Jü yoreme entok jü jámutta Diosta nésahui kaa yakähui
3
Sïme jume animaalim Yahue Diosta ániapo béppa yáakäu,
entok kara buktume jü bakot sïmeku chë buére máchitukay,
ïri jámuttau ínel jiahuak:
—¿Jachu Dios júnëli enchimmeu jiaula:
kátem ä buänake huepu juya takata júnne,
huertapo ayukamta?
2 Huanäi jü jámutta juka bakotta ínel yommiak:
—Jume juya taka huertapo ayukamtate ára buäye.
3 Të juya huertapo násuk hueekamta taka bétana,
Dios ínel jiahuak:
“Kátë ä buänake éntokë kaa at mamtenake júnne,
bueïtuk ä yáakätekë,
muknake”.
4 Huanäi jü bakot jámuttau ínel jiahuak:
—¡Ëe,
Kátem kokkonake!
5 Al-la Dios jünéiya bueïtuk huäri taahuarit ä büakätek,
enchim pusim etapotunakëhui,
huanärem Diosta bénanake,
juka türik entok kaa türik täyaka.
6 Huanäi jü jámut ä bitchak juka juya takata türiakähui entok ára ä buätühui,
entok ä bithuäpo musäla machiakay,
ïri juya taka tüisi buämachiakay jita yún täya béchïbo.
Huanäi juka takata nüka ä buäka,
entok ä kunahua két ámak anemta két ä miikak,
áapo két sïmeta ä nokau jíkkajak ïri két ä buäka áapörik bénasi.
7 Huanäi jume bem pusim étapotuk,
huanärim jüneëak takahuat kaa bem sankokähui.
Huanärim chuna sahuam náu jiikaka émo ámëi páttiak.
8 Huäri taahuarit kupteyo ïli jekayi Yahue Dios nok jiaahuim jíkkajak,
huertapo naa huemta.
Huanäi jü yoreme entok jü jámmut huertota juya násukim Yahue Diostam ëusuriak.
9 Huanäi Yahue Dios yoremta núnnuk,
ínel jíaka:
—¿Jaksë aane émpo?
10 Huanäi áapo ä yommiak:
—Em nok jíahuine huertopo jíkkajaka ä mamajhuek,
bueïtukne in takahuat kaa sankokay.
Huanäine ëusuk.
11 Huanay Dios éntok ínel áu jiahuak:
—¿Jábesu enchi tejhuak kaa em sankokähui?
¿Ö Jachë ä buäka juka juya takata kaa nee enchi buä sahuëhui?
12 Huanäi jü yoreme ä yommiak:
—Jü jámutta em nee makakähui,
juka juya takata nee miikak huanäine ä buäka.
13 Huanäi Yahue Dios jámuttau ínel jiahuak:
—¿Jitasa jü em yakähui?
Huanäi jü jámut ínel jiahuak:
—Jü bakot nee bäitähuak,
huanäine ä buäka.
14 Huanäi Yahue Dios bakottau ínel jiahuak:
«Íkäi em yaakä béchïbo bette nooki émot chë chupnake,
jume sïme animaalim ára buktume násuku,
entok sïme animaalim kara buktume násuku.
Entok en naateka em naa huëpe émo huiksisimnake,
éntokë buía toröchiata buänake en jiápsäpo tajti.
15 Bueïtuk enchi entok jámutta
náu enchimmet yeu kat-riam emo omtiahuamtane enchim maknake,
jume at yeu kat-riam kóbapom émot cheptinake,
émpo éntokë tempërimpo ä kïnake».
16 Jü jámuttau éntok ínel jiahuak:
«Em abe asuapone yún huantiriam émou ayutuanake,
éntokë tüisi kokösi yún huantiriam inneaka asuanake.
Em kuna beppë ampenake,
Të áapo entok émou kóba yötunake».
17 Jü yóremtau éntok ínel jiahua:
«Juka em jámut nokakäu em yáakä béchïbo
entok juka juya takata kaa enchi in buä sahuëu em buäkähui,
ïari béchïbo buíatat bette nooki at chuppe.
Entok em kaa tü yakä béchïbo kökosë jiokot aneka aahuä chuptuanake juka etta jibuä béchïbo em jiápsau tajti.
18 Huitcham entok tachïnom at siunake jü buíachi,
émpo éntokë ili juyata huajpo ayukamta buänake.
19 Koba mejëkë barutteka em buäyeu kobanake,
buíau em notteu tajti,
bueïtukë buía toröchiapo nüri,
éntokë toröchia buíau nottinake».
Jum huerto Edémpo yeu am bebak: jü Diosta tua eeri
20 Huanäi Adan ä jámut-hua,
Eva ti ä téhuak,
bueïtuk sïme jume ániat jiápsame ä ayekä béchïbo.
21 Huanäi Yahue Dios,
juka Adánta entok ä jámutta,
animaal behuapo supem am yáariak huanäi am supetuak.
22 Huanäi Yahue Dios,
ínel jiahuak:
«En éntok jü yoreme ito bénna,
tühuata entok kaa tühuata täyaka.
¿Én éntok kaa áu mam rútukteka juya takata yü jiápsihuamta nüna?
¡Ä buäka,
jíbapo béchïbo ái jiápsinake!».
23 Huanäi Yahue Dios Eden huertopo yeu ä béebak jum buíapo ä nühuakäpo buíata ä tekipanuanakë béchïbo.
24 Ínëli yoremta huertopo yeu béebak huanäi ángelesim áma jäbuak,
—entok senu ejparam beeteme sïme kätana naa kuakteme— juka juya yun jiápsihuamta taka böota am suayanakë béchïbo.