Girlina mǝnana à pe alú ka
8
A dyan ngga,
amur cau mala girlina mǝnana à pe alú ata ankúl ka:
Mǝsǝcau na,
kǝla mǝnana wu bang ngga ama,
“Sǝm kat ka sǝm ndanǝ surǝgir.”
Sǝa ma surǝgir ka kǝ yinǝ gusǝlǝ ɓamuru,
sǝ earcearǝu ka,
nda kǝ ɓak ɓwa ka.a
2 Ɓwa mǝnana kǝ sǝni kǝla surǝna rǝ gir ka,
ɓǝ̀ sǝlǝ ama malaká surǝ kǝgir kǝla mǝnana ɓoaro ɓǝ̀ surǝì ka ɗang.b
3 Sǝ ɓwa mǝnana earce Ɓakuli ka,
Ɓakuli surǝna rǝì.c
4 Ace mani ka,
amur cau mala li girlina mǝnana à ɗarǝna ankúl nǝi ka,
sǝm sǝlǝna ama kǝ nkúl pà kàm a ɓanza mǝnia mǝnana à nǝ̀ na kàngkàng ama ndanǝ yilǝmu ka ɗang.
Sǝ Ɓakuli ka,
kǝ nda mwashat,
kǝ ɓe pà kàm ɗang.
5 Agir andǝ abangŋo na kam pas mǝnana aɓwana kǝ peri abania ka.
Aɓea ka à nda a bumkuli sǝ aɓea ka à nda a nzali.
6 Ma'sǝm ngga,
kǝ Ɓakuli na mwashat sǝm nggǝ peri abani,
yì Tarrû mǝnana abani sǝ agir puro,
sǝ àkǝ̀ ce sǝ sǝm pak ka.
Mǝtalabangŋo ka nda mwashat,
yì Yesu Kǝrǝsti,
mǝnana nǝ bui sǝ agir kat puro,
sǝ nǝ yì sǝ sǝm pa.d
7 Sǝ amǝkwaɗi kat sǝ à surǝ mǝnia yì mǝsǝcau ka ɗang.
Aɓea aɓwana ka,
à lo malea ka,
à kǝ twali ama ankúl ka agir na nǝ yilǝmu.
Ace mani ka,
ɓǝa li girlina mǝnana à ɗarǝna ankúl nǝi ka,
à kǝ sǝni kǝla à ɗarǝna ankúl nǝ nggearǝia.
Sǝ acemǝnana ɓabumia pànǝ rǝcandǝa raka,
à kǝ sǝni kǝla à pangŋǝna gir mǝɓane.e
8 Sǝ girlina ka ndá nǝ̀ yinǝ sǝm tu aban Ɓakuli ka ɗang.
Kǝgir pà nǝ̀ amsǝa arǝ sǝm ɗang,
yi mǝnana ɓǝ̀ sǝm lì raka,
sǝ pà sǝm nǝ̀ kum ɓe kǝgir gbal ɗang,
yi mǝnana ɓǝ̀ sǝm lì ka.f
9 Kat andǝ amani ka,
wu tsǝk kir wun,
ɓǝ̀ sǝlǝe mala do kum-ɓamuru ma'wun,
ɓǝ̀ kǝa tsǝk aɓwana mǝnana à pànǝ rǝcandǝa aɓa paɓamuru malea raka,
ɓǝa kpa ɗang.g
10 Ɓǝ̀ ɓwa mǝnana pànǝ rǝcandǝa aɓa paɓamuru raka,
sǝno,
we ɓwa mǝnana a ndanǝ surǝgir,
aban li girlina ata ankúl ka,
pà nǝ̀ kum rǝcandǝa mala li girlina mǝnana à ɗarǝna ankúl nǝi ka re?
11 Anggo sǝ mǝ'eambǝo mǝnana pànǝ rǝcandǝa aɓa paɓamuru raka,
yì ɓwa mǝnana Kǝrǝsti wu aceì ka,
nǝ̀ ɓwarkî njar,
ata cau mala “surǝgir” mo!h
12 Aɓa pakki amǝ'eamrǝarǝu cauɓikea anggo ka,
wu nda ban pakki Kǝrǝsti cauɓikea,
yi mǝnana wu cia à pak gir mǝnana à earǝna nǝi ama pà a njari raka.i
13 Ace mani ka,
ɓǝ̀ girlina mǝnana ǝn nggǝ li ka,
nǝ̀ tsǝk mǝ'eambǝam nǝ̀ kpa aɓa cauɓikea ka,
pà mǝ nǝ li ulang mǝno yì nyama ɗǝm ɗang,
acemǝnana mǝ ngga ci ɓǝ̀ kpa ka ɗang.j