6 Huanäi José muukuk,

entok sïme ä sailahuam,

entok sïme jume ámak hueerim.

7 Huanäi —jume Israelta üusim— yúnim üusek éntokim yún ápalam jípurek.

Huanäi emóm büruriak,

tepam juebénasi emo yáuhuak éntokim úttesi úttiata nüka,

huanäi sïme bem buía ámëi tápunak.

8 Junëli ä hueisu,

täbui rey áma yechahuak jum Egiptopo,

áapo Joséeta kaa täyai entok jita ä yaakähui.

9 Huanäi ä pueblobeu júnel jiaahua:

«Bejem ä bitcha,

jume Israelta üusi pueblo chë juebenna entok íto béppa chë úttiak.

10 En éntoko,

tüisitë at suaanake,

kaa am juebenanakë béchïbo.

Jáchin aika júne nássuahuamta ayuko ítom bejreka nássuammak chätuka,

entok ítom bejreka nássuanake,

huanäi ítom buiärapo yeu hueenake».

11 Huanärim beja yäuram áme béppa joiyak,

tékil béttesi kaa hueeläpo am jootua sahueka,

junëlim muksi am eetuak jü bette tékiliyi.

Huanärim úttiapo faraónta béchïbo kari bueremim yáuhuak jita áma ëeriahuäpo,

buere joäram Pitón entok Ramesés ti téhuaakame.

12 Të junëli chë béttesi jita jootuahuaka chë júnem juebénasim emo joohuai,

junëli jume egipciom akim am majhuey jume Israelta üusim.

13 Huanäi jume egipciom chë júne námakasi entok béttesi am tékipanuatuak jume Israelta üusim.

14 Junensum chibusi am eetuak béttesi am tékipanuatuaka,

techuata entok lak-riom am jootuaka,

entok huasampo sïme tékilta entok símeta bem jita joohuäpo.

Júmürim beja úttiapo béttesi am tékipanuatuai.

15 Huanäi jü Egiptopo rey sïme jume hebream parteerammeu júnel jiaahuak,

huepülaka Sifra ti téhuaakay,

senu éntok Fúa:

16 «Jume hebream jaamuchim asua aniäteko,

áachem suuhua.

Ä outuko akem ä mëa,

ä jámuttuk éntok,

eläpo jiápsinake».

17 Të jume parteeram Diostam majhuey,

huanärim Egiptopo reyta nésahuekäu kaa yáuhuak,

júnëlim beja kaa am súuhuak jume ili usi oohuim.

18 Huanäi jü Egiptopo rey jume parteeram nunütebok,

huanäi júnel ámeu jiaahuak:

—¿Jatchiakasem ím nésahui kaa yáuhuak,

jume ili usi oohuim kaa am mëaka?

19 Huanäi jume parteeram ínel ä yommiak juka faraónta:

—Bueïtuk jume hebrea jaamuchim,

kaa jume egipcia jaamuchim bébena;

bueere jaamuchimme,

éntokim laüti äasua parteerata kee jee ámeu yepsayo.

20 Huanäi Dios jume parteerammeu tühuata yáuhuak;

huanäi jü pueblo áu büruriak,

entok úttesi úttiata nüka.

21 Jume parteeram Diosta am majhueka béchïbo,

yún usim am makkak.

22 Huanäi jü faraón sïme jü ä pueblohua sauhuek,

ínel jíaka:

«Bat-hue Nilohuem ä jimma ili usi oüta yeu tomteko,

ili ä jámuttuk entok eläpo jiápsinake».