Piprola e Pol yeꞌre pai
Filemon
1
Ki Pol,
ki kalabus mana e Krais Jisas e fika,
ki wunini.
Nam mee ki kaike kalabus Rom.
Filemon,
mone awail fa bilipme God namo maime oikenra wunini.
Nanrona fane kikane mela moneni Timoti wolame yene wamo yukaine yene sa mela munini.
Ka yene re fa yame mu mangke ommo e Jisas.
Nanrona fane kikane meꞌre piprola mee pai yene.
2 Piprola mee kikane meꞌre pai pone:
yene ka pinmela e mone Apia,
ka Arkipus sa mana fina fa yeri plau mone e iim wamo namo ka fa waiye yukaine iimmana kero e God ka nu uma e sios fopi fa noloni ka nemnoku mow e yene namo.
3 Aina God e mone yane Manawamo Jisas Krais ese wolyali pone ka nangke pone ese paipe wolraulo.
Nale uporo e Filemon namo, yangke Pol woluporo wamo
4 E ki fa wolrufuke yene,
ki fa kesapuke,
ka ki fa samo kane tenkyu God kinini.
5 E fika,
ki fa kupuke nu uma nopro mi mingklari wamo rona yene mana fa samo wolyane Manawamo Jisas,
ka yangke nale uporo wu ka nale plainren namolaye re yene fa yangke nu pinuma mingklari e God.
6 Ningkikaire ki fa kesapuke ka karike God ese keryane bilip yeneni ka yene ese mewmew nu pinuma e God ka nu re ese kernane yene ese yeri kero.
Le rona God wone ese yangke ommo uporo woneni ese yangke yene e yuru rona,
ommo uporo uporo e fa nemeine wolpuna e mone,
ommo namo ese mone mereri noula e Krais.
7 Mela kinini,
nale e yene fa wolyaneye nu pinuma e God ka keryaliye wolpuna e nu ka yangke nu neri kero ese bilipim Krais Jisas ka samo nangke ommo wunini.
Ommo namo sa yereri yane wolpuna e ki ka ki aiyem ka kem wolpun raulo wamo ka nomu namo nro ki fa kesapuke ka kire tenkyu God.
Filemon ese as yumane kore Onesimus yukaine inyanrani
8 Ki sa resukru ese kire mi alwone yene noula e Jisas Krais,
ompla fika yene ese yangke.
9 Ka,
ki ke wola nanrona ki e fi kawa yene ese yangke ompla namo.
Nale e fa samo wolnaline nu pinuma plai sa ompla wamo monkaweni.
Nanrona fane ki ese kire mi aplai yene.
Ki Pol,
ki alma pu ka ki kaike yukaine mana fa waiye kalabus e fa kungkamke mi e Krais Jisas.
10 Ka ki kire karine yene ese yangke nale uporo mana wongke fina fa waiye yukaine auna kinini.
Mana namo e ki kaike kalabus,
wu isi yolowi ki ka ki mewmew wu fa ese bilipim Krais ka naimele wu yemei yukaine auna kinini.
Noula e mana namo sa Onesimus
11 Isi wu sa mana fafaile fane fi yangke ommo plola e yene.
Ka naimele wu sa yemei yukaine mana uporo fa ese mewmew monkawea e ommo monkaweni.
12-14 Mana namo,
ki fa samo wolpuna yapaye wu wamo.
Isi ki wola kire kuna wu e yem koii yeneni maime mee ka mewmew ki.
E fika,
ki keri keroke miuporo fane nu nina ki kaike kalabus.
Ka ki ese fi kangke ompla wongke wolpuna kinini e yene fi yireni ki.
Ki kawane wu pai yene pu ka ki na wolake wu.
Nanrona fane ompla fika yene wone wolaye sa uporo ka yire yangke ese fa mewmew ki,
ki ese kuruke nro ka e fi kawa yene.
15 Alwone,
Onesimus yupone yene ka fi pai ripkikri.
Ki wola nanrona,
nomu e God mewyimai Onesimus sa nanrona,
wu anro ese bilipim Krais se sa wu ese yolowi kore ka yenyane ese paipe yukaine inyanrani nanrona nanrona.
16 Yene e fi yuru Onesimus yukaine mana siwole nro.
Sa onne.
Wu ese waiye yukaine mana siwole yeneni fa karyangkeye ommo yeneni,
ka mee yene ese yuru wu yukaine yenyane inyanrani ka yene ese wolyane wu wamo.
E fika,
ki kone namale pu nanrona kikonkane inyan rani ka ki wolkane wu.
Ka ki namale nanrona yene re ese samo namale ka wolyane wu wamo.
E fika wu waiye yukaine mana siwole uporo yenini,
ka yenyane re ese paipe yukaine inyanrani noula e Manawamo.
17 Le yene fa yuru ki yukaine fori uporo yeneni e ommo e Krais ka yene fa yangke nale uporo wamo ki,
yene ese yem kore Onesimus ka yangke nale nanrona wu yukaine e yene fa yangkeye ki namo.
18 Le wu isi yangke eni plai yene wee wu isi karyuꞌpu ommo plai e yene ka wu fi yawe yene romaula,
sa yene ese yina ommo fika e wu karyuꞌpuye namo waiye mew wola e ki.
19 Ki Pol e keꞌre piprola mee e mew ki koneni pai yene.
Ki kone ese kawe yene romaula ese yem kore koii e ompla wu karyemye namo.
Ki ese kire nanrona laip yeneni sa karyemye ompla e ki.b
Ka ki sa kum ese fi kopro ompla namo.
20 Mela kinini,
monkawe ese maime uma e Krais.
Ka noula e Manawamo moneni,
ki wola kire yene ese keryake wolpuna kinini sa ki ese kem wolpun raulo.
21 Ki namale nanrona yene ese yangke ommo yukaine mi e ki keꞌre wiye piprola mee.
Ka yene ese samo yupene ka yangke ommo e ki karine yene mee,
ka yene ese yangke nale uporo plai kore.
22 Ka ompla wongke kore ki ese kirewi yene.
Ki bilip nanrona God ese yupu pone pesapupe ka ese yangke rokoi kinini ese koloki ka kuru pone.
Nanrona fane yene ese yemplekuru koii rola wongke fa nilene e mow yeneni e taim ki koloki kape pone maime.
Nu uma fa nane Pol nemnoku nangke ommo namo nire kaire uporo pai Filemon
23 Epafras yire kaire uporo wunini pai yene.
Kikane maime kalabus e fika wu re e yungkam ommo e Krais Jisas.
24 Nu uma e ki fa kakle mangke ommo mee re,
nire kaire uporo nunini pai yene.
Nu uma namo sa:
Mak yane Aristarkus ka Demas ka Luk.
25 Manawamo Jisas Krais ese wolyali pone ka ese waiye plau ruwilmalma e pone.