Jume Adántat yeu kat-riam
5
Ïri jü libro Adánta bétana nat tomti kat-riam áma jïojteri:
Huäri taahuarit Dios yoremta yáuhuak,
Diosta bennak.
2 Oouta entok juka jámutta yáuhuak,
huanäi éntok ä tü eäu am mákaka,
jume yoremem bétana huéme «yoremem» buíapo yáarim ti am téhuak,
huäri taahuarit bem yáahuakä béchïbo.
3 Huanäi Adán ciento treinta huásuktiriam jiápsaka áa bénak usiak,
tua áapörik bennak,
huanäi Set ti ä téhuaatuak.
4 Huanäi sïme jume Adánta taahuarim,
chúkula Setta usiasuka ochocientos huásuktiriam jiápsak,
óohuim entok jáamuchim usiak.
5 Entok jume taahuarim Adánta jiápsakäu,
novecientos treinta huásuktiriam,
huanäi muukuk.
6 Set ciento cinco huásuktiriam jiápsaka,
Enósta usiak.
7 Set,
Enósta usiasuka,
juchi ochocientos siete huásuktiriam jiápsak,
óohuim entok jáamuchim usiak.
8 Júnëli sïme jume Setta taahuarim novecientos dooce huásuktiriamtuk,
huanäi muukuk.
9 Enós noventa huásuktiriam jiápsaka,
Caínánta usiak.
10 Enós,
Caínánta usiasuka juchi ochocientos quince huásuktiriam jiápsak.
Óohuim entok jáamuchim usiak.
11 Entok jume Enósta taahuarim novecientos cinco huásuktiriamtuk,
huanäi muukuk.
12 Caínán setenta huásuktiriam jiápsaka,
Mahalaleelta usiak.
13 Caínánta Mahalaleelta usiasuka,
juchi ochocientos cuarenta huásuktiriam jiápsak.
Óohuim entok jáamuchim usiak.
14 Júnëli sïme jume Caínánta taahuarim novecientos dies huásuktiriamtuk,
huanäi muukuk.
15 Mahalaleel sesenta y cinco huásuktiriam jiápsaka,
Jaredta usiak.
16 Mahalaleel,
Jaredta usiasuka juchi ochocientos treinta huásuktiriam jiápsak.
Óohuim entok jáamuchim usiak.
17 Júnëli sïme jume Mahalaleelta taahuarim ochocientos noventa y cinco huásuktiriamtuk,
huanäi muukuk.
18 Jared ciento sesenta y dos huásuktiriam jiápsaka,
Enocta usiak.
19 Jared,
Enocta usiasuka,
ochocientos huásuktiriam jiápsak.
Óohuim entok jáamuchim usiak.
20 Junëli sïme jume Jaredta taahuarim novecientos sesenta y dos huásuktiriamtuk,
huanäi muukuk.
21 Enoc sesenta y cinco huásuktiriam jiápsaka,
Matusalénta usiak.
22 Enoc chúkula Matusalénta usiasuka,
Diostámak náa siika.
Entok juchi trecientos huásuktiriam jiápsak.
Óohuim entok jáamuchim usiak.
23 Junëli sïme jume Enocta taahuarim trecientos sesenta y cinco huásuktiriamtuk.
24 Enoc Diostámak náa siika,
entok ä anëpo kabétuk,
bueïtuk Dios ä nuk siika.
25 Matusalén ciento ochenta y siete huásuktiriam jiápsaka,
Lamecta usiak.
26 Matusalén,
Lamecta usiasuka juchi setecientos ochenta y dos huásuktiriam jiápsak.
Óohuim entok jáamuchim usiak.
27 Júnëli sïme jume Matusalénta taahuarim novecientos sesenta y nueve huásuktiriamtuk,
huanäi muukuk.
28 Lamec ciento ochenta y dos huásuktiriam jiápsaka,
huepülak usiak.
29 Noé ti ä téhuatuak,
ínel jíaka:
«Ïri itom jimyoretuanake jum jita itom joäpo entok mamammey itom tékipanüapo,
juka buíata Yahue Diosta bette nokta at chupakä béchïbo».
30 Lamec chúkula Noéta usiasuka,
juchi quinientos noventa y cinco huásuktiriam jiápsak,
óohuim entok jáamuchim usiak.
31 Júnëli sïme jume Lamecta taahuarim setecientos setenta y siete huásuktiriamtuk,
huanäi muukuk.
32 Noé quinientom huasukteka,
Semta,
Camta entok Jafetta usiak.