kõ pè, age'e remẽ ywesõ tojirovija ywete nere kupa”, oro'e peupewarà mõ ipi. 10 Ajawyi aã kareta akusiwa tapemã'ẽ ee, naaive pekoty remeve. Ajawyi kareta rupi tè poromogetatà, kuise'ẽ tapepoi amãtejẽ peaiwererà wyi, ãwĩvo mã'ẽ tè. Ãmẽ tè avãe pepyri remẽ, noporomogeta mijẽ'ãi a'evoa rè aiko ky'y. Janerõvijã ywete tè eayvumokasioka. Ajamã'ẽ pemokasia rõmõ tè eayvumokasioka. Pemoaia rõmõ rõwã eayvumokasioka ipi.
Kareta moawyjepaa
11 Aepo kõrijõ tè akusiwa pejẽ ajupa, eretãrãgwerà kõ. Tapejimokasiay wete age'e remẽ ywesõ Janejare'e ayvu rupi katu tapeiko, a'e pejẽ. A'evoa rè tapejimokasi ojee peiko. Pe'ĩypyte mã'ẽ rõmõ tapeiko. Tapepy'a piryvypy katu kõrijõ peiko ipi. Janejare'e peneve ekoità ãmẽ, penauparà rõmõ, pepy'a mokatuarà rõmõ. 12 Ãmõ, tapejimory katu ikõ ojeeve Jesu koty rewarà kõ rõmõ peiko ipi nẽ, pejirovãe remẽ upi upi.
Pirujẽ ikewarà kõ Jesu koty rewarà kõ opota ojimory pene aã kareta rupi.
13 Janerõvijã Jesu Kiristu ikõ tapenereko katu okatuaya rupi ipi nẽ. Ãmõ, Janejare'e ikõ tapenauvay wete teve penereko ipi nẽ. Ãmõ, i'Ãg rupi ikõ pe'ĩypyte mã'ẽ rõmõ tapeiko ipi nẽ. [Aepo a'e kõrijõ tè eremikusiwarerà rupi pejẽ. Awyjepa.]