Juséh ta kariw n'aa ỹỹm masoo däk do panyyg n'aa hahỹỹh
39
Ti m' Juséh kä, ramahũũm kän Esito hẽnh. Potipah ets'ẽẽ hõm mä Is-maéw buuj sa hã. Potipah häd näng doo, Esito bä wahë n'aa Paraó häd näng do hagã n'aa sa wahëh.2 Tak'ëp Hyb N'aa Jawyk Doo Juséh hã had'yyt hẽ m' tabawät. Ti hyb n'aa m' sahõnh hẽ baad had'yyt hẽ ta hã. Esito buuj, ta kariw n'aa ta tób yt hẽ tabagëë kän mä Juséh.
Genesis 39:1-23
3 Ta kariw n'aa hapëë kän mä Tak'ëp Hyb N'aa Jawyk Doo awät Juséh sii. Sahõnh hẽ baad hed'yyt hẽ Juséh hã Tak'ëp hyb n'aa Jawyk Do an'oo bä m' ta hã. 4 Ti hyb n'aa kä m' ta kariw n'aa wén genaag kän Juséh. Ti hyb n'aa m' ta kariw n'aa an'oo bä kä Juséh ta tób hagã n'aa. Ta hagã n'aa na-ããj hẽ m' sahõnh hẽ ta ma.
5 Potipah kaseer n'aa däg Juséh. Sahõnh hẽ tabahaëënh ta hã tabag'ããs hyb n'aa. Tak'ëp Hyb N'aa Jawyk Doo ky n'aa edëë kän mäh ta kariw n'aa Juséh hyb n'aa kä. Sahõnh hã m' taky n'aa edëng. 6 Ti m' Potipah tabahaëënh sahõnh hẽ ta hã. Sahõnh hẽ Juséh bahag'ããs bä kä, dooh m' Potipah h'yy kap'eed bä kä. Jããm né tahyb n'aa peet ta waa kä.
Ti m' Juséh marahud anäm mäh. 7 Juséh hanäm do hyb n'aa m' ta kariw n'aa ỹỹm wén ty getsëg kän ta hã kä. Ti m' ỹỹnh ky hadoo:
—B'ëëp ana, sii ỹỹ aä̃h —näng mä ta kariw n'aa ỹỹm kyyh.
8 Ti m' Juséh ky gadoo:
—Ỹ né hẽ kariw ỹỹ n'aa an'oo bä ta tób bä hagã n'aa. Dooh tahyb n'aa peet péh hã ỹỹh. Sahõnh hẽ ta ma tamejũũ ỹ bahag'ããs hyb n'aa. 9 Dooh da ỹ hadoo péh ta tób bä moo wät doo. Sahõnh hẽ kariw ỹỹ n'aa an'oo ỹ karẽn doo. A hã ti dooh, õm ta ỹỹm hyb n'aa. Dooh ti d’ ỹ adoo bä. Dooh ỹ karẽn bä nas'aa doo ỹ moo wäd bä P'op Hagä Do wë —näng mä Juséh kyyh ta kariw n'aa ỹỹm hã.
10 Ti m' ỹỹnh hadoo doo ky kah'ũũm Juséh hã. Ti d’ hed'yyt mä ta kyyh ta hã. Dooh m' Juséh ky p'eed bä. Dooh m' ta karẽn bä ta sii taä̃ bä, dooh né m' ta karẽn ta pa tagëë bä.
11 Ti m' ta see pé noo gó kä m' Juséh bajëë suun mä tób gó tamoo wät doo hã tamoo wät hyb n'aa. Dooh m' tii b’ hagëët péh. Jããm up né ta kariw n'aa ỹỹm tii b’ hagä mäh. 12 Tabajë suun bä m' tób gó ỹỹnh hadoo do masoo däk ta saroor j'ooj hadäk doo hã. Ti m' taky hadoo:
—Si ỹỹ aä̃h —näng mäh.
Ti m' tamasoo däk bä, Juséh kabo nyyh ta saroor tamahasoo däk doo. Waj'aa nyyh mä.bä.
13 Ti m' ỹỹnh hadoo do hapäh bä ti Juséh waj'aa nyyh tamahä̃nh, teréd däk ta saroor ta moo gó, tanaëënh tób gó moo heb'ooh doo. 14 Ti m' taky hadoo sa hã:
—Bë hegãã, Eber buuj patuk ỹỹ manaa doo, takarẽn ër tamanesuunh nasaa do hã! Tabajëë suun, takarẽn tabaä̃h paawä si ỹỹh. Ỹ awaaw wät tamahä̃nh. 15 ỹ awaaw wät ta h'yyb, ti hyb n'aa ta saroor teréd sooh pa ỹỹ, waj'aa nyyh tób w'oo hã —näng mä ta kariw n'aa ỹỹm kyyh ta sii moo bok do sa hã.
16 Ti m' tenyyw sooh Juséh saroor ta pa, tagada ta patug kaja nä. 17 Ta patug kaja nä bä m', tabaher'ood kän ta hã:
—Hanäng Eber buuj, ër sii moo hew'ëët doo, mamanaa doo, takarẽn paawä tap'ëë hã tabaỹỹh si ỹỹh. 18-19 ỹ awaaw wät sii hẽ ỹ ramaa napäh hyb n'aa, ta saroor teréd sooh pa ỹỹh. Tii bä waj'aa nyyh tób w'oo hã. Tii d’ ỹ tabad'oo a sii moo hew'ëët doo hã —näng mä ta kyyh ta patug hã.
Ti m' Juséh kariw n'aa ky n'aa napäh bä ta ỹỹm her'oot do ta hã, Juséh ky n'aa, tak'ëp mä takawajããn wät tii bä. 20 Tamahũũm kän mä Juséh, tadawäts gëët mä ta tób n'aa gó, ta wób sa wahëh ragadehew'ëës doo gó.
21 T'ĩĩ hẽnh Juséh bagëët bä, radawäts gëët hẽnh, Tak'ëp Hyb N'aa Jawyk Doo ta hã tabawät. Ky enyym mä ta hã. Ti m' radewëës do hagã n'aa tagen'aak Juséh, ky enyym ta hã, P'op Hagä Do an'oo bä. 22 Ti hyb n'aa m' Juséh radewëës do hagã n'aa däg kä m'. Juséh hã takaher'oot mä sahõnh hẽ ramoo bok doo radahew'ëës do yt hẽ. 23 Tak'ëp Hyb N'aa Jawyk Doo an'oo bä m' sahõnh hẽ Juséh moo wät doo, baad hed'yyt hẽ m'. Ti hyb n'aa m' radewëës do hagã n'aa dooh tahyb n'aa peet péh Juséh hag'ããs do hyb n'aa.