Piprola wongke e
Jon yeꞌre
1
Ki iramana e sios e God,
keꞌre piprola mee pai yene.
Piprola mee pai yene pin namo.
Yene pina God e isi yaure yene wunini pekeule kongkom mingklari yeneni namo.
Mone mingklari namale mi alwone e God pu.
Ka e nomu namo nro,
ki wola pone wamo.
Ka ki kire kirepi pone nanrona,
seke ki nro fa samo wolake pone.
Uma mingklari e namale mi alwone e God,
samo wolane pone wamo.
2 Nomu e mu fa samo wola pone namo,
sa nanrona,
mi alwone e God waiye kero mone pu ka wu ese waiye plau mone nanrona nanrona.
3 Aina God yane Jisas Krais,
Auna e Aina God namo,
ese wolyane ka samo wolpalo mone ka yane wolpuna raulo mone.
E fika,
ommo namo ese mone mem noloni Aina God ka Auna wunini e mi alwone e God ka nale e fa samo wolane nu plai sam waiye kero laip moneni.
Mone mupene nale e fa samo wolnane nu plai
4 Ompla wongke e yangke ki aiyem wamo namo,
sa ompla e ki kuru nanrona kongkom plai yeneni namo e nupene mi alwone yukaine e Aina yire mone ese mupene.
5 Pin,
piparola mee e ki keꞌre pai yene namo,
ki kuna mi pone ese pupene.
Ki fei kopro lo keklepe wongke kore.
Sa onne!
Mi mee,
sa mi e lo mone isi mem pu.
Nanrona fane ki kari pone ese pupene lo namo,
sa mone ese samo wolmale mone kore.
6 Nale e fa samo wolane nu plai namo,
sa nanrona mone samo maime wolpunwokera ka samo mupene lo e God.
Lo wunini namo,
pone oii isi pem pu.
Ka lo namo sa yire nanrona:
Pone ese pupene nale e fa samo wola nu plai.
Mone muna kero mi e Krais
7 Uma mingklari fa karnirene namo naine pu namee naraine pike mee.
Nu uma namo fi nopro mi alele nanrona Jisas Krais isi yolowi pike yukaine manale.
Nu uma e fa karnirene namo,
sa fa naine yukaine nu iim e Krais.
8 Pone poo!
La pone pupone mi e Krais ka ompla uporo namo e mone amparpunume namo ese rikepone pone.
Pone samo peri kero ese pem ommo uporo mingklari namo God ese yali pone.
9 Le mana yupone mi e Krais ka yopro mi wongkeni fi resukru mi e Krais namo,
God e fi yem koii ka waiye laip e mana namo.
Le mana yuna kero mi e Krais,
sa Aina yane Auna nem koii ka naine laip wunini.
10 Nanrona fane,
le mana wongke yolowi pone yire yukule pone mi e God,
ka wu fi yuna mi namo yolowi,
sa pone ese fi nale kingkri ka pire kaire uporo poneni pai wu ka re,
pone ese fi pouw wu pai mow poneni sa nenrape.
11 Mana e yire kaire uporo ka yemei fori e mana namo ka yangke nale uporo wu,
wu waiye plau mana namo e ommo fafaile wunini.
Iramana e sios yire pai yuru nu
12 Ki kuna mi mingklari naiye kire kirepi pone.
Ka ki kum e fi keꞌre mi namo niye piprola mee.
Ki wola kire koloki namo ka kuru pone ka memmoku ka memmurume mone ka mopro mi pone e ommo namo.
Ka namo sa ese yangke mone mingklari aimem wamo.
13 Kongkom e yene pinmela e God isi yem woneni namo,
nane kaire uporo yene.