Acau amur càu mala doɓala
7
A dyan ngga,
amur agir mǝnana wu gilǝa ama ɓǝa sǝnggia ka.
Wu bangŋa ama,
“Ndanǝ ɓoaro yì mǝnana ɓǝ̀ ɓwa al mɓwama raka.”a
2 Sǝ acemǝnana a dyan ngga,
do-kiɗìkì angŋǝna ban ngga,
koya ɓwabura nani ka,
ɓǝ̀ al male yì mɓwama,
sǝ koya mɓwama nani gbal ka,
ɓǝ̀ al male yì bura.
3 Ɓwabura ka,
dumǝni wi púp ɓǝ̀ lumsǝ turo-ɓwabura male aban mami,
sǝ mɓwama gbal ka,
anggo nǝ̀ lumsǝ turo-mɓwama male aban burri.
4 Sǝ mɓwama a dyan ngga,
yì nda mǝtala nggūrǝì ɗang,
burri na.
Sǝ ɓwabura gbal ka,
rǝì ka male na ɗang,
mala mami na.
5 Wu kǝa ɓinǝia rǝ wun nongŋo-nda ɗang,
she ɓǝ̀ do ama nǝ eare ma'wun arǝarǝ wun,
ace mǝnana ɓǝ̀ wu kum dǝmbǝu mala pak hiwi ka.
Anzǝm mani ka,
wu nǝ̀ nyare a tarǝ wun.
Anggo ka pà wu nǝ̀ kpa aɓa karǝkiban mala Shetan ace ɗwanyi bwalrǝu ma'wun ɗang.b
6 Ən pa aban tsǝka wun nzongcau ama ɓǝ̀ wu dukɓala ɗang.
Mǝ nda ban bangga wun ama,
ɓǝ̀ ɓwa earce ka nǝ̀ gandǝ dukɓala.
7 Aɓa mǝsǝcau ka,
ǝn nggǝ earce ɓǝa pǝlǝa ama,
wun kat ka wu nda kǝla mim mǝnana dukɓala raka.
Sǝa ma koyan ngga ndanǝ male yì ulang ɓoro mǝnana Ɓakuli pe wi ka;
ɓeɓwa ka male yì ɓoro ka ndya ani ka,
sǝ ɓeɓwa gbal ka,
ndo anggo kac.
8 Adyan ngga,
mǝ nda aban na cau nǝ aɓwana mǝnana à malaká dukɓala raka,
andǝ aman-lú;
ndanǝ ɓoaro ɓǝa lidǝmbǝa nǝ do nǝmurǝia kǝla mǝnana ado ǝn dum nǝmurǝam ngga.
9 Sǝ ɓǝà pà nǝ̀ gandǝ bwal ɓamuria raka,
kǝpǝna dukɓala.
Nǝ̀ ɓoaribanì amur mǝnana à nǝ̀ do nǝ suno nongnǝban ngga.d
10 Sǝ aɓwana mǝnana à dumǝna ɓala ka,
mǝ ndanǝ nzongcau,
sǝ mǝnia yì nzongcau ka,
mala ɓamuram na ɗang,
nzongcau mala Mǝtalabangŋo na:
Dumǝna púp ama,
mɓwama pà nǝ̀ nying burri ɗang.
11 Sǝ ɓǝ̀ do ama nǝ̀ nying burri ka,
lǝmndǝ ama nǝ̀ do anggo nǝmurǝì,
ko à nǝ̀ bǝlí nǝ̀ nyare aban burri.
Sǝ ɓwabura gbal ka,
pà nǝ̀ pǝr mami ɗang.e
12 Aban cili wun ngga,
ǝn nggǝ na wun (mim nǝ ɓamuram,
Mǝtalabangŋo nǝ̀ na ɗang) ama,
ɓǝ̀ ɓwabura mǝkwaɗi ndanǝ mɓwama mǝnana paɓamuri raka,
sǝ mɓwame earǝna ama nǝ̀ do andǝi ka,
dumǝna púp yì ka,
ɓǝ̀ kǝa pǝri ɗang.f
13 Sǝ mɓwama mǝnana mǝkwaɗi na,
sǝ ndanǝ ɓwabura mǝnana paɓamuri raka,
sǝ ɓwabure earǝna ama nǝ̀ lidǝmbǝa nǝ do andǝi ka,
dumǝna púp ɓǝ̀ kǝa nying ɓwabure ɗang.
14 Acemǝnana ɓwabura mǝnana mǝkwaɗi na raka,
pǝlǝna ɓwa mǝnana Ɓakuli nǝ̀ é ka ata cau mala mami.
Anggo gbal mɓwama mǝnana mǝkwaɗi na raka,
pǝlǝna ɓwa mǝnana Ɓakuli nǝ é ka ata cau mala burri.
Ɓǝ̀ anggo raka,
amuna malea ka Ɓakuli pà nǝ̀ ea kǝla amale ɗang.
