Diluvio bäa ániata roptiak
7
Huanäi Yahue Dios Noétau ínel jiahuak:
«Barkopem kiimu émpo entok sïme em nau hueerim,
bueïtuk émpë in bíchäpo lútula jiapsa sïmem násuku.
2 Sïme animaal kaa chïcha maachim násukë guoy búsanim áma nüye náu jiápsaka usianakeme,
animal outa entok animal jámutta.
Të jume animal chïcha machim násuk náu jiápsaka usianakeme,
animal outa entok animal jámutta.
3 Entok kétchi téhuekapo huikichim;
guoy búsan huikit oohuim entok guoy búsan huikit jáamuchim,
bueïtuk ímëri buíata béppa kaa lüteka am jiápsinakë béchïbo.
4 Bueïtuk guoy búsan taahuarim simsuk,
ínapone buíata béppa yuktuanake,
cuarenta taahuarimpo entok cuarenta tukaarimpo,
huanäine sïmem in yáakau entok buíata béppa jiápsamene lütianake».
5 Huanäi Noé,
Yahue Diosta nésahuekä páman sïmeta yáuhuak.
6 Noé seiscientos huásuktiriam hueriay,
juka buére baania bäata buíata béppa siiko.
7 Ikäi buére baania bäata béchïbo,
Noé barkopo kibakek,
ä jubiámaki ä üusimmaki entok bem üusim jubimmaki.
8 Bemporimakim aaney jume animaalim kaa nanäilam jume Diosta bíchäpo türi buäa béchïbo,
entok animal mëehuame entok taahuame Diostau bicha buijhuame béchïbo hueeme,
entok két Diosta bíchäpo kaa türim jum huikichimak entok animaalim il-lïchim buíapo huanhuanteme.
9 Ímëri guoguóyikam Noétámak barkopo kimuk,
animal öou entok animal jámutta,
Dios jü Noétau ä nésahuekäpo ámani.
10 Huanäi guoy búsan taahuata yumak,
jü buére baania bäa buía ániat böotek.
11 Noe,
seiscientos huasiktiriam jípurey,
jü diesiciete taahuarit guoy mechata huey sïme jume bahue bäam kom orekame pejtek,
jü yuku entok,
jikattana téhueka bétana bürusim entok yünim emo étapok.
12 Huanäi buíata béppa yukkuk cuarenta taahuarimpo entok cuarenta tukaarimpo.
13 Ïri taahuarit Noé,
Sem,
Cam entok Jafet ä üusihuam entok Noeta jubi entok jume ä üusihuam juubim áamakim barkopo kimuk.
14 Bempo entok sïme jume animaalim kara buktume kaa nanälaika,
entok sïme jume animaalim buk béchïbo joihuatuarim kaa nanälaika entok sïme jume animal émo huíikeme kaa nanälaim,
entok sïme huikichim kaa nanälaika,
entok sïme animal másaka kaa nanälaim.
15 Ímëri júntuk guoguóyikam Noétámak barkou kimuk,
sïme jume huakajpo jiabiteka jiápsita jípureme.
16 Jume áman kimukame,
animaal öou entok animaal jámutta,
Diosta nésahuekä pámani.
Huanäi Yahue Dios barko puertata am pattiriak.
17 Huanäi bäa buére baania yukkuk cuarenta taahuarimpo buíata béppa,
huanäi jü bäa jikau siika barkota toboktiak buíata béppa.
18 Huanäi jü bäa tüisi juebénaka buíata béppa jikau siika,
jü barko éntok bäata béppa jepektisimey.
19 Huanäi jü buére bania jikau siika,
buíata béppa,
entok sïme kahui bueerem,
téhuekam bétuk ayukame roptek.
20 Jume kahui bueerem roptiasuka,
ketune guoy búsan meetropo jikau siika.
21 Ínëlim kokkok sïme jume buíapo jiápsame,
jume animaalim másakame,
ára buktume,
entok jume kara buktume entok sïme jume buíapo émo huíikeme,
entok sïme yoremem.
22 Jume buíapo jiápsaka jiabiteme,
sïmetakam kókkok
23 Ínëlim lütiahuak sïme jume buíata béppa jiápsähui:
yoremtámak naateka entok jü animal,
jume buíapo émo huíikeme,
entok jume téhuekapo huikichim,
buíata béppam lütiahuak.
Huanäi Noé jiba taahuak entok jume áamak barkopo anëihuim.
24 Huanäi jü bäa buíata béppa taahuak ciento cincuenta taahuarimpo.