Jü kaa tühua yoremem joähui
6
Ínel yeu siika juka yórembrata áu büruria tayteko,
buíata béppa usi jáamuchim ámeu yeu tomteko.
2 Jume Diosta üusim,
jume yoremem maalam musäla mamachímïm bíchaka,
yehuim am puaka úttiapo am nüka ame béchïbo.
3 Huanäi Yahue Dios ínel jiahuak:
«Im Jiápsi kaa pappeaka tahuana,
kanne juka yorembrata jíbapo béchïbo jiápsi ïa.
Bueïtuk áapo huakajta takahuak ciento veinte huásuktiriam jiba jiápsinake».
4 Huamëi taahuarimmet buíapo yoremem tüisi tettebem,
entok bem takahua úttiaka jípureka aaney.
Chúkula entok jume Diosta üusim jume yoremem maalam juube huanärim ámet usiak,
imeï júnen jume émo öouleme bannataaka naateka ousi aneka täyahuakame.
5 Huanäi Yahue Dios buíapo am bitchak jume yoremem kaa türik juebennak ámet ayukamta,
entok bem jiápsipo kaa türik jiba bem yáa báreka eähui.
6 Yahue Dios buíapo yoremta yáasuka,
ä jiápsipo kökosi ëeak,
yoremta ímï buíapo ä yáaka bétana,
entok jiba kökosi éaka taahuak.
7 Huanäi Yahue Dios ínel jiahuak:
«Sïme jume yoremem buíapo in yáakäune lútiaka kaitapo tahuaria báare.
Áamak éntok jume animaalim ára buktume,
entok jume buíapo émo huíikeme,
entok jume téhuekapo huikichim,
bueïtukne jámak kaa am yáakätek chë türi eiyey».
8 Të Noé,
Yahue Diosta bíchäpo,
tü eerita jípurek.
Noé barkota joohua
9 Imëi amëria jume Noétat nat tomti kateme:
Noé lútula huemta joaka yumálasi áu nüyeka jiápsay;
Diostámak huerámaka.
10 Noé bajim usiak:
Sem,
Cam entok Jafetta.
11 Diosta bíchäpom,
kaa türiku émo nasontek jume yorembram ímï buíapo jiápsame ,
entok katim jü juëna eehuámak yuuma bueïtuk ámet tápunak .
12 Huanäi Dios yorembrata buíapo jiápsame bitchak,
kaa türiku émo nasontelame;
bueïtuk buíapo böota bem huerïapom kaa türik jiba joohuay.
13 Huanäi Dios Noétau ínel jiahuak:
«Bejane huitti éehuamta jípure sïmem jiápsame lütia báareka,
bueïtuk bempörim béchïbo jü juena eehuame ániat tápuni.
¡Entok sïme ániatane lütia báare!
14 »Huäri béchïbo kuta goferpë barkota yáuhua;
huanäre nat béppa huaijhua áma káate entok koraim ilïchim entok buëurum kétchi,
éntokë breata at teeka huaijhua entok yeutana.
15 Huanäre ínel ä yáanake:
ciento treinta y ocho metrota tébiakamta,
entok veintitres meetro buékaakamta,
entok catorce metrom jikau bicha tébiakamta.
16 Ventanate,
at yahua jikat naateka medio metrota jipuna kom bicha naa chíkola.
Senu chakäku éntokë ä puertatua ïri barko entok baij pisom jipunake.
17 »¡Yuula,
akë ä bitcha!
Ínapone buére baania yuku bäata buíata béppa nüpanake,
huanäi sïme jume téhuekata bétuk jiápsame lütinake,
entok simë buía ániat jiápsame kokkonake.
18 Émomak éntokne,
nokta yechanake huanärem jum barkopo kimunake émpo,
entok jume em üusim,
em jámutta entok jume em üusim jáamuchim.
19 Entok sïme jume animaalim guouguóyika kaa nanälaika jiápsame ,
barkopë am kimanake émomak am jiápsinakë béchïbo,
animaal outa entok jámutta.
20 Guouguoyim nanälaika jume huikichim,
entok täbui animal,
entok két jume animaalim ilïchim buíapo huamhuamteme emohuim huenake bem jiápsinakë béchïbo.
21 Éntokë émomak ä nüye juka sïme buähuamta ára buätumta,
huanäre huaijhua ä ëria,
ïri buähuame émo béchïbotunake entok bempörim béchïbo».
22 Huanäi Noé ínel ä yáuhuak;
Diosta ä nésahuekä páman sïmeta yáuhuak.