Sǝa ma ado ka,
Ɓakuli angŋǝnia à dumǝna kǝla amuna mala amǝkwaɗi.
15 Sǝ ɓǝ̀ ɓwabura ko mɓwama mǝnana mǝkwaɗi na raka,
earǝna ce ama nǝ̀ nying ɓi mǝnana mǝkwaɗi na ka,
nǝ̀ gandǝ o.
Aɓa mǝnia ka,
ɓwabura ko mɓwama mǝkwaɗi ka,
à panzǝkini,
pa aɓa kùrban ɗang.
Acemǝnana Ɓakuli ka tunǝ wun,
wu yi do aɓa dorǝpwala.
16 We mɓwama ka,
a sǝlǝa ko earka nǝ buo sǝ burrio nǝ̀ kum amsǝban?
Sǝ we ɓwabura ka,
a sǝlǝa ko earka nǝ buo sǝ mamo nǝ̀ kum amsǝban?g
Wu do kǝla mǝnana Ɓakuli tunǝ wun ngga
17 Koyan aɓalǝ wun ngga,
ɓǝ̀ duk ulang do mǝnana Mǝtalabangŋo tsǝki wi ka,
sǝ ɓǝ̀ do anggo kǝla mǝnana tunǝi amuri ka.
Mǝnia ka nda nzongcau mǝnana ǝn ci amur a'ikǝlisiya kat mala amǝkwaɗi ka.h
18 Ɓwa mǝnana angŋǝna dǝmbǝa à kasǝni wi ɓate sǝ yi kum tunǝban mala Ɓakuli ka,
ɓǝ̀ kǝa na ama nǝ̀ sǝmbǝrǝ ce ɗang.
Sǝ ɓwa mǝnana gbal à kasǝi wi ɓate ɗang,
sǝ kum tunǝban mala Ɓakuli ka,
ɓǝ̀ kǝa na ama nǝ̀ alta kasǝ ɓatau ɗang.i
19 Acemǝnana ko à kasǝi ɓwa ɓate,
ko à kasǝi wi ɓate ɗang,
mǝnia ka kǝ lǝmndǝ ɓe kǝgir ɗang.
Gir mǝnana à nǝ̀ na ce ka,
nda cau mala bwal anzongcau mala Ɓakuli.
20 Koyan aɓalǝ wun ngga,
ɓǝ̀ do kǝla mǝnana pak ɗiɗyal,
sǝ tunǝban mala Ɓakuli yi kumi ka.
21 A nda guro ɗiɗyal sǝ a yi kum tunǝban le?
Mǝnia yì gir ka ɓǝ̀ kǝa zunggǝli ɗenyicau mo ɗang.
Sǝ ɓǝ̀ a nǝ kum njargula mǝnana a nǝ pusǝ ɓamuro ka,
pangŋǝna turo nǝi.
22 Ɗenyi ama ɓǝ̀ a nda guro ɗiɗyal sǝ Ɓakuli tunǝo wu duk mǝkwaɗi ka,
Mǝtalabangŋo panzǝkino aɓa bu kùrban mala Shetan.
Anggo gbal,
ɓǝ̀ a ndá doɓamuro,
sǝ Ɓakuli tunǝo wu duk mǝ kwaɗi ka,
a dumǝna guro mala Kǝrǝsti,
sǝ pup a nǝ nggǝ pak gir mǝnana Kǝrǝsti banggo ka.j
23 Kǝrǝsti ka kúrna wun nǝ boalo mǝgule;
ace mani ka wu kǝa duk aguro mala aɓwapǝndǝa ɗǝm ɗang.k
24 Wun amǝ'eambǝam,
koyan aɓalǝ wun ngga,
ɓǝ̀ do kǝla do mǝnana nda a ɓalǝi ɗiɗyal sǝ Ɓakuli tunǝi ka.
25 A dyan ngga,
mǝ nǝ na wun cau amur agir mǝnana wu gilǝa amur ansarina mǝnana à malaká dukɓala raka.
Ən panǝ ɓe kǝ nzongcau mǝnana pur nǝban Mǝtalabangŋo ka ɗang,
she kǝ gir mǝnana ǝn nggǝ pà ado a twale mem kǝla ɓwa mǝnana nǝ ɓwamuru mala Mǝtalabangŋo,
à nǝ̀ earnǝi ka.
26 Aɓa dotanni mǝnana ndakam ado ka,
ǝn nggǝ sǝni kǝpǝna ɓǝ̀ ɓwa do anggo kǝla mǝnana nda a ɓalǝi ka.
27 Ɓǝ̀ a dumǝna ɓala ka,
kǝa na ama a nǝ pǝr mamo ɗang.
Ɓǝ̀ a malaká duk ɓala raka,
kǝa na ama a nǝ al mɓwama ɗang.
28 Kat andǝ amani ka,
ɓǝ̀ a al mɓwama a dukɓala ka,
a pak cauɓikea ɗang.
