Mi e nilene piprola mee fi yire alele fina sa yeꞌre piprola mee. Mana e yeꞌre piprola namo youw wone nanrona “iramana” e sios e God. Mi mingklari e histri e Kristen sios yire alele nanrona piprola namo sa yolowi Jon. Ka Jon sa aposel namo isi waiye ekrene plau Jisas. Jon yeꞌre piprola namo pai Gaius ka mana Gaius namo sa mana fina isi yangke nale uporo fa yopaleye nu Kristen pinuma e sios e Jon, fopi fa nupone mokoi namo ka panri mokoi wongke fa nopro mi alwone e God e noula e Jisas Krais.

Jon yeꞌre piprola namo fa e keryane Gaius e nale fa yopale nu Kristen fopi e fa nangke ommo e Manawamo. E mone mangke nanrona ka mone mewmew nu plai fopi fa nopro mi alwone e God, mone muku bilip e mone ka memei memoku mangke ommo plau God ka nu plai fopi fa nangke ommo e God. E piprola Jon keryane Gaius e yeri kero nale e fa mewmewne nu Kristen. Ka re Jon keryane Gaius e fi yupene nale e iramana wongke noula Diotrefes fina fi fa yangke nale uporo e fi fa yupu nu Kristen plai painri nopro mi e God mow woneni. Ka Jon youw noula e mana wongke noula wunini Demitrius ka nale e wu fa yuku alele nanrona wu namale God. Nanrona fane mi nomu e piprola mee fa e keryane nale e fa bilipne fa wolnaline nu plai ka nenruro rama fa nu Kristen plai ese nopro mi alwone e God.