Juséh her'oot do pawóp hẽ ajyy hesëëh doo sa s'ëëh ky n'aa panyyg n'aa hahỹỹh
40
Ti m' ta see pé noo gó kä m' Esito bä sa wahëh ta waa maheëk doo, ta waa moo hew'ëët do pãw daheeh ramoo bok sa wahëh kanen'aak doo. 2 Ti m' sa wahëh, Paraó häd näng doo, kawajããn wät sa wë, ta waa mahe'ëëk do sa wahëh wë, pãw moo wëëd sa wahëh wë. 
Genesis 40:1-23
3 Ti hyb n'aa m' Paraó mejũũ radawäts gëët. Ti m' radawäts gëët mä Paraó warahén n'aa tób yt hẽ tabahag'ããs hyb n'aa. Potipah né ti Paraó warahén n'aa sa wahëh. Ta tób yt né hẽ m' radawäts gëët. T'ĩĩ hẽnh né hẽ m' Juséh yt gëët doo. 4 Ti m' Potipah mejũũ Juséh gadoo hyb n'aa radewëës doo. Ti m' pãw moo hew'ëët doo, ta waa mahe'ëëk doo Juséh gado kän mäh.
5 Ti m' tii bä rababëë däk bä m', séd nemuun ras'ëë enäh. Esito bä wahë n'aa waa meheëk doo, pãw moo wëëd, tii bä kä m' rabesëëh. Sa s'ëëh ti anäng mä taky n'aa.
6 Ti m' Juséh bahõm bä sa wë jet'iip hadoo, taheg'ããs h'yy katón rabab'ëëh. 7 Ti hyb n'aa m' tabeaaj kän sa hã:
—H'ëëd hyb n'aa tii bë wén h'yy katón? —näng mä Juséh.
8 Ti m' raky hadoo:
—Séd nemuun ãã s'ëë enäh— näk. —Dooh babä hawät pé her'oot pé ãã s'ëëh ky n'aa —näk mä sa kyyh.
Ti m' Juséh ky hadoo sa hã:
—P'op Hagä Doo ti ji h'yy ganyyh ji baher'oot hyb n'aa ji s'ëëh ky n'aa. Bë maher'ood bë s'ëëh hã ỹỹ —näng mä Juséh kyyh.
9 Ti m' Esito bä wahëh n'aa waa meheëk do sa wahëh her'ood kän mä ta s'ëëh:
—Hỹỹ d’ säh ỹỹ —näng mäh. —Säh ỹỹ gó poj ỹỹ jé ỹ bahapäh uwa, 10 tamawob tyd hẽ kanebëëh. Ta g'aad ganyyh, ta ts'ooh, ta ag pan'aa nayyw hẽ tanu ewä däk, nayyw hẽ tabahõõ däk. 11 Paraó waa hood móh ỹỹ gó tabadäk. Ỹ gatsi tii bä ta ag ta gó, ỹ an'oo däg kän Paraó hã —näng mä ta kyyh ta s'ëëh taher'oot doo.
12 Ti m' Juséh ky hadoo ta hã:
—Hahỹỹh ỹ her'oot do a s'ëëh ky n'aa: tamawob tyd hẽ mahapäh doo, tamawob hẽ ta ä̃h pan'aa. 13 Tamawoob hẽ tabadoo däk bä a ä̃h, tii bä da õm Paraó naëënh p'aa hẽnh. P'aa hẽnh da mabanoo ta waa teëëk do pan'aa. Pooj jé mabad'oo doo da, ta waa mameëëk doo, tii d’ né da mabad'oo p'aa hẽnh —näng mä Juséh ta hã. 14 —Sahõnh hẽ baad tabadoo däk bä a hã, maher'ood da kyh ỹỹ n'aa Paraó hã, ỹ rabado nyyh hyb n'aa radawäts gëët doo gó naa. Mahyb n'aa es'ee d’ ỹỹh. Ky enyyw da hã ỹỹh. 15 ỹ ramasoo däk, tii ỹ ramanaa Eber buuj häj n'aa hẽnh naa. Babä na-ããj hẽ dooh ỹ mo haj'aa näng pé baad nadoo do hã, ti ỹ radawäts gëët t'op hadoo doo gó —näng mä Juséh kyyh Paraó waa mahe'ëëk do hã.
16 Ti m' pãw moo wëëd bahapäh tii baad up Juséh baher'oot ta seeh s'ëëh, tawén her'oot ẽnh ta s'ëëh ta hã:
—Ỹ na-ããj hẽ ỹ esëëh —näng mäh. —Säh ỹỹ gó ỹ mahũũm tamawob hẽ pãw hood nuh ỹỹ gó. 17 Pãw hood tajó hasooh doo gó kamekuunh pãw kesëëm doo Paraó waa pan'aa. Ỹ mahũũm bä säh ỹỹ gó tajó hasooh do gabuuj taw'ëëd rawa ỹ bahõm bä —näng mä ta kyyh ta s'ëëh taher'oot do Juséh hã.
18 Ti m' Juséh ky hadoo ta hã:
—Hahỹỹh ỹ her'oot do a s'ëëh ky n'aa: tamawob hẽ pãw hood mahapäh doo, tamawob hẽ a ä̃h pan'aa. 19 Tamawoob hẽ tabadoo däk bä a ä̃h, tii bä da õm Paraó naëënh, tamejũũ da õm ranu kahõg hõm. Tii bä a kamag rakadehëë hõm b'aah hã. Tii bä da a daab kuruj-du bawëh —näng mä Juséh kyyh pãw moo wëëd sa wahëh hã.
20 Ti m' tamawob hẽ tabadoo däk bä ta ä̃h, Paraó heen n'aa ta yt enäng doo, tamoo wät mä jäm. Sahõnh hẽ ta sii moo bok doo tabats'yyt mäh. Tamejũũ ranaëëj kän mä ta waa meheëk do sa wahëh, pãw moo hew'ëët do sa wahëh, ta sii moo bok do sa matym gó. 21 Ta waa meheëk doo p'aa hẽnh tamejũũ mä tamoo wät doo da. Ti m' tii bä kä p'aa hẽnh tabanoo kän Paraó waa teëëk doo. 22 Ti m' tamejũũ radajëëb kän pãw moo hew'ëët doo sa wahë kä. B'aah hã rakadehëë hõm ta s'ëëb paah. Juséh her'oot doo d’ né kä m'.
23 Ti m' Paraó waa mehe'ëëk do sa wahëh, tamebaan mä Juséh. Dooh tahyb n'aa es'ee wäd bä.