Sǝ ɓǝ̀ nsari al bura ka,
pak cauɓikea ɗang.
Mim ngga mǝ ndaban bangga wu anggo,
ace mǝnana ɓǝ̀ wu usǝlǝi kutio aɓalǝ atanni mala acau mala doɓala.
29 Ɓalǝ cau mǝnana ǝn nggǝ na wun ngga,
wun amǝ'eambǝam,
nda mǝnana ama:
pwari ueo ɗǝm kpǝm ɗang,
twal a dyan ngga aburana mǝnana à dumǝna ɓala ka,
ɓǝa do kǝla aɓwana mǝnana à panǝ amamǝna raka.l
30 Sǝ aɓwana mǝnana à kǝ ɓuà ado ka,
ɓǝa do kǝla aɓwana mana à dum nǝ bumkiɗikea raka.
Aɓwana mǝnana à dum nǝ oalo ka,
ɓǝa do kǝla aɓwana mǝnana ban kǝ ɓoaria wia raka.
Aɓwana mǝnana à ndanǝ boalo,
à kǝ kurki agir ka,
ɓǝa pa kǝla aɓwana mǝnana agir mana à kur ka,
à malea na raka.
31 Aɓwana mǝnana à ndanǝ agir-ngāli ka,
ɓǝa do kǝla à pànǝi ɗang.
Acemǝnana ɓanza mǝnia ka,
banì pà nǝ̀ sau ɗǝm ɗang,
kǝ yiu nǝ yiu a masǝlǝate.
32 Ən earce nǝma wu kǝa wu ɓuanǝbum wun amur agir mala do ɓanza ɗang.
Ɓwa mǝnana dukɓala raka,
ɗenyicau male ka nda amur turo mala Mǝtalabangŋo,
ace mǝnana ɓǝ̀ pwasǝ bumi ka.
33 Sǝ ɓwa mǝnana dumǝna ɓala ka,
ɗenyicau male ka nda amur agir do ɓanza,
acemǝnana kǝ earce nǝ̀ pwasǝ bum mami ka;
34 mǝnia ka tsǝk ɗenyicau male gakia.
Sǝ mɓwama ko nsari mǝnana malaká dukɓala raka,
kǝ tsǝk ɓamuri arǝ turo mala Mǝtalabangŋo,
acemǝnana kǝ earce ɓǝ̀ do ama,
pana rǝì andǝ ɓabumi kat.
Sǝ mɓwama mǝnana dumǝna ɓala ka,
kǝ ɗenyicau arǝ agir do ɓanza,
acemǝnana kǝ earce pwasǝ bum burri.
35 Ən nggǝ na mǝnia ka ace mǝnana ɓǝ̀ ɓoara wun ngga,
ǝn pa ban pǝrki wun ɗang.
Ən earce ɓǝ̀ wu pak gir mǝnana ɓoaro nda a njari ka,
andǝ pa ɓamur wun kat aban Mǝtalabangŋo nǝmurǝì,
pa a tarǝia andǝ gakia mala ɓabum wun ɗang.
36 Ɓǝ̀ ɓwabura sǝni kǝla pà nǝ̀ gandǝ bwal rǝì aɓa do male andǝ mansari male raka,
sǝ mɓwama ka apǝlǝa male kǝ lakki nǝ lakkya ka,
kǝpǝna ɓǝ̀ ali,
cauɓikea pa a ɓalǝi ɗang.m
37 Sǝ ɓwa mǝnana twalǝni ɓamuri,
mǝnana à ci nǝ tsǝa púp ama ɓǝ̀ pe raka,
nǝ eare male andǝ bwalrǝu,
pà nǝ̀ dukɓala andǝ nsari mana pur amuri raka,
pangŋǝna pe mǝɓoarne.
38 Lǝmndǝ ama ɓwa mǝnana al mansari male ka,
pangŋǝna mǝɓoarne.
Sǝ ɓwa mǝnana pur amur nsari,
sǝ na ama pà nǝ̀ dukɓala raka,
pangŋǝna pě mǝɓoarne,
mǝnana kuti mǝno ka.
39 Mɓwama ka,
nda ɓata kùrban mala nzongcau mala doɓala,
ɓǝ̀ burri nanǝ yilǝmu piu ka.
Sǝ ɓǝ̀ burri pak lú ka,
yì ka,
nǝ̀ gandǝ al ɓe ɓwabura mǝnana kat earkiyice ka.
Sǝ dumǝna púp,
ɓwa mǝnana kat nǝ̀ eare nǝ̀ ali ka,
nǝ̀ do ama mǝkwaɗi na.n
40 Sǝ yì ka,
yale ɓoaribanì mǝnana ɓǝ̀ do anggo ka.
Mǝnia ka,
sǝne mem na,
sǝ sǝni,
mim gbal ka mǝ ndanǝ Bangŋo mala Ɓakuli.o