Caín entok Abel
4
Jü Adán Evata taatäyak huanäi at usiak,
huanäi Eva Caínta asuaaka ínel jiahuak:
«Yahue Diosta júnel eäpone usi öuta asuak».
2 Huanäi chúkula Abelta asuak,
Caínta saila.
Abel kabaram susuáayay,
Caín éntok buíata ëechay.
3 Të jak ániata huëpo,
Caín juka Yahue Diostau bicha näikiata,
buíapo yeu simlata áu ä tojjak.
4 Huanäi Abel két Yahue Diostau am nüpak jume kabaram,
bát hueerim chë áma äahuim.
Huanäi Áapo Abelta bíchaka áu tü ëeak entok aahuä nüpakäu tutürek.
5 Të Caínta bíchaka kaa ä tutürek,
entok juka áu bicha näikiata júnne.
Ä nüpakäu junnerä béchïbo Caín tüisi öomteka junnerak pujbatuk.
6 Huanäi Yahue Dios Caíntau ínel jiahuak:
«¿Jatchiakë öomtek éntokë junnerak pujbätek?
7 Bueïtuk émpo tüisi ayukätek,
türike pujba eiyey.
Të kaa tüisi ayukätek,
jü em Dios bejri enchi kobaseka huéiye,
júnentaka júnne empë ára áa béppatu».
8 Huanäi Caín ä saila Abeltau ínel jiahuak:
«Jante juya ániata bitbo».
Huanäi bem pasiyaluäpo am rejtey,
Caín ä saila bejreka áu mamam toboktiaka,
ä mëak.
9 Huanäi Yahue Dios Caíntau ínel jiahuak:
—¿Jüsu em saila Abel,
jaksu aane?
Huanäi áapo ä yommiaka ínel jiahuak:
—Kanne jünéiya.
¿Jachu ínapo ä suaya tékilek juka in saila?
10 Huanäi Áapo ínel áu jiahuak:
—¿Jitasë yáuhuak?
¡Jikkajae!
¡Jü em saila ojbo buíapo em guötiakau ínou chaaye,
lútula huemta nee yáasahueka!
11 Ïari béchïbo bette nooki émot chupnake,
ímï buíapo,
bueïtuk jü buía ä teni étapoka juka em saila ojbo mabetak.
12 Bueïtuk jü buíya ém tékipanuanakëu,
¡tüisi enchi ä tekipanuak júnne!,
kaibu chupnake jü em eechi,
buíapo kaakum jométakë naa hueenake.
13 Huanäi Caín,
Yahue Diostau ínel jiahuak:
—¡Buéresi juebenna jü jiokot in yaanähui éntokne kara yánti éaka ä mabeta!
14 Ëne ímï buíapo nee yeu béebak,
em anëpone kara aneka éusunake.
Entokne kaakum jométaka buía ániat naa hueramnake.
¡Jabe júnne ím hueramäpo nee tiakame,
nee mënake!
15 Huanäi Yahue Dios ä yommiak:
—Tua lútüriapo jabe júnne Caínta mëakätek,
guoy búsanisi bette nooki at chúpatunake.
Huanäi Yahue Dios Caíntat señalta at oorek jaabe júnne ä tiakame,
kaa ä mënakë béchïbo.
16 Huanäi Caín Yahue Diosta bíchäpo yeu siika,
buiära Nod ti téhuakäpo joatek,
Edén buíapo täata yeu huëu bétana.
Caíntat yeu kat-riam
17 Huanäi Caín ä jamuthua jubeka at usiak,
ïri éntok Enoc ti téhuakamta asuak.
Huanäi Caín buére joärata yechaka ä üusi téhuam Enoc,
ti ä téhuatuak.
18 Huanäi Enoctau,
Irad áu yeu tomtek,
Iradtau éntoko Mehujael áu yeu tomtek,
Mehujaeltau éntoko Metusael áu yeu tomtek,
Metusaeltau éntoko Lamec áu yeu tomtek.
19 Huanäi Lamec ä béchïbo guoy jáamuchim nüka.
Huepülaka Ada ti téhuaakay,
jü senu éntok Zila ti téhuaakay.
20 Huanäi Ada Jabalta asuak,
ïri éntok huakasim ára bukeka lona karimpo jójjoame üusek.
21 Ä sailahua éntok Jubal ti téhuaakay,
ïri entok sïmem jume arpam poname éntok baka kusiam ára kuseme üusek.
22 Zila két Tubal-Caínta asuak,
ïri éntok sïme sisïguok broncepo joohuamta ára joohuay.
Tubal-Caínta huayi éntok Naama ti téhuaakay.
23 Huanäi Lamec ä jáamuchimmeu ínel jiahuak:
«Ada entok Zila in nokähuem jíkkaja Lamecta jáamuchim,
akem ä jíkkaja juka ím nooki;
huepü yoremtane mëak kökosi nee yaakamta,
éntok jübua yötuta,
jitay nee béebakamta.
24 Bueïtuk jabe júne guoy búsanisi jiokot yanake Caínta mëakätek,
¡Entok két jabe júne nee mëakätek setentasi guoy búsanisi jiokot yanake!».
Setta yeu tomtekähui
25 Adán juchi ä taatäyak juka ä jámutta huanäi at usiak.
Ïri éntok asuaka Set ti téhuam ä makkak.
Huanäi ínel jiahuak:
«Bueïtuk Dios,
Abelta béchïbo ínomak annakemta täbuik nee asuatuak,
juka Caínta mëakähui».
26 Settau két ili uusi yeu tomtek,
huanäi Enós ti ä téhuatuak.
Huanäi naateka jume yoremem Yahue Diosta téhuapom,
oraciompo áu noktaitek.