2-3 Yene,

Kristen ino uporo kinini,

ki aikem wamo e ki kupu Kristen inomranimpi ka pinefe plai noloni ka nopro ki nanrona,

yene fa bilipim mi alwone e God,

ka ommo mingklari yene fa yangkeye namo fa yupene mi alwone e God nro.

Nanrona fane,

ki fa kesapuke God e ommo mingklari yene yangkeye namo,

ese nemei uporo nro ka yene wone re,

ese waiye aiyemye nro yukaine spirit e bilip waiye yene namo fa waiye uporo.

4 E ki kem mi nanrona nu kongkom kinini wona nunane mi alwone e God ka wona samo nupenene,

ompla namo yangke aiyem wamo yemei rikepone woluporo plai e ki fa kemke.

5 Yene,

Kristen ino uporo kinini,

e yene fa samo yupene nale uporo e mi alwone e God ka mewmew nu Kristen inomranimpi ka pinefe plai,

nale e yene namo sa yuku bilip yeneni e Jisas fa samo yangke ommo wunini.

Ka namo sa won alwone la nu Kristen inomranimpi ka pinefe plai e yene fa mewmewye namo sa nu uma plai e yene fi namale nu.

Nanrona fane nale e yene fa mewmewye nu uma plai namo,

sa ompla wamo fa yuku mak e bilip yeneni.

6 Plai e nu Kristen inomranimpi ka pinefe moneni namo isi painri nane yene ka noloni kore ka noprongkle nu pinuma e sios mee nanrona,

yene fa yangke nale uporo fa samo wolyaliye nu pinuma ka mewmew nu plau.

Ka nu ese painri nane yene kore,

ka e nu nire nupone yene ka painri koii wongke,

ese uporo wamo e yene mewmew nu ommo plai sa nu ese nungkam painri.

Yene ese mewmew nu resukru yukaine God wone fa wolaye yene ese yangke.

7 E fika,

nu nangke ommo e Jisas,

nanrona fane nu naraine mokoi mingklari noprongkle nu uma noula e Jisas.

Ka e nu nangke ommo namo naraine,

nu fi fa nem ompla wongke e nu uma fi fa bilipne Krais.

8 Nanrona fane mone ese mewmew nu uma nananrona fa mone ese memei memoku plau mangke ommo ese kero mane ommo e mi alwone e God.

9 Ki isi keꞌre piprola pai nu pinuma e sios pu ka kopro nu ompla namo.

Ka Diotrefes namo,

ningki kaire wu fa mew yufu wolpoku fa wu wone ese pai risiye.

Ka wu fi fa yupu ka yupene mi e mu.

10 Nanrona fane e ki koloki plele mokoi poneni,

ki ese kopro mi alele nale e wu fa yangkeye namo.

Wu mana fa karpoupai yoproye mu mi wongkwongkeni fei alwone.

Ka wu fi fa yangke nale namo nro,

wu fi yuꞌpu nu Kristen inomranimpi ka pinefe fopi fa noloni ka nopro mi namo e mow wunini.

Ka e nu plai e sios e wone nire numale nu Kristen inomranimpi ka pinefe namo noloni mow nunini,

wu fa miyaure ka re wu fa mimiyaliye nu uma woneni namo ese fi naine sios wunini.

11 Yene Kristen ino uporo kinini,

yene e fi yupene nale fafaile.

Yene ese yupene nale uporo nro.

Nu uma fa nangke nale uporo namo,

sa uma e God wone.

Ka nu uma e nangke nale fafaile namo,

sa nu uma fopi e fi samo namale God sa fina.

12 Demitrius namo,

uma mingklari fa noprone mi e nale uporo wunini.

Demitrius wu fa yupene mi alwone e God,

ka mi alwone e God namo fa yangke nale uporo yemei laip wunini.

Nanrona fane e rokoi namo,

mi alwone e God re fai yopro mi alele nale uporo wunini.

Ka e mee yene yupu nanrona mu re moprome mi alele nale uporo wunini ka yene namale nanrona mi e mu namo sa won alwone.

13 Ki kuna mi mingklari ese kirewi yene.

Ka ki kum ese fi kina panro piprola mee.

14 Ki won wolake kire koloki ka kane yene kawe maime ka mopro ommo namo.

15 Manawamo ese wolpun raulo yene ka yene yem wolpuna raulo ka waiye.

Nu Kristen inomranimpi pinefe yeneni e ki kakle maime mee,

nire kaire uporo nunini pai yene.

Yene re ese yirengkle nu Kristen inomranimpi ka pinefe wokwokera kinini e mokoi namo nanrona,

ki kane kaire uporo kinini pai nu.